தமிழ் ஊடகங்களின் இருட்டடிப்பு - முஸ்லிம்கள் இனியாவது சிந்திப்பார்களா..??

உம்மா

நாட்டில் பல்வேறு பகுதிகளிலும் வெள்ளிக்கிழமை 27-07-2012 அன்று முஸ்லிம்கள் அமைதியான ஆர்ப்பாட்டத்தில் ஈடுபட்டனர். இந்த ஆர்ப்பாட்டத்திற்கான அழைப்பை சிறிலங்கா முஸ்லிம் கவுன்சில் விடுத்திருந்தது. அகில இலங்கை ஜம்மியத்துல் உலமா சபை இந்த ஆர்பாட்டத்திற்கு தமது ஆதரவையும் வெளிப்படுத்தியிருந்தது.

வடக்கு முஸ்லிம்களுக்கு அநீதி இழைக்கப்படுவதாகவும், மன்னார் உப்புக்குளத்தில் பாதிக்கப்பட்ட முஸ்லிம்களுக்கு நீதி பெற்றுக்கொடுக்கப்பட வேண்டுமென வலியுறுத்தியே இந்த ஆர்ப்பாட்டங்கள் நடைபெற்றிருந்தன. இந்த ஆர்ப்பாட்டத்தில் கலந்துகொண்ட முஸ்லிம்கள் சார்பில் ஜனாதிபதி செயலகத்தில் மகஜர் ஒன்றும் கையளிக்கப்பட்டுள்ளது.

நாட்டில் முஸ்லிம்கள் பரவலாக வசிக்கும் பகுதிகளில் நடைபெற்ற இந்த ஆர்ப்பாட்டம் பற்றிய செய்திகள், புகைப்படங்களை பிரசுரிப்பதிலிருந்து தமிழ் ஊடகங்கள் பின்வாங்கிவிட்டன. அநேகமான தமிழ் ஊடகங்களுக்கு இவ்வாறான ஒரு ஆர்ப்பாட்டம் நடைபெற்றது என்ற செய்தியை பதிவிடுவதற்கு மனம் வரவேயில்லை.

குறிப்பாக தமிழ் இணைய ஊடகங்கள் இந்த ஆர்ப்பாட்டதை கண்டு கொள்ளவேயில்லை. ஒரு தமிழ் ஊடகம் அமைச்சர் றிசாத் பதியுதீனுக்கு ஆதரவான இந்த ஆர்ப்பாட்டத்தில் 1000 பேர் கலந்துகொள்ளவிருப்பதாக ஆர்ப்பாட்டம் நடைபெறுவதற்கு முன்னமே செய்தி வெளியிட்டு அற்ப திருப்தியை பெற்றுக்கொண்டது.

இங்கு வேதனை என்னவென்றால் முஸ்லிம் வாசகர்களை அதிகமாக கொண்டுள்ள சில தமிழ் இணைய ஊடகங்கள் முஸ்லிம்கள் மேற்கொண்ட இந்த ஆர்ப்பாட்ட செய்தியை திட்டமிட்டே மறைத்துவிட்டன. ஆனால் எமது முஸ்லிம் சமூகத்தின் துரதிஷ்டம் என்னவென்றால் இந்த தமிழ் ஊடகங்களைத்தான் நம்மவர்கள் அதிகம் பார்ப்பது...!

இதில் மகா கொடுமை என்னவென்றால் இலங்கை முஸ்லிம்களுக்கு எதிராக திட்டமிட்ட இனவாத செய்திகளை பதிவிடும் தமிழ் இணையங்களுடைய பேஸ்புக் பக்கத்தை தமது முகங்களைக் கொண்டு அலங்கரிப்பவர்கள் முஸ்லிம்கள்தான். ஒரு தமிழ் இணைய ஊடக பேஸ்புக் பக்கத்தில் இன்று வெள்ளிக்கிழமை ஒருவரை காணமுடிந்தது. இஸ்லாமிய கலாபீடமொன்றில் கற்றுத்தேர்ந்த அவரும் சிரித்துக்கொண்டே அந்த பேஸ்புக்கில் இடம்பெற்றிருந்தார்.

இவ்வளவுக்கும் அந்த தமிழ் ஊடகம்தான் வெளிநாட்டிலுள்ள தமிழர்களுக்கு நமது முஸ்லிம்கள் பற்றி தவறான தகவல்கள் வழங்குவதில் முதல் நிலையில் உள்ளது. முஸ்லிம்களை எப்போதுமே மோசமாக சித்திகரிப்பதிலும், போராளி இயக்கங்களை இஸ்லாமிய பங்கரவாதிகள் என்று அழைப்பதிலும் அந்த தமிழ் இணைய ஊடகத்திற்கு அவ்வளவு பிரியம்.

உண்மையில் இவ்வாறு பல சம்பவங்கள் உள்ளன. நமது முஸ்லிம் உறவுகள் ஏன் இவ்வளவுதூரம் இந்த தமிழ் இணைய ஊடகங்களுக்கு அடிமைப்பட்டு, முஸ்லிம்களுக்கு எதிராக அந்த தமிழ் ஊடகங்கள் வெளியிடும் செய்திகைள ஜீரணித்தவர்களாக எப்படி ஜடங்களாக இருக்கிறார்கள் என்பதை சிந்திக்கையில் கவலை மாத்திரம்தான் மிஞ்சிநிற்கிறது.

முஸ்லிம்களுக்கு எதிராக தமிழ் ஊடகங்கள் இவ்வாறு பாரபட்சம் காட்டுவது இது முதற்தடவையல்ல. இதற்கு முன்னரும் இவ்வாறு பல சம்பவங்கள் நடைபெற்றுள்ளன. இருந்தபோதும் எமது கவலையெல்லாம் நமது முஸ்லிம்கள் பற்றித்தான் உள்ளது.

முஸ்லிம்கள் இந்த தமிழ் இணைய ஊடகங்களுடைய பேஸ்புக்கில் தலைகாட்டாமல் இருந்தாலே அதுவே நமது முஸ்லிம் சமூகுத்திற்கு செய்யும் பெரிய உபகாரமாக அமையும். தமிழ் இணைய ஊடகங்களை பார்க்க வேண்டாமென்று நாம் கூறவரவில்லை. மாற்றமாக அந்த தமிழ் இணைய ஊடகங்களின் பேஸ்புக் பக்கம் சென்று லைக் 'like' செய்யாதீர்கள் என்றுதான் நாம் கூறுகிறோம். இதனை சற்று ஆழமாக சிந்தித்துப் பாருங்கள் இதற்குள் பல நூறு அர்த்தங்கள் அடங்கியிருப்பதை ஒப்புக்கொள்வீர்கள்..!

சில முஸ்லிம் ஊடகவியலாளர்களிடமிருந்து நாம் பெற்றுக்கொண்ட தகவலின் அடிப்படையின்படி தமிழ் ஊடகங்கள் முஸ்லிம்கள் வெள்ளிக்கிழமை மேற்கொண்ட ஆர்ப்பாட்டம் பற்றிய செய்திகளை திட்டமிட்டே இருட்டடிப்புச் செய்துள்ளார்கள். தமிழ் ஊடகங்களில் பணியாற்றும் முஸ்லிம் ஊடகவியலாளர்கள் இதை உறுதிப்படுத்தியுமுள்ளனர்.

அந்தவகையில் தமிழ் இணைய ஊடகங்களுடைய பேஸ்புக் பக்கத்தில் லைக் 'like' செய்துள்ள நமது முஸ்லிம் உறவுகளே இனியாவது சிந்தித்து செயற்படுங்கள்..!