மத்திய மாகாண தேர்தல் பிரச்சாரத்தில் ஐ.தே.க. முஸ்லிம் பிரமுகர்கள் பங்கேற்பார்களா..?

(எம். சுஐப்)

தேர்தலில் ஐ. தே. க. தனித்தே போட்டியிடுமென்ற கட்சியின் தீர்மானத்தை மீறி மத்திய மாகாணத்தில் அந்தக் கட்சியின் வேட்பாளர் பட்டியலில் தேசிய ஐக்கிய முன்னணியின் தலைவரது பெயர் உள்வாங்கப்பட்டமை குறித்து கட்சியின் பல்வேறு மட்டங்களில் எதிர்ப்புகள் கிளம்பியுள்ளன. அத்துடன் மத்திய மாகாண முஸ்லிம் பிரதிநிதித்துவத்தை சிதைக்கும் வகையில் ஆகக் கூடுதலான முஸ்லிம் வேட்பாளர்களை பட்டியலில் இடம் பெறச் செய்தமைக்காகவும் கட்சியின் மேல் மட்ட முஸ்லிம் தலைவர்கள் ஆட்சேபனை தெரிவித் துள்ளனர்.

ஐ. தே. க வின் உப தலைவர்களில் ஒருவரான கபீர் ஹாசிம் எம். பி. தலைமையில் இந்த எதேச்சையான நடவடிக்கையை எதிர்த்து தேர்தல் பிரசாரங்களிலிருந்து ஒதுங்குவதாக முடிவு செய்துள்ளார். கண்டி மாவட்ட பாராளுமன்ற உறுப்பினரான ஹலீம், கொழும்பு மாநகர மேயர் ஏ. ஜே. எம். முஸம்மில், மேல் மாகாண சபை உறுப்பினர் முஜிபுர் ரஹ்மான் ஆகியோரும் தலைவர் ரணிலை சந்தித்து நமது ஆட்சேபனையை வெளியிட்டுள்ளனர்.

கடந்த மாகாண சபைத் தேர்தலில் மத்திய மாகாணத்தில் 4 வேட்பாளர்களே இடம் பெற்றிருந்தனர்.  இம்முறை 7 பேர் இடம்பெற்றமை எவ்விதத்திலும் ஏற்றுக் கொள்ள முடியாததெனத் தெரிவித்துள்ள அதிருப்தியாளர்கள் தனி நபரைத் திருப்திப்படுத்துவதற்காக சமூகமொன்றை பாழாக்க முடியாது எனத் தெரிவித்தனர்.