முஸ்லிம் காங்கிரஸின் கோரிக்கையை அரசாங்கம் புறக்கணித்துவிட்டது - ஹசன் அலி சீற்றம்

A.A.M.

கிழக்கு மாகாண சபையில் அரசாங்கம் ஆட்சிமைப்பதற்கு பிரதான காரணியாக இருந்த முஸ்லிம் காங்கிரஸின் கோரிக்கை, மாகாதண சபையின் முதல் அமர்விலேயே நிராகரிக்கப்பட்ட விடயமானது தமக்கு பேரதிர்ச்சியளிப்பதாக முஸ்லிம் காங்கிரஸ் செயலாளர் நாயகமும், பாராளுமன்ற உறுப்பினருமான ஹசன் அலி யாழ் முஸ்லிம் இணையத்திடம் தெரிவித்தார்.

தொலைபேசி மூலம் யாழ் முஸ்லிம் இணையத்திற்கு வழங்கிய பிரத்தியேக செவ்வியில் ஹசன் அலி மேலும் குறிப்பிட்டதாவது,

திவிநெகுமே சட்ட மூலம் கிழக்கு மாகாண சபையில் விவாதத்திற்கு எடுத்துக்கொள்ளப்பட முன்னர் அமைச்சர் பஸில் ராஜபக்ஸ என்னுடன் தொடர்புகொண்டார். குறித்த சட்டமூலத்திற்கு முஸ்லிம் காங்கிரஸின் ஆதரவை கோரினார். அதற்கு நான் சட்டமூலம் குறித்து ஆராய்ந்தபின் முஸ்லிம் காங்கிரஸ் தனது முடிவை அறிவிக்கும் என்றேன். அதற்கு அவர் இதுதொடர்பில் தான் அமெரிக்காவிலுள்ள ரவூப் ஹக்கீமுடன் பேசுவதாக குறிப்பிட்டார்.

கட்சியின் தலைவர் ரவூப் ஹக்கீம் திவிநெகுமே சட்டமூலத்தை கிழக்கு மாகாண சபையில் நிறைவேற்ற முன்னர் அதுதொடர்பில் ஆராய வேண்டுமென்றும் எனவே அதற்கு கால அவகாசம் கோர வேண்டுமென்றும் கூறியிருந்தார். கட்சியின் செயலாளர் என்றவகையில் இந்த அறிவித்தலை நான் கிழக்கு மாகாண சபையின் முஸ்லிம் காங்கிரஸ் உறுப்பினர்களுக்கும், கிழக்கு மாகாண சபையின் முஸ்லிம் காங்கிரஸ் குழுத் தலைவர் ஜெமீலுக்கும் அறியப்படுத்தினேன்.

கிழக்கு மாகாண சபையில் திவிநெகுமே சட்டம் நிறைவேற்றப்படாது, அதுதொடர்பில் ஆராய்வோம் என்றும் நாம் எதிர்பார்த்திருந்த நிலையிலேயே அந்த பேரதிர்ச்சி எமது காதுகளை வந்தடைந்தது. கிழக்கு மாகாண சபையில் திவிநெகுமே சட்டமூலமாக்கப்பட்டமை வேதனையளிக்கிறது. முஸ்லிம் சமூகம் அதுதொடர்பில் நியாயமான எதிர்பார்ப்புகளை கொண்டிருந்தது உண்மைதான்.

கிழக்கு மாகாண சபையின் முஸ்லிம் காங்கிரஸ் குழுத்தலைவர் ஜெமீல், முஸ்லிம் காங்கிரஸ் மாகாண உறுப்பினர்களை தவறாக வழிநடாத்தியுள்ளார். இதுதொடர்பில் முஸ்லிம் காங்கிரஸின் மாகாண சபை உறுப்பினர்கள் எம்மிடம் முறையிட்டுள்ளனர். 

மேலும் அரசாங்க உயர்தரப்பினர் சிலர் முஸ்லிம் காங்கிரஸின் கிழக்கு மாகாண சபை உறுப்பினர்களை தவறாக வழிநடத்தியுள்ளனர். அவர்களுக்கு முஸ்லிம் காங்கிரஸின் தலைமை திவிநெகுமே சட்டமூலத்திற்கு ஆதரவளிக்கிறது என்ற பொய்யான தகவல் கூறப்பட்டுள்ளது.  இங்கு ஏதோ சூழ்ச்சி சதித்திட்டம் நடைபெற்றுள்ளது.  எனவே இதுதொடர்பில் பூரண விசாரணைகளை மேற்கொள்ள முஸ்லிம் காங்கிரஸ் தீர்மானித்துள்ளது.

கட்சியின் தலைவர் ரவூப் ஹக்கீம் நாடு திரும்பியவுடன் இதுகுறித்து முழு விசாரணை மேற்கொள்ளப்படும். கட்சியின் தீர்மானங்கள், கட்டுக்கோப்புகள் முக்கியமானவை. இதில் எவரும் தவறாக அல்லது முறைகேடாக நடந்து கொண்டுள்ளார்களா என்பது தொடர்பில் ஆராய்வோம்.

திவிநெகுமே திட்டத்தை முற்றாக எதிர்க்கும் நோக்கத்தை முஸ்லிம் காங்கிரஸ் கொண்டிருக்கவில்லை. அதில் சில சாதகங்களும் உள்ளன. பாதகங்களும் உள்ளன. எனவேதான் அதனை மேலும் ஆராயவேண்டும் என்பதற்காக கால அவகாசம் கோரினோம். ஆனால் எமது கோரிக்கை புறக்கணிக்கப்பட்டு இந்த சட்டமூலம் நிறைவேற்றப்பட்டுள்ளது.

கிழக்கு மாகாண சபையின் முதல் அமர்விலேயே முஸ்லிம் காங்கிரஸின் நியாயமான கோரிக்கை புறக்கணிக்கப்பட்டமையானது பேரதிர்ச்சியை ஏற்படுத்தியுள்ளது. கிழக்கு மாகாண சபையில் அரசாங்கம் ஆட்சியமைப்பதற்கு தலைபோன்று நின்று செயற்பட்ட எமது கட்சி இதுகுறித்து வேதனைப்படுகிறது எனவும் ஹசன் அலி யாழ் முஸ்லிம் இணையத்திற்கு வழங்கிய சிறப்புச் செவ்வியில் குறிப்பிட்டார்.