அழகை சிதைப்பதற்காக மனைவியின் மூக்கை வெட்டிய கணவன்

பாகிஸ்தானில் உள்ள தாத்ரா பாராளுமன்ற மலை பகுதியை சேர்ந்தவர் அலாராக்கி (51). இவருக்கு 13 வயதில் திருமணம் நடந்தது. அப்போது இவர் மிகவும் அழகாக இருப்பார்.

இவர் தனது 19 வயதில் ஒருநாள் கணவரிடம் அனுமதி பெறாமல் வெளியே சென்றார். இதை அறிந்த அவரது கணவர் தேடி சென்றார். அப்போது தனது தோழிகளுடன் ராக்கி வீடு திரும்பி கொண்டிருந்தார். அவரை பார்த்ததும் ஆத்திரம் அடைந்த கணவர் தான் வைத்திருந்த கத்தியால் ராக்கியின் மூக்கை அறுத்தார்.

மேலும், இனி நீ அழகாக இருக்கக்கூடாது என்று கூச்சலிட்டார். மூக்கு அறுபட்டு துண்டானதும் ரத்த வெள்ளத்தில் ராக்கி துடித்தார். இருந்தும் வீட்டிற்கு இழுத்து வந்த கணவர் அவரது காலில் சாட்டையால் அடித்து கொடுமைப்படுத்தினார்.

அழகாக இருப்பதால்தானே என்னை மதிக்காமல் நீ தனியாக வெளியே சென்று வந்தாய். எனவேதான் உனது அழகான மூக்கை அறுத்து முகத்தை அசிங்கப்படுத்தினேன். இனி வெளியே செல்லாமல் வீட்டிற்குள்ளேயே அடங்கி கிடக்க வேண்டியதுதான் என ஆவேசமாக கத்தினார்.

அதில், இருந்து ராக்கி அவமானத்தால் கூனி குறுகி பெரும்பாலான நேரம் வீட்டிற்குள்ளேயே முடங்கி கிடந்தார். வெளியில் செல்லும்போது பர்தாவுக்குள் தனது முகத்தை மறைத்து வந்தார். இப்படியே 32 ஆண்டுகள் கழிந்தது.

இந்த நிலையில், கடந்த மார்ச் மாதம் ஒரு டாக்டரை சந்தித்தார். அப்போது அவர் ஆபரேசன் மூலம் அவர் இழந்த மூக்கை சீரமைக்கலாம் என ஆலோசனை வழங்கினார். அதை தொடர்ந்து, அவரது விலா எலும்பு பகுதியில் இருந்து தசையை எடுத்து அறுப்பட்ட மூக்கை சீரமைத்தார்.

இதையடுத்து 32 ஆண்டு களுக்கு பிறகு அறுப்பட்ட தனது மூக்கு மீண்டும் கிடைத்ததை கண்ணாடியில் பார்த்த ராக்கி மகிழ்ச்சி அடைந்தார். இதற்கிடையே, அவரது மூக்கை அறுத்த கணவருக்கு கோர்ட்டில் பெரிய தண்டனை எதுவும் வழங்கவில்லை. 10 மாதம் மட்டுமே அவர் ஜெயிலில் அடைக்கப்பட்டார். மேலும் அவரது மூக்கை சீரமைக்க தேவைப்படும் பணத்தை கொடுக்கவும் கோர்ட்டு உத்தரவிட்டிருந்தது. அதையும் அவர் கொடுக்கவில்லை.