றிசாத் பதியூதினுக்கு ஞானசார தேரரின் விளக்கம்..!

வில்பத்து பகுதியில் மீளக் குடியமர்த்தப்பட்ட முஸ்லிம் மக்கள் கடந்த யுத்த காலத்தில் தமிழீழ விடுதலைப்புலிகளால் வடக்கில் இருந்து வெளியேற்றப்பட்டவர்கள் என வணிகத்துறை அமைச்சர் ரிஷாட் பதியுதீன் தெரிவித்துள்ளார்.

பொதுபலசேனா அமைப்பினர் அண்மையில் வெளியிட்ட கருத்துக்கு பதிலளிக்கும் முகமாக கொழும்பில் நேற்று இடம்பெற்ற செய்தியாளர் சந்திப்பில் அமைச்சர் இந்த கருத்தை வெளியிட்டுள்ளார்.

பொதுபலசேனா போன்ற சில அமைப்புகள் தற்போது சிறுபான்மையினருக்கு எதிரான பாரிய செயற்பாடுகளை முன்னெடுத்துச் செல்கின்றன.

வில்பத்து பகுதியில் 5 ஆயிரம் குடும்பங்களை நான் குடியேற்றியதாக அவர்கள் தெரிவித்திருந்தார்கள். அதற்கான தேவைப்பாடு எனக்கில்லை. அந்த மக்கள் இந்தியாவில் இருந்து வந்தவர்கள் அல்ல, கடந்த யுத்தகாலத்தில் வடக்கில் இருந்து இடம்பெயர்ந்தவர்களாவர். எனவே, யுத்தம் நிறைவடைந்த பின்னர் காடுகளை சுத்திகரித்து தமது இருப்பிடங்களுக்கு சென்றுள்ளனர்.

எனவே, அதற்கு எதிராகவும் பொதுபலசேனா செயற்படுகின்றமையானது காரணமற்ற செயலாகும் என குறிப்பிட்டார்.

எவ்வாறாயினும், இந்தவிடயம் தொடர்பாக sfm  பொதுபலசேனாவின் பொதுசெயலாளர் கலகொட அத்தே ஞானசார தேரரிடம் வினவியது.

வணிகத்துறை அமைச்சர் என்றவகையில் அவருக்கு நாங்கள் கடமையை பற்றி உணர்த்த விரும்புகிறோம். வில்பத்து மற்றும் சிலாவற்றுறை வீதியில் இருமறுங்கிலும் முஸ்லிம் மக்கள் மாத்திரமே குடியமர்த்தப்பட்டுள்ளனர். ஆனால் குடிசன பரம்பலுக்கு அமைய அங்கு தமிழ், சிங்கள, முஸ்லிம் மக்கள் அனைவரையும் குடியமர்த்தவேண்டும். அன்றி ஒரு இனத்தவரை மாத்திரம் குடியமர்த்துவதை விடுத்து அனைவருக்கு வாய்ப்பளிக்க வேண்டும். சிங்கள மக்களும் யுத்த காலத்தில் பாதிக்கப்பட்டார்கள். இது முஸ்லிம் மக்களுக்கு எதிராக கருத்து அல்ல. எனவே, பிரச்சினையை மாத்திரமே நாங்கள் சுட்டிக்காட்டியுள்ளோம் என அவர் தெரிவித்தார்.