முர்ஸி மீது குற்றவிசாரணை - விடுவிக்க கோருகிறது அமெரிக்கா

எகிப்தில் ஜனநாயக முறையில் தேர்ந்தெடுக்கப்பட்ட முகமது மோர்சியின் ஆட்சிக்கு எதிராக மக்கள் போராட்டம் நடத்தினர். இதைத் தொடர்ந்து ராணுவம் கடந்த 3-ம் தேதி ஆட்சியை கைப்பற்றியது. இதனால் ஏற்பட்ட கலவரத்தில் நூற்றுக்கும் அதிகமானோர் உயிரிழந்தனர். ராணுவம் மோர்சியை கைது செய்து ரகசிய இடத்தில் சிறை வைத்துள்ளது. 

இந்நிலையில் அவர் மீது குற்ற விசாரணை நடத்த உள்ளதாக அரசு அறிவித்துள்ளது. உளவு வேலையில் ஈடுபட்டது, வன்முறையைத் தூண்டியது, நாட்டின் பொருளாதாரத்தை சீர்குலைத்தது போன்ற பல புகார்கள் அவர் மீது எழுந்துள்ளன. மேலும், முஸ்லீம் சகோதரத்துவக் கட்சியின் 8 முக்கிய தலைவர்கள் மீதும் புகார்கள் எழுந்துள்ளன. 

இந்த புகார்களை அரசு வழக்கறிஞர்கள் ஆராய்ந்து வருகின்றனர். இதனால் அவர் மீது விரைவில் குற்ற விசாரணை தொடங்கும் என்று தகவல்கள் தெரிவிக்கின்றன.

இதற்கிடையே, அமெரிக்கா மோர்சியை விடுவிக்கக் கேட்டுள்ளது. மேலும், இஸ்லாமிய சகோதரத்துவ கட்சியினரை கைது செய்யக் கூடாது என்றும் கேட்டுக்கொண்டுள்ளது.