உடலின் மறைவான பாகங்கள், வெளியே தெரியுமாறு மேலாடை அணிவீர்களா..?

Aashiq Ahamed

சகோதரி லாரன் பூத் (Lauren Booth) - அரசியல் விமர்சகர் & ஊடகவியலாளர். இவற்றிற்கெல்லாம் மேலாக, பிரிட்டனின் முன்னாள் பிரதமர் டோனி பிளேரின் நெருங்கிய உறவினர் என்ற அடையாளம். பாலஸ்தீன மக்களின் அணுகுமுறையால் கவரப்பட்டு, இஸ்லாமை படித்து முஸ்லிமானவர். 

தன் மனமாற்றத்தை, தன் மகள்களிடம் சொன்ன போது நடந்த நிகழ்வுகளை மிக அழகாக பின்வருமாறு விவரிக்கிறார் லாரன். 

"என்னிடம் பலரும் கேட்கின்றார்கள், 'உங்கள் மகள்களும் முஸ்லிமாவார்களா?' என்று. எனக்கு தெரியவில்லை. அவர்கள்தான் முடிவெடுக்க வேண்டும். ஒருவருடைய உள்ளத்தை நாம் மாற்ற முடியாது. 

ஆனால், என்னுடைய மனமாற்றத்தை அவர்கள் எதிர்க்கவில்லை. இன்னும் சொல்லப்போனால், நான் இஸ்லாமை தேர்ந்தெடுத்ததை அவர்களிடம் சொன்னபோது அவர்கள் காட்டிய அணுகுமுறை என்னை ஆச்சர்யத்தில் ஆழ்த்தியது. 

சமையலறையில் அமர்ந்துக் கொண்டு அவர்களை அழைத்தேன், 

'Girls, உங்களிடம் ஒரு செய்தியை சொல்லவேண்டும்'. சொல்ல ஆரம்பித்தேன். 'நான் இப்போது முஸ்லிம்'. இதனை கேட்டவுடன் ஒன்றாக கூடிக்கொண்டு அவர்களுக்குள்ளாக ஏதோ கிசுகிசுத்து கொண்டார்கள். 

சில நொடிகளுக்கு பிறகு, என் மகள்களில் மூத்தவளான அலெக்ஸ், 'நாங்கள் சில கேள்விகளை கேட்க விரும்புகின்றோம். 

இன்னும் சிறிது நேரத்தில் வருகின்றோம்'. 

ஒரு லிஸ்டை தயாரித்துக் கொண்டு திரும்பினார்கள். அலெக்ஸ் ஆரம்பித்தாள், 

'இனியும் நீங்கள் மது அருந்துவீர்களா?' என்னுடைய பதில்: 'இல்லை'. 

'இனியும் புகைபிடிப்பீர்களா?' புகைபிடிப்பது உடம்புக்கு நல்லதல்ல. அதனால் என்னுடைய பதில், 'இல்லை'. 

அவர்களுடைய கடைசிக் கேள்வி என்னை பின்னுக்கு தள்ளியது. 

'தற்போது முஸ்லிமாகிவிட்டதாக கூறுகின்றீர்கள், இனியும் உடலின் மறைவான பாகங்கள் வெளியே தெரியுமாறு மேலாடை அணிவீர்களா?' 

என்ன??????? 

இப்போதுதான் புரிய ஆரம்பித்தது. நான் உடையணியும்விதம் அவர்களை எந்த அளவிற்கு சங்கடத்தில் ஆழ்த்திருக்கின்றது என்று. 

'இப்போது நான் முஸ்லிம்' , 

தொடர்ந்தேன், 'இனியும் அப்படி உடையணிய மாட்டேன்'. 

'நாங்கள் இஸ்லாமை விரும்புகின்றோம்' என்று கூறி ஆரவாரம் செய்துவிட்டு விளையாட சென்றுவிட்டார்கள். நானும் சொல்லிக்கொண்டேன், 'நானும் இஸ்லாமை விரும்புகின்றேன்'."