பேதங்களை மறந்து உலாமா சபையுடன் இணைந்து செயற்படுவோம் - ஹரீஸ் எம்.பி. அழைப்பு

(அவுதீனா)

இலங்கை வாழ் தமிழ் மக்கள் வாழ் அல்லது வாழவிடு என்ற நிலைக்கு ஒரு காலகட்டத்தில் தள்ளப்பட்டிருந்த நிலமை  இன்று மாறி, உண் அல்லது உண்ணவிடு  என்ற நிலைக்கு முஸ்லிம் மக்கள் தள்ளப்பட்டுள்ளனர்.

இவ்வாறு திகாமடுல்ல மாவட்ட பாராளுமன்ற உறுப்பினரும் கல்முனை அபிவிருத்திக் குழுவின் தலைவருமான எச்.எம்.எம. ஹரிஸ் சாய்ந்தமருது பரடைஸ் வரவேற்பு மண்டபத்தில் புதன் கிழமை (13.03.2013)  சாய்ந்தமருது வெலிவோரியன் கிராம அபிவிருத்தி தலைவர் எம்.எம். இப்றாஹிம் தலைமையில் வெனிசுலா நாட்டின் ஜனாதிபதி ஹியுகோ சவேஸின் மறைவையொட்டி இடம்பெற்ற இரங்கற் கூட்டத்தில் பிரதம அதிதியாக கலந்து கொண்டு உரையாற்றும் போது தெரிவித்தார்.

அவர் மேலும் தெரிவிக்கையில்,

இன்று எமது நாட்டில் முஸ்லிம்களுக்கு எதிராக நடைபெற்றுக் கொண்டிருக்கின்ற ஹலாலை ஒழிப்போம் என்ற தேராணையில் நாட்டின் ஸ்திரத்தன்மையினையும், சமூகங்களுக்கிடையிலான   ஒற்றுமையையும்  சீர்குலைக்க பொதுபல சேன கங்கனம் கட்டிக்கொண்டு அப்பாவி பௌத்தமக்களை தூண்டி முஸ்லிம்களுக்கு எதிராக துவசே மனபாங்குடன் கசப்புணர்வினை ஏற்படுத்திவருகின்றனர். ஹலாலினை இலங்கையில் இல்லாதொழிக்க பொது பல சேனா எடுத்த முயற்சியில் வெற்றி பெற்றாலும் ஹராத்தை எந்தவொரு முஸ்லிமும் அனுமதிக்கப் போவதில்லை. கற்பனையிலும் நடக்காத  காரியத்திற்காக அவர்கள் பகற்கனவு கண்டு கொண்டிருக்கின்றாகள்.

அதுமாத்திரமல்ல பொதுபல சேனாவின் அடுத்த இலக்கு ஹிஜாப், முஸ்லிம் பெண்கள் இனி ஹிஜாப் அணியக்கூடாது, சிங்களப் பாடசாலைகளில் கல்வி பயிலும் முஸ்லிம் மாணவர்களும் மற்றும் ஆசிரியர்களும் ஹிஜாபின்றியே பாடசாலைக்குள் செல்லவேண்டும்,  அரச அலுவலகங்களில் கடமையாற்றும் முஸ்லிம் பெண்களும் இவ்வாறே செயற்படவேண்டும் என்று பகற்கணவு கண்டு கொண்டிருக்கின்றார்கள். இவ்வாறான சம்பவங்கள் நடைபெற நாம் ஒருபோதும் இடமளிக்கக்கூடாது.

இம்மாதம் 11 ஆம் திகதி கொழும்பில்  நடைபெற்ற ஜம்மியத்துல் உலமா சபையும் பெளத்த தேரர்களும் இணைந்து நடாத்திய ஹலால் தொடர்பான ஊடகவியளாலர் மகாநாட்டுடன் ஹலால் பிரச்சினையும் முஸ்லிம்களுக்கு எதிராக அண்மைக்காலமாக நடைபெற்று வருகின்ற குரோதத் தன்மை முடிவடைந்து விட்டது என்று நினைக்க்கூடாது. அன்றிலிருந்துதான்  முஸ்லிம்களுக்கு பிரச்சினை ஆரம்பித்துள்ளது என்று நான் கருதுகின்றேன்.

குர்ஆனும்  நபி(ஸல்) அவர்களின்  வழிகாட்டலும் முஸ்லிமான ஒவ்வொரு மனிதனும் ஏனைய மதங்களையும், ஏனைய மதங்களிலுள்ளோரின் உணர்வுகளையும் அவர்களது கலை கலாசார விழிமியங்களையும் மதித்து கண்ணியப்படுத்தி நடக்க வேண்டுமென்று வலியுறுத்துகிறது.

தமிழ் ,சிங்கள மற்றும் கிறிஸ்தவ சமூகம் துயருறும் போது அதனை கண்டும் காணாது    போல் நடப்பதை இஸ்லாம் அடியோடு வெறுக்கின்றது. இவ்வாறு குர்ஆன் கூறுகின்ற போது குர்ஆன் என்றால் என்ன என்று தெரியாத அமைச்சர் சம்பிக்க ரணவக்க குர்ஆனை வாசித்துக் காட்டி விளக்கம் கற்பிக்கின்றார்.

எனவே தான் முஸ்லிம்களாகிய நாம் அரசியல் பேதங்களை மறந்து  அனைவரும் ஒற்றுமைப்பட்டு ஜம்மிய்யத்துல் உலாமாவுடன் இணைந்து அரசியல் தலைமைகளோடு பேசி முஸ்லிம்களின் அத்திவாரத்தை அசைத்துப்பார்க்கின்ற விடயத்திற்கு எதிராக ஒன்றிணைய வேண்டும். என்று தெரிவித்தார்.

இந் நிகழ்வில். கிழக்கு மாகாண சபையின் உறுப்பினரும் குழுக்களின் தலைவருமான ஏ.எம். ஜெமீல், சாய்ந்தமருது பிரதேச செயலாளர் ஏ.எல்.எம். சலீம், கல்முனை மாநகர சபை உறுப்பினர்களான ஏ.ஏ. பசீர், ஏ. நிசார்டீன், காரைதீவு  பிரதேச சபை உறுப்பினர் ஏ.பாயிஸ், அம்பாரை மாவட்ட உலமா சபைத் தலைவர் எஸ்.எச். ஆதம்பாவா மௌலவி , சாய்ந்தமருது பிரதேச பள்ளிவாசல்களின் தலைவர்கள் , உறுப்பினர்கள் , கல்வியாளர்கள் , வர்த்தக பிரமுகர்கள்  மற்றும் பொதுமக்களும் கலந்து கொண்டனர்.