இனி புதிதாய் ஓர் அரசியல் பிரவேசம்..!

(MIFRAAZ SHAHEED, TIANJIN MEDICAL UNIVERSITY - CHINA)

முஸ்லிம் சமூகத்தின்  மீதான இன்றைய அடக்குமுறைகளை உன்னிப்பாக  அவதானிக்கின்ற   போது வெளிப்படையான  உண்மை     ஒன்றை நாம் புரிந்து கொண்டு தான்  ஆகவேண்டும். அதுதான்  குறிப்பிடத்தக்க  அளவு  அரசாங்கத்தின்  மீது  அழுத்தங்களை    பிரயோகிக்க  முடியாத  முஸ்லிம் அரசியலின்  நிலை.   வழிய  வந்தால்  கிழவி,  விலகி  சென்றால் குமரி என்பது  இலங்கை  அரசியலில்   சரியாக   தான்  இருக்கிறது. இது  தான்  இன்றைய  முஸ்லிம்  கட்சிகள்  தொடர்பான  அரசாங்கத்தின் நிலைப்பாடு.

ஒவ்வொரு முறையும் எமது  முஸ்லிம் அமைச்சர்கள்  அரசாங்கத்துடன் இணையும் பொது  எதிர் கட்சி  அரசியலில்  இருந்து  கொண்டு  முஸ்லிம் சமூகத்துக்கு  ஒன்றுமே செய்ய  முடியாது,  கிடைப்பதை வைத்து  மக்களுக்கு  ஏதாவது  செய்யலாம்  என்ற நோக்கத்தில் தான்  செல்கிறார்கள்.  ஆனால்  அரசாங்க வரிசையில்  அமர்ந்த  பிறகு  முஸ்லிம்  சமூகத்துக்காக  பேசுகின்ற  உரிமையை  கூட இழந்து  விடுகின்றார்கள்.  எதிர்  கட்சியில் இருந்தால்  கூட  பிரச்சினைகளின்  போது  பேசி  இருப்பார்கள்.  உண்மையில்   அவர்களையும்  குறை  கூற  முடியவில்லை. அதுதான்  அவர்களின்  நிலை.

அரசியலுக்கு வெளியே இருந்து கொண்டு எவ்வளவுதான் பேசினாலும்  அங்கே  போனால்  பெட்டிப்பாம்பாக  அடங்கித்தான்  ஆகவேண்டும்  என்பது இலங்கை  அரசியல் சாசனத்தில்  எழுதப்படாத  விதியாக  போய்விட்டது.  இதனால்  தான்  என்னவோ உடைக்கப்பட்ட  பள்ளிவாசல்கள்  தொடர்பான  சரியான  தரவுகளை  அரசாங்கத்திடம்  சமர்ப்பிக்க முடியாமல்  போனதும்  இதற்கு ஒருபடி  மேலே  சென்று  இலங்கையில்  எந்த  பள்ளிவாசலும்  உடைக்கப்படவில்லை  என்று  அறிக்கை  விட்டதுமோ  தெரியவில்லை. இது தான் யதார்த்தம்.

ஆனால் மறைந்த தலைவர் மர்ஹூம் அஷ்ரப் அவர்கள் இல்லை என்றால் சந்திரிக்காவின் அரசாங்கமே இல்லை என்ற ஒரு காலம்  இருந்தது. இப்போது மரம் என்று சொல்லிக்கொண்டு இருப்பவர்கள்   எல்லாம் செடியாக கூட முளைக்காத ஒரு காலம். முஸ்லிம்கள் அஷ்ரபை தூக்கி நிறுத்தினார்கள், அஷ்ரப் அரசாங்கத்தை தாங்கிப்பிடித்தார்.சந்திரிக்காவின் அரசாங்கம் முஸ்லிம்களுக்காக  தலை சாய்த்தது. அஷ்ரப் சாணக்கியத்தால் சாதித்தார்.

இதை நன்றாக  விளங்கிய பேரினவாதிகள்  எந்த ஒரு சிறுபான்மை  கட்சியினதும்   தயவு  தாட்சண்யம் இன்றி  சிங்களவர்களை மையமாக  கொண்ட தனியான அரசாங்கமே  இன  ஒடுக்குமுறைக்கும்  அவர்களின்  நிறுவனமயப்பட்ட  அரசியலுக்கும்  காட்டு  தர்பாருக்கும்  வழி  கோலும்  என்ற உக்தியை  உன்னதமாக  புரிந்து  கொண்டார்கள்  அவர்களின்  சதியால்  முஸ்லிம்  அமைச்சர்கள்  பிரிந்து   சென்றார்கள்.  இதை  இன்றைய  அமைச்சர்கள்   புரிந்து  கொள்ள  வேண்டும். மாற்று  கருத்துகளை  கொண்ட பேரின வாத  கட்சிகள்  கூட  பிரிந்தன.

பிரிந்துசென்ற  எமது  ஒவ்வொரு அமைச்சரும் தன்னை  தலைவனாக வைத்து  ஒரு  புதிய கட்சியை  தொடங்கினார்களே  தவிர  சமூகத்தின்  தலைமைகளை  ஒன்றிணைத்து யாருமே  ஒரு  கட்சியையும் தொடங்கவில்லை  என்பது,  ஒவ்வொருவரும்  சமூக  ஒற்றுமையை  கருத்தில்  கொள்ளாமல்  தமது  அரசியல் இருப்பையே உறுதி  செய்தார்கள்  என்பதற்கு  சான்றாகும். அன்று  அவர்கள்  அவ்வாறு  செய்திருந்தால்  இன்று இவ்வளவு பாரிய  சமூக  அரசியல்  இடைவெளியை  தவிர்த்திருக்கலாம் அவர்களும்  நினைத்தவாறு  வளர்ந்திருக்கலாம்.

அன்றைய தமிழரசு கட்சி மீதும்,  தந்தை  செல்வா  மீதும்    பற்றுக்கொண்டு அரசியல்  பிரவேஷம்  கண்ட  அஷ்ரப்  அவர்கள்  தான் உருவாக்கிய  கட்சிக்கு என்ன  நோக்கத்தில்  தான்  முஸ்லிம்  காங்கிரஸ்  என்று  பெயர் வைத்தார்களோ தெரியவில்லை,இன்றைய  அமைச்சர்கள்  தாங்கள்  உருவாக்கிய ஒவ்வொரு  கட்சிக்கு  பின்னாலும்  காங்கிரஸ்   என்று சேர்த்து  எழுத  பழகிக்கொண்டார்கள்.  

இது ஒரு anti congress phobia ஆக உருவெடுத்து எமது   தந்தைமார்களும்   தாய்மார்களும்  ஏதாவது  ஒரு  காங்கிரசுக்குத்தான்  ஒட்டு போடுவேன்  என்று  ஒற்றைக்காலில்  நிற்கிறார்கள். அவர்களின் அனுபவமுள்ள சிந்தனைக்குள்   அர்த்தங்கள்   இல்லாமல்  இல்லை.  இருக்கின்ற  காங்கிரஸ்களும்   இல்லாம போனால்  ஏற்படப்போகும்  அரசியல் வெற்றிடத்தை இனி எப்போதுமே நிரப்பமுடியாமல்   போய்விடுமோ   என்ற  உள்ளார்ந்த  பயம்  அவர்களை  ஆட்கொண்டிருக்கின்றது. இதுவே  காங்கிரஸ்  ஆதிக்கத்தின்  ஆயுட்காலத்தை  வளர்த்துக்கொண்டு  செல்கின்றது.  

இருக்கின்ற  காங்கிரஸ்களை  இனிமேலும் ஒன்றிணைப்பது சாத்தியம்  இல்லாமல் போனால், முஸ்லிம்களின் வாக்குப்பலம்  இனிமேலும்  பலவீனப்படுமேயானால், முஸ்லிம்களின்  வாக்கு வங்கிகள்  பேரினவாதிகளினால் திட்டமிடப்பட்டு  கொள்ளை அடிக்கப்படுமேயானால், சமூகத்தின்  பல்வேறு  தலைமைகளை  ஒன்றிணைத்த  ஒரு  புதிய  அரசியல்  பிரவேசம் எதிர்காலத்தில்  கண்டிப்பாக   வருவதை யாராலும் தடுக்க  முடியாது.

அதற்கான  தலைமைகளும்  ஆட்பலமும் சிந்தனை பலமும்  சர்வதேச  அரசியல் வழிகாட்டல்களும் எமது  சமூகத்துக்குள் இல்லாமல்  இல்லை. ஆனால்  தாமும் காங்கிரஸ் லேபலுடன்  prado   இல்  வந்து  இறங்குவதையோ  அல்லது மஞ்சள்   கலந்த  பச்சை  மாலையுடன்   பவனி  வருவதையோ  விரும்பாமல்  இன்னும்  அவதானிகள்  அணியில் தொடர்ந்து  இருந்து  கொண்டு  அறிக்கை  எழுதிக்கொண்டு  இருக்கிறார்கள்.   

முஸ்லிம்  சமூகத்துக்கு  அல்லாஹ்   மிக  விரைவில்  வழிகாட்டுவான்  இன்ஷா  அல்லாஹ்...!!!