சவூதி அரேபியாவில் 'மத' கருத்துக் கணிப்பு நடத்தியவருக்கு 7 ஆண்டு சிறை, 600 சவுக்கடி

இஸ்லாமிய நாடுகளில் ஒன்றான சவுதி அரேபியாவில் இணையதளம் மூலம் மதம் தொடர்பான கருத்து கணிப்பில் ஈடுபட்டவருக்கு 7 ஆண்டு சிறைவாசத்துடன் 600 சவுக்கடிகள் தண்டனையாக வழங்கப்பட்டுள்ளது.

சவுதி அரேபியாவை சேர்ந்த ரய்ஃப் படாவி என்பவர், அந்நாட்டின் வாழ்க்கை முறையில் மதத்தின் ஆதிக்கம் எவ்வகையில் உள்ளது? என்று இணையதளத்தின் மூலம் கருத்துக் கணிப்பை நடத்தினார். இதில் பங்கேற்றவர்களில் பலர் தங்கள் மனதில் தோன்றியதை வெளிப்படையாக பதிவு செய்தனர்.

சில கருத்துகள் மதத்தின் ஆதிக்கம் பண்பொழுக்கத்தை பேணி பாதுகாப்பதாகவும், சிலர் தங்களின் சுதந்திரத்துக்கு கைவிலங்காக உள்ளதாகவும் கருத்து தெரிவித்திருந்தனர்.

ரய்ஃப் படாவி நடத்திய இந்த இணையதள கருத்துக் கணிப்பு சவுதியில் உள்ள மதவாதிகளிடையேயும், மத தலைவர்களிடையேயும் கடும் கொந்தளிப்பை ஏற்படுத்தியது. அவர் மததுவேஷ செயல்களில் ஈடுபட்டதாக அவர்கள் குற்றம் சாட்டினர். 

இதனையடுத்து கடந்த ஆண்டு ஜூன் மாதம் அவர் கைது செய்யப்பட்டார்.  ஜெட்டா நகரில் உள்ள செங்கடல் துறைமுகம் கோர்ட்டில் ரய்ஃப் படாவி மீது நடந்துவந்த வழக்கில் நேற்று தீர்ப்பளிக்கப்பட்டது. அவருக்கு 7 ஆண்டு சிறைவாசமும் 600 சவுக்கடிகளும் தண்டனையாக வழங்கி நீதிபதி தீர்ப்பளித்தார்.