உங்கள் சம்பளம் எப்படி...?

எவ்வளவு சம்பளம் வாங்கினாலும், சக ஊழியரைவிட சற்று அதிகமாக சம்பளம் இருந்தால்தான் மகிழ்ச்சியும், மனநிறைவும் ஏற்படுவதாக புதிய ஆய்வில் தெரிய வந்துள்ளது.

மேலும் அந்த ஆய்வில், நாம் பெறக்கூடிய சம்பளத்தால் மகிழ்ச்சி பெற்றாலும், சக ஊழியர்கள் சற்று அதிக சம்பளம் பெறும்போது, வேலை செய்யும் இடங்களில் மகிழ்ச்சியை இழக்க நேரிடுகிறது என்று குறிப்பிடப்பட்டுள்ளது.

லண்டனைச் சேர்ந்த பல்கலைக்கழக பேராசிரியர் எஜுஏர்டு பெரேஸ் அசென்ஜோ நடத்திய ஆய்வில் மேற்கண்ட தகவலை குறிப்பிட்டுள்ளார்.

இதுபற்றி அசென்ஜோ கூறியதாவது: உறவினர்கள் அதிகமாக சம்பாதிக்கும்போது, அதைப் பார்த்து நமது சந்தோஷமும், வேலை பார்க்கும் இடங்களில் பணித்திறனும் குறைகிறது. இதற்காக அதிக நேரம் உழைத்து, அவர்களைவிட அதிகமாகவோ அல்லது இணையாகவோ சம்பாதிக்க வேண்டும் என்று நினைக்கின்றனர்.

இது சமூகத்தில் உள்ள அனைத்து தரப்பினரின் பொதுவான கருத்தாக உள்ளது. மேலும், சம்பள விஷயத்தில் மகிழ்ச்சியாக இல்லாத ஒருவரைவிட, மகிழ்ச்சியாக இருப்பவர் பணித்திறனில் ஆற்றலை அதிகமாக வெளிப்படுத்துகிறார் என்றார் அசென்ஜோ.