இதை நெஞ்சம் மறக்குமா...?

 (முசலியூர்.கே.சி.எம்.அஸ்ஹர்)

கந்தக்குழிய

அகதி முகாமில் - நாங்கள்

கந்தலுடை அணிந்ததை 

நெஞ்சம் மறக்குமா ?

உண்ண உணவின்றி 

உடுக்க உடையின்றி

படுக்கப் பாயின்றி 

தங்க நிழலின்றி

நாம் பட்ட வதைதனை 

நெஞ்சம் மறக்குமா?

பூப்போன்ற பச்சிளம் 

பாலகர்களின்; - பாதங்களைப்

பதம்பார்த்த இரக்கமற்ற

அம்மண்ணின் இம்சையை

நெஞ்சம் மறக்குமா?

காரிகையரும் கன்னியரும் 

குழிப்பதற்கும், குடிநீர்

பெறுவதற்கும் பட்ட

கஸ்டங்களைக் கூறி 

நெஞ்சம் மறக்குமா?

வயோதிபர்கள் -

வினாக்குறிகளாக மாறி

வீதியில் உலவித்

திரிந்ந கதைகளை

நெஞ்சம் மறக்குமா?

இரங்கி ஈரான் கொடுத்த

இரப்பர் டெண்டின் 

சூட்டையும் இதயத்தில்

ஏற்பட்ட இரணங்களையும்

நெஞ்சம் மறக்குமா?

நடைப் பிணங்களாக 

மாறிய – எம் வாலிபர் கதைகளை

இன்று நினைக்கும் போதும்

இதயம் கனக்கிறது

நெஞ்சம் மறக்குமா?

முகாமுக்குள் முடங்கிய

எம்மேல் அரசியல்க்

குதிரையோட்டியோரையும்

அதிகாரம் காட்டியோரையும் 

எம் நெஞ்சம் மறக்குமா?

செல்லுமிடமெல்லாம் 

செவியில் அகதியெனும்

அடைமொழி கிடைத்ததை

எம் உள்ளங்கள் இவ்வவனியில்

எப்படி மறக்கும் ?

ரேசன் கடைகளிலும் 

பாடசாலைகளிலும்

எம்மவர் சந்திந்த – சோதனைகளை 

ரோசமுள்ள எம் சமூகத்தின் 

நெஞ்சம் என்றும் மறக்குமா?

ஏழை பணக்காரன் என்ற 

எவ்வித பேதமுமின்றி

அந்த முகாமில் சமத்துவத்தைக்

காட்டத்தானோ - இறைவன் 

இங்கே அனுப்பினான்.

இதை நெஞ்சம் மறக்குமா?