பேஸ்புக்கில் இஸ்லாம் அவமதிப்பு - பங்களாதேஷில் புத்த விகாரைகளுக்கு தீவைப்பு

வங்காள தேசத்தில் புத்த மதத்தை சேர்ந்த ஒருவர் இஸ்லாம் மதத்தை அவமதிக்கும் வகையில் பேஸ்புக் இணையதளத்தில் போட்டோவை வெளியிட்டததை அடுத்து அங்குள்ள முஸ்லீம்கள் கடும் ஆத்திரம் அடைந்தனர். இதை தொடர்ந்து தென் கிழக்கு வங்காள தேசத்தில் துறைமுக நகரமான சிட்ட காங் அருகேயுள்ள ராமு என்ற நகரில் நள்ளிரவில் ஆயிரக்கணக்கான மக்கள் திரண்டனர். 

அங்கிருந்து பேரணியாக சென்று, அப்பகுதியில் உள்ள புத்தர் கோவில்களில் புகுந்து அடித்து நொறுக்கினார்கள். பின்னர் அங்கு தீ வைத்தனர். இச்சம்பவங்களில் 11 கோவில்கள் தீயில் எரிந்து நாசமாயின. 

மேலும், புத்த மதத்தை சேர்ந்த 30க்கும் மேற்பட்டவர்களின் வீடுகளும் சூறையாடப்பட்டன. கும்பல் தாக்க வருவதை அறிந்ததும் வீடுகளில் இருந்தவர்கள் அங்கிருந்து வெளியேறினர். இதனால் உயிர்சேதம் எதுவும் ஏற்படவில்லை. 

இந்த கலவரம் பல மணி நேரம் நடந்தது. எனவே போலீசாரால் கலவரக்காரர்களை அடக்க முடிய வில்லை. அதை தொடர்ந்து எல்லை பாதுகாப்பு படை ராணுவத்தினர் வரவழைக்கப்பட்டனர். அதன் பிறகு தான் நிலைமை கட்டுக்குள் அடங்கியது. தகவல் அறிந்ததும் உள்துறை மந்திரி மகியுதின் கான் ஆலம்கீர் சம்பவம் நடந்த பகுதிகளுக்கு நேரில் சென்றார். தாக்குதலில் ஈடுபட்டவர்கள் மீது கடும் நடவடிக்கை எடுக்கும்படி போலீசாருக்கு உத்தர விட்டார். 

இதற்கிடையே, புத்த மதத்தை சேந்தவர்கள் சிட்டகாங் நகரில் மனித சங்கிலி போரட்டம் நடத்தினார்கள். தாக்குதல் நடத்தியவர்கள் கைது செய்யப்பட்டு அவர்கள் மீது உடனடி நடவடிக்கை எடுக்க வேண்டும். இல்லாவிட்டால் சாகும் வரை உண்ணாவிரதம் இருப்போம் என வங்காளதேச புத்த மத சங்க தலைவர் அனித் ரஞ்சன் பரூபா தெரிவித்துள்ளார்.