3 உயிர்களை காப்பாற்றிய சிறுவன் முஹம்மது ஷாமில்.‌

 

கடந்த ஞாயிற்றுக்கிழமை (13) அண்டை வீட்டில் நடைபெற்ற ஒரு விருந்தில் கலந்துகொள்ளச் சென்ற மூன்று சிறுமிகள், அருகிலிருந்த குளத்தின் அருகே சென்றனர். எதிர்பாராத விதமாக, பன்னிரண்டு வயது சிறுமி குளத்தில்  தவறி விழுந்தாள். அவளைக் காப்பாற்ற முயன்றபோது, இதர இரண்டு சிறுமிகளும் நீரில் மூழ்கினர். இந்தச் சமயத்தில், அவ்வழியாகச் சென்ற ஒரு பெண் கூச்சலிட்டதைக் கேட்டு, அருகில் வசிக்கும் முஹம்மது ஷாமில் விரைந்து வந்தார். அவரைப் பின்தொடர்ந்து, அவரது தந்தையும் சகோதரரும் சம்பவ இடத்திற்கு வந்தனர்.

ஷாமில் உடனே குளத்தில் குதித்து, மூழ்கிக் கொண்டிருந்த இருவரை உடனடியாகக் கரை சேர்த்தார். ஆனால், ஒருவர் குளத்தின் ஆழத்தில் மூழ்கிவிட்டிருந்தார். அந்தச் சிறுமியையும் ஷாமில் துணிவுடன் நீருக்குள் மூழ்கி எடுத்து கரைக்கு கொண்டு வந்தார். 

மயக்க நிலையிலிருந்த சிறுமிக்கு ஷாமிலே முதலுதவி அளித்து, உடனடியாக மருத்துவமனைக்கு அனுப்பி வைத்தார். இவ்வாறு மூன்று விலைமதிப்பற்ற உயிர்களைக் காப்பாற்றிய இந்த மாணவன், இன்று ஒரு கிராமத்திற்கே பெருமை சேர்க்கும் மனிதநேயராக திகழ்கிறார்.

வெள்ளில பி.டி.எம் மேல்நிலைப் பள்ளியில் பிளஸ் டூ பயிலும் ஷாமில், சாலக்கத்தோடி அஷ்ரஃப் மற்றும் ஷாஹிதா தம்பதியரின் இரண்டாவது மகன் ஆவார். உயர்நிலைப் பள்ளியில் சாரணர் இயக்கத்தில்(ஸ்கவுட்) உறுப்பினராக இருந்த ஷாமில், அங்கு பெற்ற முதலுதவி பயிற்சி இக்கட்டான சூழ்நிலையில் தனக்கு மிகவும் உதவியதாக கூறுகிறார்.

மலப்புரம் தீயணைப்பு மற்றும் சிவில் பாதுகாப்புத் துறையினர், பெரிந்தல்மன்னா நிலைய அலுவலர் திரு. பாபுராஜன் மற்றும் சிவில் பாதுகாப்பு உறுப்பினர்களுடன் ஷாமிலின் வீட்டிற்குச் சென்று, அவரது துணிச்சலான செயலைப் பாராட்டி கௌரவித்தனர்.

Anwar Sadath