முஸ்லிம் தலைவர்கள் செய்யாதவற்றை, முஸ்லிம்களுக்காக நாம் செய்துள்ளோம் - சம்பந்தன்

தமிழ்த் தேசியக் கூட்டமைப்பானது ஒருபோதும் தமிழ் மக்களிலிருந்து முஸ்லிம்களை தனியாகப் பிரித்துப் பார்த்தது கிடையாது. தமிழ் மக்கள் சார்ந்த நலன்களைக் கவனிக்கும் சகல விடயங்களிலும் பாதிக்கப்பட்ட வடக்கு, கிழக்கு முஸ்லிம் மக்களையும் தமிழ் பேசும் மக்களாகக் கருதியே தமிழ்த் தேசியக் கூட்டமைப்பு குரல் கொடுத்தே வருகிறது என்று தமிழ்க் கூட்டமைப்பின் தலைவரும், எதிர்க்கட்சித் தலைவருமான இரா. சம்பந்தன் தெரிவித்தார்.

தமிழ்த் தேசியக் கூட்டமைப்பு முஸ்லிம்கள் விடயத்தில் கவனம் செலுத்துவதில்லை என அமைச்சர் றிசாத் பதியுதீனினால் அண்மையில் பாராளுமன்றத்தில் தெரிவிக்கப்பட்டமை தொடர்பாக கேட்டபோதே கூட்டமைப்பின் தலைவர் சம்பந்தன் இவ்வாறு தெரிவித்தார். முஸ்லிம் கட்சி ஒன்றின் அதுவும் வடமாகாண முஸ்லிம் மக்களைப் பெரும்பான்மையாகப் பிரதிநிதித்துவப்படுத்துகின்ற ஒரு கட்சியின் தலைவர் ஒருவரிடமிருந்து இவ்வாறானதொரு கருத்து வெளிப்பட்டதே தவறான விடயமாகும்.

இதனை நாம் எதிர்பார்க்கவில்லை. முஸ்லிம் மக்கள் தொடர்பான தமிழ்த் தேசியக் கூட்டமைப்பின் சரியான நிலைப்பாட்டை அமைச்சர் அறியாமலிருப்பது வேதனை தரும் விடயமாகும்.

வடமாகாண முஸ்லிம்களின் விவகாரங்களைக் கையாள நாம் வட மாகாண சபையில் ஒரு போனஸ் ஆசனத்தை முஸ்லிம் பிரதிநிதி ஒருவருக்கு வழங்கியிருக்கிறோம். அவர் முஸ்லிம் மக்களுக்கான தனது பணியைச் சிறப்பாகச் செய்து வருகிறார்.

முன்னர் பாராளுமன்ற போனஸ் ஆசனம் ஒன்றையும் முஸ்லிம் சகோதரருக்கு வழங்கியிருந்தோம். இது தவிர எமது பாராளுமன்ற அல்லது மாகாண அல்லது பிரதேச சபையைச் சார்ந்த எவருமே தமிழர் முஸ்லிம் என்று பிரித்துப் பார்க்காமலே தமது அரசியல் பணிகளை மேற்கொண்டு வருகிறார்கள்.

வடக்கு, கிழக்கில் தமிழ் மக்கள் இன்னமும் அவர்களது சொந்தக் காணிகளில் முறையாக மீள் குடியமர்த்தப்படவில்லை. அதற்காக நாம் தினந்தினம் போராடி வருகிறோம். அந்த எமது போராட்டத்தில் முஸ்லிம் மக்களது விவகாரமும் உள்ளடங்கியிருக்கின்றது என்பதைப் புரிந்து கொள்ள வேண்டும். ஜெனீவாவில் கூட நாம் தமிழருக்காக மட்டும் எனக் குரல் கொடுத்தது கிடையாது. தமிழ் பேசும் மக்கள் எனக் கூறி இரு இன மக்கள் குறித்துமே வாதாடி வருகின்றோம்.

கடந்த அரசாங்கங்கள் எல்லாவற்றிலும் முஸ்லிம் தலைவர்கள் பலர் ஆட்சியில் அரசாங்கத்தின் முக்கியமான பங்காளிகளாக இருந்து வந்தபோதிலும் தமது சமூகத்திற்குச் செய்யாத பலவற்றை அம்மக்களுக்காக தமிழ்த் தேசியக் கூட்டமைப்பு செய்துள்ளது. அரசாங்கத்துடனும் சரி, சர்வதேசத்திலும் சரி தமிழ்த் தேசியக் கூட்டமைப்பு நடத்தும் பேச்சுக்களில் தமிழ் பேசும் முஸ்லிம்களுக்காகவும் குரல் கொடுத்தே வருகிறது என்பதை முஸ்லிம் மக்கள் நன்கறிவர். இதனை முஸ்லிம் தலைவர்களும் புரிந்துகொள்ள வேண்டும் எனவும் சம்பந்தன் தெரிவித்தார்.