தமிழ் ஊடகங்களின் கவனத்திற்கு..! - முஸ்லிம்கள் சகலரும் குற்றவாளிகள் அல்ல..!!

யாழ் முஸ்லிம் இணையமானது இலங்கை பத்திரிகை ஆசிரியர் சங்கத்தின் ஊடகத்துறையினருக்கான தொழில்சார் ஒழுக்கக் கோவையின் அடிப்படையிலும், ஊடக அமைப்புக்களின் ஆலோசனைகளையும் கவனத்திற்கொண்டு முஸ்லிம் சமூகம் சார்பில் செயற்பட்டுவருகிறது.

தொழில்சார் ஊடகக் கல்வி, ஊடகத்துறை அனுபவம், மூத்த ஊடகவியலாளர்களின் வழிகாட்டுதல், சகோதர ஊடகவியலாளர்களின் ஒத்துழைப்பு, பரஸ்பர புரிந்துணர்வு, வாசகர்களின் பெரு ஆதரவுக்கு மத்தியிலும் யாழ் முஸ்லிம் இணையம் இயங்கிவருகிறது.

அந்தவகையில் அண்மைய சில நாட்களாக தமிழ் ஊடகங்களின் பார்வை இலங்கை முஸ்லிம் சமூகத்தின் மீது திரும்பியுள்ளதை நாம் நோக்க முடிகிறது. சமூகம் சார்ந்தியங்கும் ஒரு ஊடகம் என்றவகையில் சில விடயங்களை இங்கு பகிர்ந்துகொள்ள விரும்புகிறோம்.

யாழ்ப்பாணத்தில் அண்மையில் ''வலதுகுறைந்த தமிழ் சகோதரி ஒருவரை பாலியல் பலாத்காரம் செய்ய முயன்ற முஸ்லிம் இளைஞர்கள்'', ''யாழ்ப்பாணத்திலிருந்து தமிழ் சிறுவனை கடத்தி மதமாற்றம் செய்த முஸ்லிம்கள்'' என்ற அடிப்படையில் தமிழ் ஊடகங்கள் செய்திகளை பதிவிட்டிருந்தன.

இந்த செய்திகளின் அடிப்படையை நோக்கும் போது அனைத்து யாழ்ப்பாண முஸ்லிம்களையும் குற்றவாளிகளாக நோக்கும் ஒருபோக்கு காணப்படுகிறது. ஊடக தர்மத்தின் அடிப்படையில் செய்திகளை பதிவிடும் போது குற்றத்துடன் தொடர்புடைய நபரை அவர் சார்ந்த சமூகத்துடன் சுட்டிக்காட்டுவது தவறானது.

இவ்வாறான செயற்பாடுகள் சமூகங்களுக்கிடையேயான நல்லிணக்கத்திற்கு வேட்டு வைப்பதாக அமைந்துவிடும். உள்நாட்டு போர் காரணமாக கடந்த 30 வருடங்களுக்கும் மேலாக நிம்மதியை தொலைத்துவிட்டு அலையும் நமது சமூகங்களுக்கிடையே தற்போது அவசரமாக தேவைப்படுவது இனநல்லிணக்கமே.

யாழ்ப்பாணத்தில் வலதுகுறைந்த சகோதரி மீது மேற்கொள்ளப்பட்ட பாலியல் பலாத்காரத்தை யாழ் முஸ்லிம் சமூகத்தின் சார்பில் யாழ் முஸ்லிம் இணையம் கண்டிக்கிறது. சம்பந்தப்பட்ட அந்த பெண்ணிடமும், அவர்களின் குடும்பத்திடமும் யாழ் முஸ்லிம் சமூகத்தின் சார்பில் மன்னிப்பு கேட்டுநிற்கிறோம். அந்த சம்பவத்துடன் தொடர்புடையவர்கள் சட்டத்தின்முன் நிறுத்தப்பட்டு உரிய தண்டனையும் வழங்கப்படவேண்டும் என்பதே எமது தெளிவான நிலைப்பாடு.

அதேவேளை ஒருவர் அல்லது இரு முஸ்லிம்கள் செய்யும் தவறுகளுக்கு மொத்த முஸ்லிம் சமூகத்தையும் குற்றவாளியாக நோக்கும் தமிழ் ஊடகச் செயற்பாடுதான் முஸ்லிம்கள கவலைகொள்ளச் செய்துள்ளது. குறிப்பாக தமிழ் இணைய ஊடகங்கள் சட்டத்தை தம் கையிலெடுத்து முஸ்லிம் சமூகத்தை குற்றவாளி கூண்டில் நிறுத்துவதற்கு முற்பட்டுள்ளமை எந்தவகையிலும் நியாயப்படுத்தமுடியாத ஒரு அசிங்கம் நிறைந்த செயற்பாடாகும்.

22 வருட துயர்மிகு இடப்பெயர்வின் பின்னர் யாழ்ப்பாண முஸ்லிம் சமூகம் தற்போதுதான் தமது தாயகப்பிரதேசத்தில் மெல்லமெல்ல மீளக்குடியேற ஆரம்பித்துள்ளது. முஸ்லிம் சமூகத்தின் இந்தமீள்குடியேற்றத்தை வரவேற்கவேண்டியது தமிழ் மக்களினதும், அவர்கள் சார் ஊடகங்களினதும் தலையாய கடமையாகும்.

இதைவிடுத்து ஒருவர் அல்லது இருவர் செய்யும் தவறுகளுக்காக முழு சமூகத்தையும் குற்றவாளிகள் போன்று காட்சிப்படுத்துவது தமிழ் மக்களை தவறாக வழிநடத்தவும், முஸ்லிம்களுக்கு எதிரான உணர்வலைகள் தோன்றவும் வழிவகுத்துவிடும். எனவே எதிர்வரும் காலங்களிலாவது தமிழ் ஊடகங்கள் தமிழ் - முஸ்லிம் உறவின் இன நல்லிணக்கத்தின் அவசியம்கருதி செயற்பட முன்வரவேண்டும்.

தவறுகள், பிழைகள், அநீதிகள் நடைபெறும் வேளைகளில் அதுகுறித்து பொலிஸாருக்கு அறிவித்து, அல்லது சமூகங்கள் சார்பிலான சமய குருமாரிடம் விவகாரங்களை ஒப்படைப்பதே பொருத்தமானது.

இடைவெளியுடன் பயணிக்கும் சமூகங்களுக்கிடையிலான உறவை சீரமைக்க தமிழ் ஊடகங்கள் தம்மை ஆர்ப்பணிக்க வேண்டுமென நாம் வேண்டுகோள் விடுக்கிறோம். அவ்வாறான தமிழ் ஊடகங்களுடனும், தமிழ் - முஸ்லிம் உறவில் ஆர்வம் கொண்டுள்ள சக்திகளுடனும் முஸ்லிம் சமூகத்தின் நலன்கருதியும், யாழ்ப்பாண முஸ்லிம்களின் நலன்கருதியும் நாம் இணைந்து பணியாற்ற தயாரென்பதையும் இங்கு சுட்டிக்காட்டவிரும்புகிறோம்.

யாழ் முஸ்லிம் இணையத்தை தினமும் தரிசிக்கும்  பல்லாயிரக்கணக்கான உறவுகளில் 27 சதவீத்தினர் தமிழ் தரப்பினர் ஆவர். அவர்கள் எமது இந்த தகவலை உரிய இடங்களுக்கு எடுத்துச்செல்வார்கள் என்று நம்புகிறோம்..!