'சமூகத்தை காட்டிக்கொடுக்காமல் அரசியல் மேற்கொண்டு வருகின்றோம்'

(ஏ.எல்.ஜனூவர்)

கடந்த கிழக்கு மாகாண சபைத்தேர்தலின் போது பள்ளிவாசல் உடைப்புக்கெதிராக மரச்சின்னத்திற்கு வாக்களியுங்கள், கிழக்கு மாகாண பொம்மை ஆட்சியை ஒழிப்போம், முஸ்லிம் சமூகத்தின் குரலாக இருப்போம் என்றெல்லாம் வீர வசனம் பேசிய முஸ்லிம் காங்கிரஸ் பொம்மையாகிய நிலையில் தற்போது பிரதேசவாத கருத்துக்களை பரப்பிவருகின்றது. அட்டாளைச்சேனையை நான் காட்டிக்கொடுத்ததாக கூறுவது வேடிக்கையாக உள்ளதென கிழக்கு மாகாண சபை அமைச்சரவை பேச்சாளரும் வீதி அபிவிருத்தி அமைச்சருமான எம்.எஸ்.உதுமாலெப்பை தெரிவித்தார்.

அண்மையில் அட்டாளைச்சேனை பிரதேச சபை உறுப்பினர் ஏ.எஸ்.எம். உவைஸ் வெளியிட்டுள்ள பத்திரிகை செய்தியில் தனது சொந்த ஊருக்கு வரும் நிதியினை வேறு பிரதேசத்திற்கு திசை திருப்பிய அமைச்சர் உதுமாலெப்பை வரலாற்றுத் துரோகம் செய்துள்ளதாக தெரிவிக்கப்பட்டுள்ள கருத்து தொடர்பாக விபரம் கேட்ட போது அமைச்சர் மேற்கண்டவாறு குறிப்பிட்டார்.

நாங்கள் எச்சந்தர்ப்பத்திலும் சமூகத்தையோ, பிரதேசத்தையோ காட்டிக்கொடுக்காமல் அரசியல் நடவடிக்கையை மேற்கொண்டு வருகின்றோம். கிழக்கு மாகாணத்தில் நிலவிய யுத்த நிலைமையினை இல்லாமல் செய்து தொடர்ந்தும் அச்சத்துடன் வாழ்ந்து வந்த முஸ்லிம் சமூகத்தை அமைதியாக வாழக்கூடிய நிலை உருவாவதற்கும் கிழக்கு மாகாணத்தில் அருந்து போய் இருந்த இன உறவுகளை கட்டி எழுப்புவதற்கும் கிழக்குமாகாண சபையின் ஊடாக வரலாற்று அபிவிருத்திப்பணிகளை மேற்கொள்வதற்கும், தேசியகாங்கிரஸின் தலைமை பெரும் பங்காற்றியுள்ளது. நாங்கள் எப்போதும் நாட்டையோ, பிரதேசத்தையோ காட்டிக்கொடுக்கும் சந்தர்ப்பவாத அரசியல் நடவடிக்கைகளை ஒரு போதும் செய்த வரலாறு கிடையாது.

ஒவ்வொரு தேர்தல் காலங்கலிலும் பொத்துவில் பிரதேசத்திற்கு பல ஏஜன்டுகள் மூலம் வாக்கு வேட்டைக்காக செல்லும் முஸ்லிம் காங்கிரஸ்காரர்கள் அம்மக்களின் வாக்குகளை பெற்றுக்கொள்வதற்காக பொய்யான வாக்குறுதிகளை வழங்கி அதிகப்படியான வாக்குகளையும் பெற்றுவிட்டு அம்மண்ணுக்கு இருந்த அரசியல் அதிகாரத்தினையும் இல்லாமல் செய்து விட்டும் அம்மண்ணுக்கு அவர்களால் எதுவுமே செய்ய முடியாத நிலையில் எங்களால் செய்யப்படும் அபிவிருத்தி வேலைகளையும் தடுக்க நினைக்கின்றார்கள். அம்மக்கள் எங்களுக்கு குறைந்த அளவிலான வாக்குகளை அளித்த போதிலும் அம்மக்களுக்கு பாரிய வரலாற்று அபிவிருத்தி பணிகளை நாங்கள் செய்து கொண்டிருக்கின்றோம்.

முஸ்லிம் காங்கிரஸின் தற்போதைய தலைவர் இந்நாட்டின் நீதி அமைச்சராக பதவி வகிக்கின்றார். நீதி அமைச்சு தொடர்பான எல்லா விதமான பணிகளையும் நீதி அமைச்சின் ஊடாகவே மேற்கொள்ளப்படவேண்டும் என்பதினை தேசிய காங்கிரஸ் கட்சி ஏற்றுக்கொள்கின்றது. அதே போல் இந்நாட்டின் உள்ளுராட்சி மாகாண சபைக் அமைச்சராக ஏ.எல்.எம். அதாஉல்லா அவர்கள் செயற்படுகின்றார்கள். உள்ளுராட்சி மன்றங்களின் தேவைகளை அவர் ஊடாகவே நிறைவேற்ற முடியும் என்பதை விட்டு விட்டு வீண்பிரதேச வாதத்தை முஸ்லிம் காங்கிரஸ் உறுப்பினர்கள் பேசுகின்றனர்.

மறைந்த தலைவர் எம்.எச்.எம். அஷ்ரப் அவர்கள் கிழக்கு மாகாண மக்கள் நிம்மதியாக வாழ வேண்டும் என விரும்பினார். அதற்காகவே குரல் கொடுத்தார். கிழக்கு மாகாண மக்கள் நிம்மதியாக வாழக்கூடிய சூழ்நிலையை உருவாக்க பல அரசியல் நடவடிக்கைகளை மேற்கொண்டார். ஆனால் முஸ்லிம் காங்கிரஸ் தலைவர் அஷ்ரப் அவர்களின் மறைவிற்கு பின்னர் றஊப் ஹக்கீம் அவர்களினால் எடுக்கப்பட்ட எந்த தீர்மானமும் முஸ்லிம் சமூகத்திற்கும் மாத்திரம் அன்றி நாட்டிற்கும் நல்லதாக அமையவில்லை. 

யுத்தத்தை நிறுத்திய ஜனாதிபதி மஹிந்தராஜபக்ஷ அவர்கள் 2005ம் ஆண்டு ஜனாதிபதி தேர்தலில் வந்து இந்நாட்டில் யுத்தத்தை முடிவிற்கு கொண்டு வருவேன், கிழக்கு மாகாணத்தை பிரித்துத்தருவேன், மூவின மக்களும் நிம்மதியாக வாழக்கூடிய சூழ்நிலையை உருவாக்கித்தருவேன் எனக்கூறி மக்கள் ஆணையை வேண்டி நின்ற போது ஐக்கிய தேசிய கட்சியின் வேட்பாளர் ரணில் விக்கிரமசிங்க அவர்கள் தான் ஜனாதிபதியாக தெரிவு செய்யப்பட்டால் வடக்கு கிழக்கு மாகாணங்களை இரண்டு வருடங்களுக்கு விடுதலைப்புலிகளுக்கு நிருவாகம் செய்ய தருவேன் எனக்கூறி மக்களின் ஆணையை கேட்டார். கிழக்கு மாகாண மக்களின் நிம்மதியான வாழ்க்கைக்கு பக்கபலமாக இருந்து அரசியல் தீர்மானம் எடுக்கவேண்டிய முஸ்லிம் காங்கிரஸ் அன்று வட கிழக்கு இணைப்பிற்கும் மக்களின் நிம்மதியான வாழ்க்கைக்கும் எதிராக ரணில் விக்கிரமசிங்கவை ஆதரித்ததன் மூலம் வரலாற்று பிழை செய்தார்கள்;.

2010ம் ஆண்டு நடைபெற்ற ஜனாதிபதி தேர்தலில் யுத்தத்தை நிறுத்திய ஜனாதிபதி மஹிந்த ராஜபக்ஷ அவர்களுக்கு நன்றி தெரிவிக்க வேண்டும் என முஸ்லிம் மக்களை வேண்டிய போது இந்நாட்டின் இராணுவத்தளபதி சரத்பொன்சேகா அவர்கள் முஸ்லிம் காங்கிரஸ் வேட்பாளர் என்று கூறி முஸ்லிம் மக்களின் வாக்குகளை அளித்து அரசாங்கத்திற்கும் நாட்டிற்கும் முஸ்லிம் மக்களை காட்டிக்கொடுத்தார்.