அஸ்வரை பெருந்தன்மையுடன் மன்னித்து விடுவோம் - மனோ கணேசன்

மனோ கணேசனின் பேபுக்கிலிருந்து..!

ஆளுகின்ற அரசின் நாடாளுமன்ற உறுப்பினர் அஸ்வரை பெருந்தன்மையுடன் மன்னித்து இத்துடன் விட்டு விடுவோம். அவர் செய்த தவறை உணர்ந்து தன்னை திருத்திகொள்ள அவருக்கு சந்தர்ப்பம் வழங்குவோம். இந்த விவகாரம் தொடர்பாக, பெருந்தொகையான அன்புள்ளங்களுக்கு சொந்தகாரர்கள் அஸ்வருக்கு கண்டனத்தையும், எனக்கு ஆதரவையும் (அல்லது ஆறுதலையும்) தெரிவித்து வருகின்றார்கள். 

நாடு முழுக்க இருந்தும், வெளி நாடுகளில் இருந்தும் எக்கச்சக்கமான மின்னஞ்சல்கள், குறுஞ்செய்திகள், முகநூல் பதிவுகள், நேரடி அழைப்புகள் மூலம் தங்கள் மன உணர்வுகளை தெரிவித்து கொண்ட பண்புள்ளங்களுக்கு என் நன்றிகள். குறிப்பாக பெருந்தொகையான பண்புள்ள முஸ்லிம் சகோதரர்கள் பதைபதைப்புடன் செய்திகளை அனுப்பி கொண்டுள்ளார்கள். இன்னும் பலர் இணைய மற்றும் அச்சு ஊடகங்களிலும் தங்களை வெளிப்படுத்தியுள்ளார்கள். ஆரம்பத்தில் பலருக்கு அவர்கள் தொடர்புகொண்ட மார்க்கத்திலேயே பதில் அளித்து கொண்டிருந்தேன். தற்போது இது பெருந்தொகையாக மாறிவிட்டதால் ஒவ்வொன்றுக்கும் பதிலளிக்க எனக்கு சாத்தியப்படவில்லை. எனவே எனது இந்த முகநூல் பதிவு மூலமாக எனது நல்லெண்ணத்தை பகிர்ந்து கொள்கிறேன். 

அஸ்வர் அவர்கள் "ஹிரு" தொலைக்காட்சியில் இடம்பெற்ற பகிரங்க நேரடி நிகழ்வு ஒன்றில் தகாத வார்த்தை பிரயோகம் செய்து என்னை திட்டியிருந்தார். முஸ்லிம் மக்கள் எதிர்நோக்கும் பிரச்சினைகள் பற்றி குரல் எழுப்ப (அல்லது போராட) வேண்டாம் என்று எனக்கு கூறியிருந்தார். என்னை தமிழ் (அல்லது ஹிந்துக்களின்) பிரச்சினைகள் பற்றி மட்டும் பேசும்படி (அல்லது போராடும்படி) கூறியிருந்தார். முஸ்லிம் மக்கள் தொடர்பான பிரச்சினைகள் அல்லது கேள்விகள் தொடர்பில் தான், ஒரு தமிழருக்கு (அல்லது முஸ்லிம் அல்லாத ஒருவருக்கு) பதில் அளிக்க தயார் இல்லை என்றும் சொல்லி இருந்தார். 

ஆரம்பத்தில் அஸ்வரின் சொல்லாடலை கேட்டு எனக்கு கொஞ்சம் அதிர்ச்சி ஏற்பட்டது. பின்னர் கொஞ்சம் மன வருத்தம் தோன்றி சட்டென மறைந்தது. பின்னர் சிரிப்புதான் வந்தது. 

நீண்ட நாட்களுக்கு முன்னரே நான் கொஞ்சம் உள முதிர்ச்சி அடைந்துவிட்டேன் என எண்ணுகின்றேன். புகழ்ச்சியால் அதிகம் பரவசம் அடையாமலும், இகழ்ச்சியால் வருத்தமடையாமலும், அச்சறுத்தலை கேட்டு கலவரமடையாமலும், நிகழ்வுகளின் இறுதி கணத்தில் நடந்தைவைகளை எண்ணி சிரிக்கவும் என் வாழ்வின் அனுபவங்கள் எனக்கு கற்று கொடுத்துள்ளன என எண்ணுகின்றேன். 

எல்லாவித பேதங்களையும் புறந்தள்ளிவிட்டு அநீதிகளுக்கு எதிராக போராடிக்கொண்டே இருப்போம். நன்றி.