அனோஜன் சிவராசாவை இன்றும் சந்தித்த, சவூதிக்கான இலங்கைத் தூதுவர்

சவூதிக்கான இலங்கைத் தூதுவர் ஓ.எல். அமீர் அஜ்வாத், தம்மாம் மத்திய சிறைச்சாலையில் அனோஜன் சிவராசாவை இன்று (26) சந்தித்தார். முன்னதாக அவருக்கு விதிக்கப்பட்டிருந்த மரண தண்டனையை சவூதி உச்ச நீதிமன்றம் ரத்து செய்து, வழக்கினை மீண்டும் விசாரணைக்கு உட்படுத்த உத்தரவிட்டதைத் தொடர்ந்து இந்தச் சந்திப்பு இடம்பெற்றது.

இந்தச் சந்திப்பின் போது, ​​வரவிருக்கும் நீதிமன்ற நடவடிக்கைகள் குறித்து  அனோஜனுக்குத் தெளிவுபடுத்தும் வகையிலும், தேவையான தூதரக, சட்ட உதவிகள் தொடர்பாகவும் தூதுவர் கலந்துரையாடினார். 

வரவிருக்கும் சட்ட நடவடிக்கைகள் குறித்து புரிந்துகொள்வதன் முக்கியத்துவம் குறித்தும், சட்ட நடைமுறைகளின் ஊடாக அனைத்து தொடர்புடைய விடயங்களும் முறையாகக் கையாளப்படுவதை உறுதி செய்வது குறித்தும் இந்த உரையாடல்கள் கவனம் செலுத்தின.

 அனோஜனுக்குத் தூதரகம் தொடர்ந்து தூதரக ரீதியான ஆதரவை வழங்கும் என்றும், நடைபெறவுள்ள சட்ட நடவடிக்கைகளின் போது அவருக்குத் தேவையான சட்ட மற்றும் தூதரக உதவிகளைப் பெற்றுக்கொடுக்க அர்ப்பணிப்புடன் செயல்படும் என்றும் தூதுவர் அமீர் அஜ்வாத் உறுதிப்படுத்தினார்.

இதன்போது, ​​சிறைச்சாலை அதிகாரிகளையும் சந்தித்த தூதுவர், தூதரகத்திற்கு அவர்கள் வழங்கி வரும் முழுமையான ஒத்துழைப்பிற்கும், சிறைவாசத்தின் போது சிவராசாவின் நலனைக் கவனித்து வருவதற்கும் தனது மனமார்ந்த நன்றிகளைத் தெரிவித்தார்.