கொழும்பிலுள்ள கட்டார் தூதரகம் குறித்து கவலை தெரிவிப்பு

ஜே.வஹாப்தீன்

 கட்டார் தூதரகத்துக்குச் செலும் மக்கள் அனைவருக்கும் திருப்திகரமாகவும், உடனடியானகவும் தேவைகள் நிறைவேற்றப்படுவதில்லை என ஒலுவில் உலமா சபைத்தலைவர் தெரிவித்துள்ளார். இலங்கைக்கான கட்டார் தூதரகத்தின் கொன்சியுலர் பிரிவு பல சேவைகளை செய்து வருகின்றது. நாளாந்தம் மக்கள் அங்கு சென்று தங்களது வேலைகளை பூர்த்திசெய்து வருகின்றார்கள். கட்டார் தூதரக்த்திற்காக அங்கு ஒன்றுசேரும் மக்களின் தொகை நாளாந்தம் அதிகரித்த வண்ணமே உள்ளன. கட்டார் தூதுவராலயத்தின் தூதுவருக்கு ஒலுவில் ஜம்மியத்துல் உலமா சபைத்தலைவரும், அகில இலங்கை சமாதான நீதவானுமாகிய அஷ்ஷேக் எம்.எல்.பைசல் மௌலவி ஒப்பமிடப்பட்ட கடிதமொன்று அனுப்பி வைக்கப்பட்டுள்ளது. அக்கடிதத்தில் குறிப்பிடப்பட்டுள்தாவது;

‘மக்களின் தேவைகளை பூர்த்திசெய்து கொடுப்பதில் இலங்கைக்கான கட்டார் தூதரகம் சிறப்பாக செயற்பட்டாலும் பல குறைகளை எம்மால் காணமுடிகின்றது. அங்கு தேவைகளை நிறைவேற்றச்செல்லும் மக்கள் சார்பாக பின்வரும் விடயங்களை தெரிவித்துக் கொள்கிறேன். உரியவர்கள் இதனை கவனத்திற்கொள்ள வேண்டும் என எதிர்பார்க்கிறேன்.
 நாளாந்தம் 750 – 1000 உட்பட்ட மக்கள் அங்கு செல்கின்றார்கள். ஆனால். 100 – 150க்கு இடைப்பட்ட மக்களின் தேவைகளே பூர்த்தி செய்யப்படுகின்றன.

மீதி மக்கள் அங்கு அலைகிறார்கள். நீண்ட தூரங்களில் இருந்து வருகின்றவர்கள் விரிப்புக்களை கொண்டுவந்து அடுத்தநாள் முதல் இடத்தினை பெறுவதற்காக பாதை ஓரங்களில் அமர்ந்து கொள்கின்றார்கள். காலை 2.30 மணிக்கு முன்பாக மக்கள் தங்களுக்குள் வரிசையாக நின்று இலக்கங்களை பெற்று காத்துக்கொண்டு நிற்கிறார்கள். அவ்வாறு காத்துக்கொண்டு நிற்கும் மக்களுக்கு கூட அடுத்த நாள் வேலையினை பூர்த்திசெய்ய முடியாமல் போகின்றது.

காலை 9 – 11.30 மணிவரை தங்களது வேலைகளை ஆரம்பிக்கும் அப்பிரிவு ஒரே ஒரு கரும பீடத்தினையே வைத்துகொண்டு தஸ்தாவேஜுகளை பெறுகின்றது. 150க்கு மேல் இலக்கங்களை தனக்காக ஆக்கிக் கொண்டவர்கள் 11.30 மணியுடன் திருப்பி அனுப்பப்படுகின்றார்கள். அங்கு வரிசையில் நீண்ட நேரம் மக்கள் காத்துக்கொண்டு இருப்பது மிகவும் கவலையையும் அசௌகரியங்களையும் ஏற்படுத்துகின்றது. மனிதன் என்ற வகையில் அவனுக்கான கௌரவம் அங்கு பேணப்படுவதில்லை. அவனது இயற்கை தேவைகளைக்கூட நிறை வேற்ற எவ்வித வசதியும் அங்கு கிடையாது.

அதிகமான மக்கள் நீண்டதூரம் இருந்து வருபவர்கள் கொழும்பை பற்றி அதிகம் தெரியாதவர்கள், வாழ்க்கையில் மிகுந்த வேதனைகளை அனுபவித்தவர்கள் ஒரு வேலைக்காக கட்டார் செல்ல தங்களது ஆவணங்களை உறுதி செய்ய வருபவர்கள் அவர்களில் அதிகம் ஒரு நாளைக்குள் அவ்வேலை முடிபடாதால் கடன் ட்டு பிரயாணமானவர்கள் கஷ்டப்பட்டவர்கள் செய்வதறியாது தடுமாறுகின்றனர், மனச் சஞ்சலத்துக்கு உட்படுகின்றனர். கட்டார் தூதரகத்துக்குப் பொறுப்பானவர்களே நீங்கள் இதனை கவனிக்கமாட்டீர்களா? மக்களுக்கு இலகுத் தன்மையினை ஏற்படுத்தி கொடுக்கமாட்டீர்களா?

நீண்ட வரிசையில் மக்கள் நீண்ட நேரம் நிற்கின்றார்களே அவர்களின் மனநிலையை நீங்கள் அறியவில்லையா? 6,7 மணித்தியாலங்களாக நின்ற நிலையில் பாதையின் ஓரங்களில் நிற்கிறார்களே இவர்களின் உரிமைகளை நீங்கள் நினைத்து பார்த்தீர்களா? ஏன் உங்களால் தேவையான கரும பீடங்களை உருவாக்கி சகலரின் தேவைகளையும் துரிதமாக நிறைவேற்றிக் கொடுக்க முயற்சிக்க முடியாது? காத்திருக்கும் மக்கள் அமர்ந்து கொள்வதற்கு வசதி வாய்ப்புகளை உருவாக்கலாமே.

மக்கள் பணம் செலுத்தியே தேவைகளைப் பூர்த்தி செய்கிறார்கள் எனவே உரிய கௌரவம் அவர்களுக்கு கொடுக்கப்படல் வேண்டும் அல்லவா? மேற்படி விடயங்களை கவனத்திற் கொண்டு மக்களுக்கு இலகுத் தன்மையை பெற்றுக் கொடுக்குமாறு அம்மக்களின் சார்பாக இதனை முன்வைக்கிறேன்’ என்று அக்கடிதத்தில் குறிப்பிடப்பட்டுள்ளது.