முஸ்லிம்களின் உயிரினும் மேலான நபிகள் நாயகத்தை, கருணாநிதியுடன் ஒப்பிட்டு பேச்சு - கண்டன போராட்டத்திற்கு அழைப்பு

அமெரிக்காவில், டென்மார்க்கில், பிரான்ஸில் நபிகள் நாயகம் (ஸல்) அவர்களை இழிவுப்படுத்தியதற்கு தமிழகத்தில் அனைத்து முஸ்லிம் இயக்கங்களும் வீதியில் போராட்டம் நடத்தின.

ஆனால் தமிழகத்தில் நபிகள் நாயகம் (ஸல்) அவர்களை கருணாநிதியுடன் ஒப்பிட்டு அதனால் தான் மமக, முஸ்லிம் லீக், SDPI கட்சிகள் அறிவாலயம் வந்ததாக கூறி நபிகள் நாயகம் (ஸல்) இழிவுப்படுத்தியுள்ள நிலையிலும் மமக, முஸ்லிம் லீக், SDPI ஆகிய கட்சிகள் மௌனம் காத்து வருகின்றன.

யாரென்றே தெரியாத வெளிநாட்டினரை கண்டித்து போராட்டம் நடத்தினால் எதிர் தாக்குதல் வராது,

உள்நாட்டில் திமுகவை கண்டித்து போராட்டம் நடத்தினால் எதிர்தாக்குதல் என்ற பெயரில் கொடுத்த 5 சீட்டுக்களையும் திரும்பப் பெற்றுக்கொள்வார்களோ அல்லது திமுகவினர் தங்களுக்கு வாக்களிக்க மாட்டார்களோ என்ற அரசியல், பதவி அச்சத்தின் காரணமாக மௌனம் காப்பதாகவே கருத முடிகிறது.

நபிகள் நாயகம் (ஸல்) அவர்களை இழிவுப்படுத்தியும் வாய் திறக்காவிட்டால் வேறு எப்போது வாய் திறப்பீர்கள் ?

நமது உயிரினும் மேலாக மதிக்கக்கூடிய நபிகள் நாயகம் (ஸல்) அவர்களை இழிவுப்படுத்தி நமக்கு இந்த அரசியல் பதவி தேவையா என்று இந்த தருணத்தில் சிந்திக்க வேண்டும்.

இல்லையென்றால் நபிகள் நாயகம் இழிவுப்படுத்தப்பட்டும் இக்கட்சிகள் வாய் திறக்காத போது நமக்காகவா இக்கட்சிகள் வாய் திறக்கப்போகிறது என்று மக்கள் சிந்திக்க தொடங்கிவிடுவார்கள்.

திமுகவுக்கு தமிழ்நாடு தவ்ஹீத் ஜமாஅத் கடும் கண்டனம்....!!

முஸ்லிம்களின் உயிரினும் மேலான நபிகள் நாயகம் (ஸல்) அவர்களை கருணாநிதியுடன் ஒப்பிட்டு திமுக பேச்சாளர் நாகராஜன் பேசியதற்கு தமிழ்நாடு தவ்ஹீத் ஜமாஅத் கடும் கண்டனம் தெரிவித்துள்ளது. இதுதொடர்பாக அவ்வியக்கத்தின் பொதுச்செயலாளர் முஹம்மது யூசூப் வெளியிட்டுள்ள கண்டன அறிக்கையில்,

நபிகள் நாயகம் (ஸல்) அவர்கள் அல்லாஹ்வின் தூதர் என்று முஸ்லிம்கள் நம்புகின்றனர். முஸ்லிம்களிலேயே மிகப்பெரிய மகானையும் கூட அல்லாஹ்வின் தூதர் என்று எந்த முஸ்லிமும் நம்ப மாட்டார் நம்பக் கூடாது. இந்த நம்பிக்கைக்கு பங்கம் ஏற்படுத்தும் வகையில் கருணாநிதியை இறைத்தூதர் என்று இந்தக்கயவன் பேசியுள்ளது கடும் கண்டனத்துக்கு உரியது.

முஸ்லிம் சமுதாயத்தில் இறை நம்பிக்கையாளருடன் கூட கருணாநிதியை ஒப்பிட முடியாது எனும் போது நபிகள் நாயகம் போல் இறைத்தூதர் என்று கூறுவது முஸ்லிம்கள் மத்தியில் கடும் கொந்தளிப்பை ஏற்படுத்துவதாகும்.

அல்லாஹ்வின் தூதர் என்பதைத்தவிர்த்து நபிகள் நாயகத்தின் ஒழுக்கம், நாணயம், நேர்மை ,தியாகம், தன்னலமற்ற வாழ்வு அரசியல் என்று எந்த துறையை எடுத்துக் கொண்டாலும் கருணாநிதியோ மற்ற அரசியல் வாதிகளோ நபிகள் நாயகத்தின் கால் தூசுக்கு சமமானவர்களாக ஆகமுடியாது என்று நம்பும் முஸ்லிம்களின் நம்பிக்கையைக் கேலிக்கூத்தாக்கி இருப்பதை வன்மையாக கண்டிக்கிறோம்.

நபிகள் நாயகம் விஷயத்தில் முஸ்லிம்கள் கடுகளவும் சமரசம் செய்து கொள்ள மாட்டார்கள் என்பது உலகமே அறிந்து வைத்துள்ள உண்மையாகும்.

இதைக்கூட உணராமல் நாகராஜ் என்பவன் பேசியுள்ளதைக் கருணாநிதி கடுமையாக கண்டிக்க வேண்டும், தவறினால் கடுமையான விளைவுகளை திமுக சந்திக்க வேண்டி வரும் என்று எச்சரிக்கிறோம்.

மேற்கண்டவாறு முஹம்மது யூசுப் தெரிவித்துள்ளார்.