ஞாயிற்றுக்கிழமை இரவு முழுவதும் நான் தூங்கவில்லை - அமைச்சர் றிசாத்

கிரண்ட்பாஸ் பள்ளிவாசலை தாக்கிய காடையர் கூட்டம் குறித்த ஆதாரங்களை ஊடகங்கள் வெளியிட்டுள்ள நிலையிலும், அதுபற்றிய வீடியோ ஆதாரங்கள் வெளியாகியுள்ள நிலையிலும் சம்பந்தப்பட்டவர்களுக்கு எதிராக சட்டநடவடிக்கை எடுப்பது குறித்து ஆராய்ந்துவருவதாக அமைச்சர் றிசாத் பதியுதீன் ஜப்னா முஸ்லிம் இணையத்திற்கு கூறினார், இதுதொடர்பில் அவர் மேலும் கூறுகையில்,

கிரண்ட்பாஸ் பள்ளிவாசலை விட்டுக்கொடுத்துவிட்டோம் என்ற கவலை என் மனதில் உள்ளது. ஞாயிற்றுக்கிழமை இரவு முழுவதும் சத்தியமாக நான் தூங்கவில்லை. அந்த பள்ளிவாசலில் முஸ்லிம்களாகிய நாங்கள் சுஜுத்து செய்ய வேண்டும் என்ற அவா என்னிடமிருந்தது. இதனால்தான் ஜனாதிபதி மஹிந்த ராஜபக்ஸ வவுனியா வந்திருந்தபோது அவரிடம் இதுபற்றி கலந்துரையாடினேன். அந்த பள்ளிவாசலை அகற்ற வேண்டியதில்லை என் அப்போது ஜனாதிபதி உத்தரவாதம் வழங்கினார்.

பின்னர் நானும் ஹுனைஸ் பாருக் எம்.பி.யும் கிரண்ட்பாஸ் பள்ளிவாசலுக்கு சென்றோம். அங்கிருந்தபடி பௌததசாசன அமைச்சின் செயலாளருடன் உரையாடி, அவரும் கிரண்ட்பாஸ் பள்ளிவாசல் இயங்குவதற்கு அனுமதியளித்திருந்தார். இருந்தபோதும் காடையர்கூட்டம் வெறியுடன் வந்து கிரண்ட்பாஸ் பள்ளிவாசலை பதம் பார்த்துள்ளது. அந்த பள்ளிவாசல் தாக்கப்பட்ட பின்னர் நான் அங்கு சென்றபோது எனது மனம் வேதனையில் துடித்தது. நெஞ்சு வெடித்துவிடும் போல் இருந்தது.

எப்படியும் இந்த அல்லாஹ்வின் இல்லத்தின் சுஜுத்து செய்ய வேண்டுமென என் மனது விரும்பியது. இதுபோன்றே முழு சமூகமும் விரும்பியது. முஸ்லிம் அரசியல்வாதிகளும் முயன்றனர். ஆனால் பௌத்தசாசன அமைச்சில் நடைபெற்ற கூட்டத்தில் எல்லாம் மாறி நடந்துவிட்டது. எனக்கு வந்த ஆத்திரத்திற்கு பொலிஸ்மா அதிபரை திட்டித் தீர்த்தேன். ஆத்திரப்பட்டேன். மற்றும் சில முஸ்லிம் அரசியல் வாதிகளிடமும் இந்த ஆத்திரம் இருந்தது. இப்போதும் அந்த கவலை என்னிடம் உள்ளது.

கிரண்ட்பாஸ் பள்ளிவாசல் தாக்குதல் சூத்திரதாரிகள், அந்த காடையர் கூட்டத்தைத் தடுக்காத பொலிஸார் உள்ளிட்டவர்களுக்கு எதிராக சட்டநடவடிக்கை குறித்து ஆராயப்படுகிறது. முஸ்லிம் சட்டத்தரணிகள் இதற்கு ஒத்துழைப்பு வழங்க வேண்டுமெனவும் அமைச்சர் றிசாத் பதியுதீன் மேலும் கூறினார்,