பௌத்தம் - இந்து மதங்களை காப்பாற்ற, பொதுபல சேனா தேவை - அருள்காந்

நாட்டில் பௌத்தம் மற்றும் இந்து மதங்களை காப்பாற்றுவதற்கு பொதுபல சேனா போன்ற அமைப்புகள் தேவை என, இந்து மத சம்மேளனத்தின் தலைவர் அருள் காந் இன்று (6) தெரிவித்தார்.

இராஜகிரியவில் இடம்பெற்ற ஊடகச் சந்திப்பின் போதே, அவர் நேற்று(6)  இதனை தெரிவித்தார். அவர் மேலும் குறிப்பிடுகையில்,

கிழக்கு மாகாணத்தில் விபுலானந்தர் சிலையொன்றினை தாபிப்பதற்கு முற்பட்டப் போது, முஸ்லிம் அரசியல்வாதிகள் சிலர் எதிர்ப்பினை வெளிப்படுத்தினர். இதன்போது பொது பலசேனா அமைப்பின் செயலாளர்  கலகொட அத்தே ஞானசார தேரர் தலையிட்டமையினால் தான், அவ்விடத்தில் குறித்த சிலையினை தாபிக்க முடிந்தது. இத்தகைய காரணங்களினால் தான் நாங்கள் அவருக்காக இன்று பேசுகின்றோம்.

ஆதலால் நாட்டில் பௌத்தம், இந்து மதங்களை பாதுகாக்க பொதுபல சேனா அமைப்பு அவசியமாகும்.

மற்றும், மூதூர் பிரதேசத்தில் 3 பிள்ளைகள் பாலியல் வன்புணர்வுக்கு உள்ளாகியுள்ளனர். இவ்விடயம் தொடர்பில் 35 பேர் கைது செய்யப்பட்டு,பாதிக்கப்பட்ட பிள்ளைகளை அடையாளம் காட்டும்படி கூறுகின்றனர். அவர்களால் எவ்வாறு அடையாளம் கண்டுக்கொள்ள முடியும்? அதற்காக தான் இன்று டி.என்.ஏ பரிசோதனை இருக்கின்றதே, அதை பயன்படுத்தலாம் அல்லவா?

குறித்த சம்பவத்தில் சந்தேகத்தின் பேரில் கைது செய்யப்பட்டுள்ள ஒருசில சந்தேகநபர்களின் சார்பில் முன்னிலையாவதற்கு சட்டத்தரணிகள் சிலர் முன்வந்துள்ளனர். ஆனால் பாதிக்கப்பட்ட பிள்ளைகளின் சார்பில் முன்னிலையாவதற்கு எவரும் முன்வரவில்லை. 5 பொலிஸ் அதிகாரிகள் மட்டு​மே குறித்த பிள்ளைகளின் சார்பில் குரல் கொடுத்தனர். அவர்களும் சிங்கள பொலிஸ் அதிகாரிகள் என, அருள் காந் தெரிவித்தார்