மரமாக இல்லாத மரக் கட்சித் தலைவர்...!

அபூஹிமா

மனிதன் மனிதன்தான் , அவன் எவ்வளவு புனிதனாக இருந்தாலும் சாதாரண மனிதப் பலவீனங்கள் எல்லோருக்கும் இருப்பது இயற்கையே. இந்தப் பலவீனங்களிலேயே மிகப் பெரும் பவீனந்தான் கோபம், ஆத்திரம் என்பன. உயிரினங்களிலேயே கோபம் என்பதை வெளிக்காட்டாத ஒரே இனம் தாவர இனமாகத்தான் இருக்கும். ஆனால் இன்றைய விஞ்ஞானம் அதனையும் இல்லை என்றே சொல்லும்.

உணர்வுகளே அற்ற ஒருவனை குறிக்க "அவனொரு மரம்" என்கிற வார்த்தைப் பிரயோகம் கையாளப்படுகிறது. இதனை எல்லாம் ஏன் சொல்கிறேன் என்றால் முஸ்லிம் காங்கிரஸ் தலைவர் தான் ஒரு மரம்  இல்லை என்பதை மீண்டும் ஒரு தடவை நிரூபித்திருக்கிறார் என்பதனால்தான்.

நமது சமுகம் மூன்று விதமான அரசியல் தலைமைகளை கொண்டுள்ளது .    (மார்க்கத் தலைமைகளிலும் இந்த மூன்று விதங்கள் உண்டு)

முதலாவது வகை - சமூகம் பாதிக்கப்படும் சந்தர்ப்பங்களில் எல்லாம் சீறி எழுவது.

இரண்டாவது வகை - சமூகத்திற்கு என்ன நேர்ந்தாலும் தான் சேர்ந்திருக்கும் அரசுக்கு காவடி தூக்கும் வழக்கில் வளர்ந்தது.

மூன்றாவது வகை - பற்றி எரிந்தாலும் பரவாயில்லை என்று மவுனமாக இருக்கும் (மரங்கள்) ஜடங்கள்.

அண்மையில் தொடங்கி நடந்துவரும் பள்ளிவாயல்கள் சார்ந்த பிரச்சினையில் இந்த மூன்று விதமான அரசியல் பிரகிருதிகளையும்  நாம் தெளிவாகக் கண்டுள்ளோம் .  அவர்கள் யார் யார் என்பதை நான் இங்கு பட்டியல் போடத்தேவையே இல்லை. சமூகம் இவர்களை நன்றாகவே எடை போட்டு வைத்திருக்கிறது.

முஸ்லிம் காங்கிரஸ் தலைவர் "முதலாவது வகை" என்பது என் கணிப்பீடு. பெரும்பாலானவர்கள் இதில் முரண்பட மாட்டார்கள் என்று எண்ணுகிறேன்.

மாவனல்லை இனக்கலவரம்  தொடங்கி இன்றைய தம்புள்ளை... வரை உரத்துப் பேசிய ஒரே ஒரு தலைமை என்றால் அது ஹகீம் என்பதில் மாற்றுக் கருத்திருக்காது. இன்னும் ஓரிரு அரசியல் வாதிகள் இது விடயத்தில் சமூகப் பிரக்ஞயுடன் கதைத்திருக்கிறார்கள்தான். ஆனால் எவரும் ஹகீம் போல துணிவோடு பேசவில்லை.

மாவனல்லை விவகாரத்தில் ஹகீம் எடுத்த துணிவான முடிவு ஆட்சியையே மாற்றி சரித்திரம் படைத்தது நம் எல்லோருக்கும் தெரியும்.  (வாசகர்கள் என்னை, நான் என்னமோ "ஹகீம் புராணம்" எழுதுவதாக தப்பாக எண்ணி விடாதீர்கள். உண்மைகளை உண்மைகளாக எழுதும் போது இது தவிர்க்கமுடியாததாகிவிடுகிறது. அதற்காக என்னை மன்னியுங்கள்)

சரி... பழைய புராணத்தை விட்டு விட்டு இப்போது கதைக்கு வருகிறேன்..

"சீறிப் பாய்ந்த ஹகீம் பெட்டிப் பாம்பாய் அடங்கிவிட்டார்" என்று சில அரசியல் வியாபாரிகள் நேற்று முதல் அறிக்கை விட ஆரம்பித்துள்ளார்கள். ஆனாலும் மகிந்தையின் மகுடிக்கு ஆடாத பாம்பாக இன்னும் ஹகீம் இருக்கிறார் என்பதை இன்று சக்தி, சிரச இரவுச் செய்திகளில் காணக் கிடைத்தபோது சந்தோசமாக இருந்தது. அந்த உணர்வின் வெளிப்பாடாகத்தான் இந்த இரவில் உட்கார்ந்து இதனை தட்டச்சு செய்து கொண்டிருக்கிறேன்.

சாய்ந்தமருது கூட்டத்தில் ஹகீம் "காவியுடை பயங்கரவாதத்தை ஜனாதிபதி கட்டுப்படுத்தியாக வேண்டும்" என்று சொன்னதை முதலில் பெரிது படுத்தியவர்கள் நமது பைசர் முஸ்தபாவும், அஸ்வருந்தான். முதலாமவரின் பத்திரிகை அறிக்கையும், இரண்டாமவரின் பாராளுமன்ற உரையும் ஹகீம் சொன்னதன் உண்மையான அர்த்தத்தை பூதாகரமாக மாற்றிவிட்டன.

சும்மா கிடந்த சங்கை இவர்கள் இருவரும் ஊதிக் கிளப்பிய சப்தத்தில் தூங்கிக்கொண்டிருந்த "ஹெலஉறுமய" விழித்துக் கொண்டது. கர்ச்சிக்கக்கத் தயாரான சிங்கத்தை ஹகீம் மிகவும் சாதுரியமாக தடவிக்கொடுத்து சமாளித்தது அவரின் அரசியல் முதிர்வையும், அஷ்ரபிடம் கற்ற சாணக்கியத்தையும் தெளிவாக வெளிப்படுத்துகின்றது.

 

தம்புள்ளை... தெஹிவளை... குருனாகல்... ஜபல் மலை... என்கிற தொடர் கதையால் உண்டாகும் விளைவுகளை முழு முஸ்லிம் சமூகமுமே விமர்சித்துக்கொண்டும், பீதியோடு பார்த்துக் கொண்டும் இருக்கும் நிலையில், நேரடியாகவே இந்த சம்பவங்கள் அனைத்திலும் சம்பந்தப் பட்டிருக்கும் துறவிகளை ஹகீம் பயங்கரவாதிகள் என்று சொன்னதை நம்மட நம்ரூதுகள் பிழை கண்டது அவர்களின் சொந்த அரசியல் நலனுக்காகத்தான்.

ஹகீம் இனவாதம் பேசி, மக்களை பிழையாக வழி நடாத்தி வாக்குவேட்டை ஆடுகிறார் என்கிற இவர்கள், இவர்களின் எஜமானர்களுக்கு பெற்றுக் கொடுக்க இருக்கிற  கொஞ்ச நஞ்ச முஸ்லிம் வாக்குகளும் கை நழுவுகிறதே என்கிற, வெறுங்கையால் வேட்டை ஆட நேருகிற அவலத்தை மறைப்பதற்கே இப்படி துள்ளினார்கள் என்பதுதான் உண்மை.

ஆடையே இல்லாத அவர்களின் கோவணம் கூட கழன்று விழும்போது அலறித் துடிப்பது ஒரு சாதாரண நிகழ்வுதான்.

ஹெல உறுமய ஒன்றும் முட்டாள்களின் கூட்டமல்ல. ஹகீம் ஏன் சொன்னார், எதற்குச் சொன்னார், எவர்களை சுட்டிச் சொன்னார் என்பதெல்லாம் அவர்களுக்குத் தெரியும். அவர்களும் அம்பாறை தேர்தல் மாவட்டத்துள் வருகிற "தெஹியத்தகண்டிய" என்கிற சிங்கள பிரதேசத்தில் முஸ்லிம் காங்கிரஸ் வேரூன்றுவதை தடுக்க இதனை ஆயுதமாக்கினார்கள் என்கிற ரகசியம் நம்முள் பலருக்குத் தெரியாது.

இதுவரை நான் குறிப்பிடாத இன்னும் இருவரும் இந்த நாடகத்தில் துணை நடிகர்களாக இருக்கிறார்கள். ஒருவர் அரசியல் ஜோக்கர் முபாரக் மவுலவி, மற்றவர் உண்மையாகவே சமூகப் பற்றுடன் இயங்கும் முஜிபுர்ரஹ்மான் ஆகியோர்.

முஸ்லிம் காங்கிரசின் குட்டையில் மீன் பிடிக்க இவர்கள் கொண்டுபோன தூண்டிலில் உள்ள புழுவையும் ஹகீம் கைப்பற்றுவதை கண்டு அலறிய அலறலே அது அல்லாமல் வேறல்ல. (ஹக்கீமை விடவும் காரசாரமாக கதைக்கிற முஜிபுர் ரஹ்மான் ஹக்கீமை பிழை காண்பதில் எந்த நியாயத்தையும் காண முடியாதுள்ளது)

அது சரியப்பா... சீறிப்பாய்ந்த ஹகீம் ஏன் பெட்டிப்பாம்பானார்..? என்று நீங்கள் கேட்க நினைப்பது புரிகிறது.

நான் ஏற்கனவே குறிப்பிட்டவர்கள் கிளப்பிய கதறலில் விழித்துக்கொண்ட ஹெல உறுமய தனது அஜென்டாவை பயன்படுத்த இதனை சரியான சந்தர்ப்பமாக்கிக் கொண்டு ஒரு கலவரத்தை உண்டாக்கிவிடக்கூடாது. அதற்கு இடமளித்த பழியை சுமந்து வாழ் நாள் முழுவதும் அழுவது மட்டுமன்றி, வரலாற்றிலும் தான் ஒரு வடுவாக இருந்து விடக் கூடாது என்கிற மிகவும் புத்தி சாதுர்யமான முடிவின் காரணத்தால்தான், சும்மா இழுத்தடித்து , வீண் வம்பு வளர இடங்கொடாமல், தன்னுடைய சுய கௌவுரவத்தை பெரிதாக நினையாது, இந்த "மன்னிப்பு கேட்கிறேன்" என்கிற மிகப் பெரும் ஞானிகளின் மனப்பக்குவத்தை ஹகீம் வெளிப்படுத்தி இருக்கிறார்.

இந்த மிகப்பெரிய உண்மையை " சின்னத் தனமாக "விமர்சிக்கிற அறிவிலிகளை நாம் பொருட்படுத்த வேண்டிய அவசியம் இல்லை.

"மன்னிப்புக் கேட்கிறேன்" என்கிற அவரின் அறிக்கை ஆங்கிலத்தில் மட்டுமே வெளியிடப்பட்டிருக்கிறது. ஒவ்வொரு தமிழ் பத்திரிகைகளும் அதனை அவர்களின் பார்வையில் மொழிபெயர்ர்த்து வெளியிட்டுள்ளன என்பதும் இங்கு கவனிக்கவேண்டிய ஒன்றாகும். அதன் அசல் ஆங்கில அறிக்கையில் அவர் மறைமுகமாக "சில பௌத்த குருமார்கள் செய்கிற இந்த பயங்கர வாதத்திற்காக நான் ஒட்டுமொத்த துறவிகளையும் குற்றம் சாட்டி விட்டதற்காக வருந்துகிறேன்" என்பதனையே சூசகமாக சொல்லி இருக்கிறார். அது உண்மைதானே..!

கடைசியாக நான் சொல்ல விரும்புவது, ஹக்கீமின் அரசியல் விரோதிகள் இன்று அவரை விமர்சிக்கும் அதே வார்த்தைகளைத்தான்.

ஆம்.. ஹகீம் பெட்டிப் பாம்புதான், அது சீறிப் பாயும் என்கிற நம்பிக்கையை நேற்றும் இன்றும் நடந்த மக்கள் சந்திப்புகளில் அவர் வெளிப்படுத்தி இருக்கிறார்.

முஸ்லிம் காங்கிரசில் பெட்டிப் பாம்புகளாவது இருக்கின்றன. அரசில் இணைந்து கேட்கிற கட்சிகளிலும், ஆளும் கட்சியிலும் "பல்லுப் பிடுங்கின பாம்புகள் " அல்லவா இருக்கின்றன. 

ஓட்டுப் போடுறது...!

பெட்டிப் பாம்புகளுக்கா...?

பல்லுப் பிடுங்கின பாம்புகளுக்கா...??

என்பதை முடிவு செய்யுங்கள்..!!