அரசாங்கத்தின் தீர்மானம் பற்றி, முஸ்லிம்கள் அதிருப்தி - அமைச்சரவையில் ஹக்கீம்

அமைச்சரவை கூட்டம் நேற்று நடைபெற்றது. இதில் ரவூப் ஹக்கீம் தெரிவித்தவை,

ஸ்ரீ லங்கா முஸ்லிம் காங்கிரஸின் தலைவரும் நீர்வழங்கல், வடிகாலமைப்பு மற்றும் நகர் திட்டமிடல் அமைச்சருமான ரவூப் ஹக்கீமும் முஸ்லிம் தனியார் சட்ட திருத்தம் தொடர்பில் அரசாங்கம் எடுத்துள்ள தீர்மானம் பற்றி முஸ்லிம்கள் அதிருப்தியடைந்துள்ளதாக தெரிவித்தார்.

அமைச்சர் ரவூப் ஹக்கீம் அமைச்சரவையில் உரையாற்றுகையில்,

முஸ்லிம் தனியார் சட்டத்தில் திருத்தங்களை மேற்கொள்வதற்கு நடவடிக்கை எடுத்துள்ளமை முஸ்லிம்கள் மத்தியில் பாதிப்பையும் எதிர்ப்பையும் ஏற்படுத்தியுள்ளது. ஐரோப்பிய ஒன்றியம் ஜி.எஸ்.பி. வரிச்சலுகைக்காக முஸ்லிம் தனியார் சட்டத்தை திருத்துமாறு நிபந்தனை விதித்திருப்பது முஸ்லிம்களை அதிருப்தி கொள்ளச் செய்துள்ளது என்றார்.

முஸ்லிம் தனியார் சட்டத்தில் திருத்தங்களை மேற்கொள்ள நியமிக்கப்பட்டிருக்கும் அமைச்சரவை உபகுழு, ஏற்கெனவே நியமிக்கப்பட்டுள்ள ஓய்வுபெற்ற முன்னாள் உயர் நீதிமன்ற நீதியரசர் சலீம் மர்சூபின் அறிக்கை வெளியிடப்படும்வரை எந்த தீர்மானமும் மேற்கொள்ளப்படக் கூடாது. அந்தக்குழுவின் அறிக்கையின் பின்பே தீர்மானம் மேற்கொள்ளப்பட வேண்டும்.

நாட்டில் மஹிந்த ராஜபக்ஷ அரசின் காலத்தில் போன்று முஸ்லிம்களுக்கு எதிரான நடவடிக்கைகள் அதிகரித்து வருகின்றன.இந்தவாரம் இரண்டு பள்ளிவாசல்கள் தாக்கப்பட்டுள்ளன. குருநாகல் மாவட்டத்தில் தெலியாகொன்னயிலும், நிகவெரட்டியிலும் இச்செயல்கள் அரங்கேறியுள்ளன. இச்செயற்பாடுகளுக்கு அரசாங்கம் இடமளிக்கக்கூடாது.

பள்ளிவாசல்கள் தாக்கப்படுவதினால் முஸ்லிம்கள் அச்சமடைந்துள்ளார்கள். அரசாங்கம் இது சம்பந்தமாக உடனடியாக கவனம் செலுத்த வேண்டும் என்றார்.

இறக்காமம் மாணிக்கமடு மலையில் புத்தர் சிலை வைக்கப்பட்டுள்ளமை தொடர்பிலும் அமைச்சர் ஹக்கீம் எதிர்ப்பினைத் தெரிவித்தார். மாணிக்கமடு பகுதியில் பௌத்த குடும்பம் ஒன்றேனும் வசிக்காத நிலையில் அண்மையில் புத்தர் சிலையொன்று வைக்கப்பட்டுள்ளது.

அப்பகுதியில் தமிழ், முஸ்லிம் மக்களே வாழ்கிறார்கள். நீதிமன்ற உத்தரவினையும் மீறி இந்தச்சிலை வைக்கப்பட்டுள்ளமை குறிப்பிடத்தக்கதாகும்.

பௌத்தர்களே இல்லாத இடத்தில் புத்தர் சிலை வைக்கப்பட்டுள்ளதால் அப்பகுதியிலுள்ள சிறுபான்மை மக்கள் பெரும் அச்சத்துக்குள்ளாகியுள்ளனர். எனவே இது சம்பந்தமாக காலம் தாழ்த்தாது தீர்வு காணப்பட வேண்டும் என்றார்.

பிரதமர் ரணிலிடம் முறைப்பாடு

நேற்று பாராளுமன்றத்தில் அமைச்சர்களான ரவூப் ஹக்கீமும், மனோ கணேசனும் மாணிக்கமடுமலையில் புத்தர்சிலை வைத்த விவகாரம் குறித்து பிரதமரிடம் முறையிட்டனர்.

நல்லாட்சியில் இனங்களுக்கிடையில் நல்லிணக்கத்தை ஏற்படுத்தும் இச்சந்தர்ப்பத்தில் பௌத்தர்களே இல்லாத பகுதியில் சிலை வைத்திருப்பது பாரதூரமான விடயம். இந்த விடயம் உடன் தீர்வு காணப்படவேண்டும்.

புத்தர் சிலை விவகாரத்தில் அமைச்சர் தயா கமகேயே சம்பந்தப்பட்டுள்ளார். அதனால் அவர் அறிவுறுத்தப்பட வேண்டும். இதனால் உருவாகியுள்ள அசாதாரண நிலை அவருக்கு தெளிவுபடுத்தப்பட வேண்டும் என அமைச்சர்கள் இருவரும் பிரதமரை வேண்டிக்கொண்டனர்.