அமைச்சர் றிசாத் உறக்கத்தில்..?

வடக்கில் மீளக்குடியேறிவரும் முஸ்லிம்கள் மீது தமிழ் அதிகாரிகள் மேற்கொள்ளும் இனவாத வன்முறை குறித்து அமைச்சர் றிசாத் பஸில் ராஜபக்ஸ தொடக்கம் சாதாரண முஸ்லிம் பொதுமகள் வரை தினமும் பேசி வருகின்றனர். அமைச்சர் றிசாத் பதியுதீன்கூட பலவேளைகளில் இந்த தமிழ் அதிகாரிகளின் இனவாத நடவடிக்கைகள் குறித்து பேசியுள்ளார்.

இருந்தும் என்ன பயன்...?

யாழ்ப்பாணத்தில் கிராம சேவையாளராக பணியாற்றிய ஜீனூஸ் தமிழ் அரச உயர் அதிகாரிகளின் இனவாத வன்முறைக்கு காவு கொள்ளப்பட்ட விடயம் அமைச்சர் றிசாத் உட்பல பலரும் அறிந்த விடயம். கிராம சேவையாளர் எதிர்கொண்ட மோசமான தமிழ் இனவாத வன்முறை குறித்த அமைச்சர் றிசாத்தின் கவனத்திற்கும் கொண்டு செல்லப்பட்ட விவகாரத்தையும் எமது இணையம் அறியும்..!

இவ்வாறான நிலையில்  அரசாங்கத்தின் செல்லப்பிள்ளை மற்றும் வடக்கு முஸ்லிம்களின் அதிகப்பட்ச ஆதரவைப் பெற்றவரென கூறப்படும் அமைச்சர் றிசாத், வடக்கு முஸ்லிம்கள் மீது தமிழ் அரச அதிகாரிகள் மேற்கொள்ளும் இனவாத வன்முறையை தடுக்க மேற்கொண்ட முயற்சிகள் என்ன..?

அரசாங்க அமைச்சராக விளங்கும் அமைச்சர் றிசாத், தமிழ் அரச அதிகாரிகளின் முஸ்லிம்கள் மீதான கொடூர வன்முறையை தடுக்க திராணியற்றவராக விளங்குவாராயின் அவர் ஏன் இந்த அரசாங்க அமைச்சுப் பதவியை பிடித்துக்கொண்டிருக்க வேண்டுமென்பது எமக்கு புரியவில்லை.

தமிழ் அரச அதிகாரிகளின் இனவாத ஒடுக்குமுறை, கிறிஸ்தவ மேலாதிக்கம் என வடக்கு முஸ்லிம்கள் மிகமோசமான நெருக்குவாரங்களை எதிர்கொண்டுள்ள நிலையில்  அமைச்சர் றிசாத் பதியுதீன் உறக்கத்தில் உள்ளாரா என்ற சந்தேகம் எமக்கு ஏற்படுகிறது.

வடக்கு முஸ்லிம்கள் பல்வேறு முறைகளிலும் புறக்கணிப்பு உட்படுகிறார்கள் என்ற விடயம் அமைச்சர் றிசாத்திற்கு தெரிந்திருந்தும் அந்த புறக்கணிப்புகளை நிறுத்த அவர் மேற்கொண்ட நகர்வுகளை நாம் இதுவரை அறியவில்லை. வெளிப்படையான தமிழ் இனவாத நடவடிக்கை வடக்கு முஸ்லிம்களை குத்தி காயப்படுத்துகிறபோது அதனை தடுக்க அரசாங்க அமைச்சர் றிசாத்தினால் முடியவில்லை என்றால் அல்லது கண்டும் காணாது போல இருப்பின் எதிர்காலங்களில் வடக்கு முஸ்லிம்கள் தமது தாயகத்தை இழக்கும் அபாய நிலையே உருவாகும்.

ஆளும் அரசாங்கத்தில் முக்கிய அமைச்சுப் பதவியை வகிக்கும் அமைச்சர் றிசாத், வடக்கு முஸ்லிம்களை தமிழ் அரச அதிகாரிகளின் இனவாத வன்முறையிலிருந்தும், கிறிஸ்த்தவ மேலாதிக்கத்திலிருந்தும் பாதுகாக்க தவறுவாராயின் நிச்சயம் அவரை முஸ்லிம் சமூகம் பழிசுமத்தும்.

தனது அதிகாரத்தை பயன்படுத்தி அல்லது அரசாங்கத்தின் உரிய தரப்பினரின் கவனத்தை ஈர்க்க இல்லையேல் அநீதிக்குட்படுத்தப்படும் வடக்கு முஸ்லிம்களுக்கு உரிய நீதியை அவர் பெற்றுக்கொடுக்க முன்வரவேண்டுமென்பதுவே எமது வேண்டுகோள்.

எமது யாழ் முஸ்லிம் இணையத்தின் நீண்டகால வாசகர்களில் அமைச்சர் றிசாத்தும் ஒருவர் என்பதை நாம் அறிவோம். தினமும் எமது இணையத்தை பார்வையிடும் ஒரு அரசியல்வாதி என்பதும் நாம் அறிந்ததே. அந்தவகையில் இதுகுறித்து உரிய நடவடிக்கைகளை விரைவு படுத்துவீர்கள் என நம்புகிறோம்..!