'எமது பூர்வீகம் பெரும்பான்மை சமூகங்களுக்கு உரித்துடையதாகிவிடும்'

(ஏ.எல்.ஜுனைதீன்)

    எமது தலைமைத்துவத்தின் குரலை நசுக்க வேண்டும் என்பதற்காகவே கடும் போக்குவாதிகளால் உருவாக்கப்பட்டவர்கள்தான் அமைச்சர்களான அதாஉல்லா, ரிஷாட் பதிஉத்தீன், ஹிஸ்புல்லா போன்ற குறுநிலத் தலைவர்கள். நன்கு திட்டமிடப்பட்ட நிகழ்ச்சி நிரலுக்கு அமைவாக இவர்கள் ஒற்றர்களாகச் செயற்படுவதன் காரணமாகவேதான் எமது பூர்வீக நிலங்களும், பள்ளிவாசல்களும் பறிபோய்க் கொண்டிருக்கின்றன. என கிழக்கு மாகாண சபை உறுப்பினர் ஏ.எல்.எம்.நஸீர் தைக்காநகர் பிரதேசத்தில் நடைபெற்ற வைபவம் ஒன்றில் பேசுகையில் தெரிவித்துள்ளார். 

    மாகாண சபை உறுப்பினர் நஸீர் இங்கு தொடர்ந்து பேசுகையில் மேலும் கூறியதாவது,

    இன்று முஸ்லிம்களாகிய நாம் முக்கியமான ஒரு காலச் சூழலில் இருந்து கொண்டிருக்கின்றோம். இந் நாடு சுதந்திரமடைவதற்காகவும் நடைபெற்று முடிந்துள்ள 30 வருட கால யுத்தத்தின் போதும் நாட்டின் இறைமைக்காகவும் ஒற்றுமைக்காகவும் ஏராளமான உயிர்களையும் பெறுமதியான சொத்துக்களையும் முஸ்லிம் சமூகம் இழந்தது.

    இவ்வாறான வரலாற்று  உண்மைகள் இருக்கின்ற வேளையில் முஸ்லிம்கள் செய்த தியாகங்களை மறந்து பெரும்பான்மை சமூகத்தின் கடும் போக்குவாதிகள் கல்வி, தொழில், குடியேற்றம், மதஸ்தலங்கள் கலாச்சாரங்கள் என்பனவற்றின் மீது குறி வைத்து தாக்குவது என்பது  இந்நாட்டை இன்னுமொரு மியன்மாராகக்  கொண்டு செல்வதற்கு முற்படுகின்றனர் என்றே கூறல் வேண்டும்.

    அபிவிருத்திக்காகவும் சலுகைக்காகவும் எமது சமூகத்தின் உரிமைகளை விட்டுக் கொடுப்பதால் இன்னும் பத்து வருடங்களில் எமது பூர்வீகம் பெரும்பான்மை சமூகங்களுக்கு உரித்துடையதாகிவிடும்.  இந்நிலையை உணர்ந்துதான் முஸ்லிம் காங்கிரஸ் அபிவிருத்தி என்ற மாயைக்குள்(பொய் தோற்றம்) சிக்கி விடாமல் முஸ்லிம்களின் வரலாறு, பூர்வீகம், கலாசாரம், சமயம் என்பனவற்றைப் பாதுகாப்பதற்கு போராடி வருகின்றது.

    அபிவிருத்தி என்பது சலுகையல்ல. சலுகைக்காக உரிமையை விட்டுக் கொடுக்க முடியாது. இதை உணர்ந்து எமது தலைமை அபிவிருத்திக்காக யாரிடமும் கையேந்தாமல் இருப்பதனால்தான் நாடாளுமன்றத்திலும்இ அமைச்சரவையிலும் ஏன் சர்வதேசத்திலும் தலை நிமிர்ந்து முஸ்லிம் சமூகத்தின் குரலாக ஒலிக்க முடிகின்றது.

    தமிழ் சமூகம் எத்தனையோ இழப்புக்களைச் சந்தித்த போதும் அச் சமூக மக்களின் ஒற்றுமையின் பலத்தினால்தான் சர்வ தேசத்தின் கவனத்தை ஈர்த்தெடுத்தது. இதே போன்றதொரு சேயற்பாட்டை முஸ்லிம் சமூகமும் கையாளும் போதுதான் எமது இலக்கை அடையமுடியும்.

    இதற்கு நாம் ஒற்றுமைப்படுவதுடன் முஸ்லிம் காங்கிரஸ் கட்சியும் நூறு வீத மக்கள் ஆதரவையும் பெற்றுக் கொள்ளவேண்டியது மிகவும் அவசியமாகும். இவ்வாறு அவர் கூரினார்.