நாலு கழுதையும், நாசமாப்போன ஊரும்...!

சமூகத்தின் பெயர்சொல்லி நடிக்கின்ற கயவர்கள்

சருகுக்குள் எறிகின்றார் நாளும்-நாம்

ஈயென்று அதைப்பார்த்து இருந்தாலெம் தாய்மண்ணை

ஈக்கள்தான் மகிழ்வோடு ஆளும்

காலறிவே இல்லாத கழுதைகள் கதைகேட்டு

காலமுக்கி விடுவீரா மேலும்-நாம்

நினைத்தாலே உலகத்தை நிச்சயமாய் புரட்டிடலாம்

நில் கொஞ்சம் சொல்லுவதைக் கேளும்

ஏதேதோ பொய்பேசி எம்வாக்கை எடுத்தவரின்

Cellலுக்கு Call லெடுத்து பாரும்-அந்த

தறுதலையோ Busy யென்றும் Dont Call me என்றும்தான்

வாலாட்டும் நாய் இன்று கூறும்...

பாராளுமன்றுக்கு போகின்ற சிலரங்கு

சாப்பிடத்தான் பேய்வாயை திறப்பார்-நம்

ஊராளுமன்றத்தில் இருக்கின்ற ஊத்தைகளோ

மறந்தெம்மை கூட்டித்தான் கொடுப்பார்.

உரிமைகள், தனியலகு, தனியாட்சி என்றன்று

உளறியது அத்தனையும் மறக்கும்-தினம்

குடியோடு குடித்தனத்தை செய்கின்ற குரங்குகளின்

குடும்பங்கள் திமிரோடு நடக்கும்

நாலைந்து வருடத்தில் மறுபடியும் ஒரு தேர்தல்

நம்நாட்டில் புதிதாகப் பிறக்கும்-இன்று

பாழ்பட்ட எம்சமூகம் அத்தனையும் மறந்தன்று

பணத்துக்காய் வாக்கள்ளி கொடுக்கும்

இளைஞர்கள் வாய்பார்த்து இப்படியே நின்றிருந்தால்

இதுபோன்ற செயல் தொடராய் நடக்கும்-சிறு

தீக்குச்சி உள்ளேதான் தீப்பந்தம் இருக்கிறது-நாம்

நினைத்தாலே பெரும் புரட்சி வெடிக்கும்

காதலிலே தினம் மூழ்கி காணாமல் போகாமல்

கைகளிலே அரசியலை எடுப்பாய்-என்றும்

ஏழைகளை பொய் சொல்லி ஏமாற்றி வாழ்வோரை

எதிர்த்துநீ போரொன்றை தொடுப்பாய்..!

வீரா உன் தோளினிலே சூரியனைச் சுமந்து எழு

விடியட்டும் ஏழைகளின் கிழக்கு-நீ 

அடிக்கின்ற அடியினிலே அட்ரஸ்ஸே இல்லாமல்

போகட்டும் வீற்றிருக்கும் அழுக்கு...!!