இனவாதிகளின் இலக்குகளுக்கு இலகுவில் இரையாகும் இயக்க அடையாளமிடப்பட்ட பள்ளிவாசல்கள்

(M.H.Abdullah)

பள்ளிவாசல்கள் அல்லாஹ்வுக்கே உரியன. எனவே அல்லாஹ்வுடன் வேறு எவரையும் அழைக்காதீர்கள்! (72-18).

அல்லாஹ்வை ஐவேளை தொழுவதற்காகவும், இதர மார்க்க அனுஷ்டானங்களை நிறைவேற்றுவதற்காகவும் உருவாக்கப்பட்ட இடமே பள்ளிவாசல் ஆகும். அது புனிதமானது, அல்லாஹ்வுக்கு மாத்திரம் சொந்தமானது. கொள்கை வேறுபாடின்றி அனைவரும் தரிசிக்கும் ஓர் உன்னதமான இடம்.

ஒரு காலத்தில் இறை இல்லங்கள் அவைகளின் பெயர்கள்,  தோற்றங்கள், மற்றும் அமைவிடங்களைக் கொண்டு  அடையாளமிடப்பட்டு வந்தன. பல் வேறுபட்ட கொள்கையிலுள்ளவர்கள்  கொள்கை வேறுபாடின்றி ஐவேளை தொழுகைக்காக இறை இல்லம் தரிசித்து வந்தனர், தமது மார்க்க அனுஷ்டானங்களையும் நிறைவேற்றி வந்தனர்.

காலப்போக்கில் இயக்க ஆதிக்கம் வலுப்பெற்றதனால் நூறு பேர் கொண்ட ஊருக்கு ஆறு பள்ளிவாசல்கள் என ஒவ்வொரு இயக்கமும் தமக்கென்று தனியான பள்ளிவாசல்களை அமைக்க ஆரம்பித்தன. தாம் கொண்ட கொள்கையும் சித்தாந்தமுமே போதிக்கப்பட வேண்டும் என்ற நிலை உருவானது.  

குறிப்பிட்ட ஒரு இயக்கத்தைச் சார்ந்தோர் மாற்று இயக்க நிர்வாகத்தின் கீழுள்ள பள்ளிவாசலை அன்னியமாக நோக்குவது மட்டுமல்லாமல் அவை மீது அச்சுறுத்தல் விடுக்கப்படும் போதல்லாம் அவற்றுக்கெதிராக எந்தவிதமான எதிர்வினைகளையும் வெளிப்படுத்தாமல் மௌனம் காப்பதே அண்மைக்கால இனவாத செயற்பாடுகளின் போது கசிஞ்ச கசப்பான உண்மையாகும்.

அதையும் தாண்டி மாற்று இயக்கத்துக்கு சொந்தமான இறை இல்லங்கள் தாக்கப்படும் போது தமக்குள் சந்தோஷ செய்திகள் பரிமாறிக்கொள்ளும் இழிநிலையும் நம் சமூகத்தில் இல்லாமலில்லை. இந்த துரதிஸ்ட நிலை இனவாதிகளுக்கு சந்தர்ப்பமாக மாறியது. சம்பிரதாய முஸ்லீம், அடிப்படை வாத முஸ்லீம் என வகுப்புவாத  மந்திரம் ஓதி தந்திரமாக முஸ்லீம்களின் அக முரண்பாடுகளை அவர்களுக்கு சாதகாமாக பயன்படுத்தி வருகின்றனர்.

இரண்டு நாட்களுக்கு முன் கிறேன்பாஸ் பள்ளிவாசல் தாக்கப்பட்ட போது உயிரைப் பணயம் வைத்துப் போராடிய ஸ்ரீ லங்கா தவ்ஹீத் ஜமாத்தினரை தப்லீக் ஜமாத்தினர் குறித்த  போராட்டத்திலிருந்து வெளியேறுமாறு வேண்டியுள்ளமை கொள்கை வெறி எல்லை மீறியதட்க்கு நல்ல உதாரணம். தமது இயக்கத்துக்கு  சொந்தமான பள்ளி தாக்கப்படும் போது தாம் மட்டுமே அதைப் பாதுகாக்க வேண்டும், வேறு யாரும் தேவையில்லை  என்ற தவறான போக்கு இனவாதிகளுக்கு மேலும் பல பள்ளிகளைத் தாக்க சந்தர்ப்பமாக அமைந்து விடுமல்லவா?

முஸ்லிம்கள் எப்போது இயக்க அடையாளத்துக்கு அப்பால் இறை இல்லங்களை பொதுவாக நோக்குகின்றார்களோ அப்போதுதான் அவைகளை தமது உயிரிலும் மேலானதாக மதிக்க ஆரம்பிப்பார்கள். இறை இல்லங்களுக்கு அச்சுறுத்தல் விடுக்கப்படும் போது கொள்கை வேறுபாடின்றி ஒரே அணியாக நின்று அவைகளைப் பாதுகாப்பார்கள்.

வணக்கங்களை நிரைவேற்றும் விதத்தில் கருத்து வேறுபாடு இருந்தாலும் எம்மால் வணங்கப்படுபவன் அல்லாஹ்வே என்பதில் இரு வேறு கருத்து இருக்க முடியாது. பள்ளிவாசல்கள் அனைத்தும் அவனுக்கு மட்டுமே சொந்தமானது என்ற உணர்வு எமதுள்ளங்களில் ஆழமாக பதிய வேண்டும். பள்ளிவாசல் நிர்வாகம் மாற்றுக்கருத்தில் இருப்பதற்காக அல்லாஹ்வுக்கு சொந்தமான அப்பள்ளிவாசல் மீது வெறுப்பையும் குரோதத்தையும் காட்டுவது எவ்வளவு முட்டாள்தனம்!

இறை இல்லத்தை தரிசிக்க வருபவர்களை தடுக்கும் அதிகாரம் யாருக்கும் கிடையாது. அது தாக்கப்படும் போது அதைப் பாதுகாக்க யார் வந்தாலும் தடுக்கவும் கூடாது. அதுபோல் தமது புரிதலுக்கு ஏற்ப வணக்க வழிபாடுகளை நிறைவேற்றவும் அவர்களுக்கு அதிகாரம்  உண்டு.  தவறைக்கண்டால் பண்பாக சுட்டிக்காட்டுங்கள், அவர்களின்  நேர்வழிக்காக பிரார்த்தியுங்கள்.  இதுவே இஸ்லாம் வேண்டி நிற்க்கும் உன்னத பண்பாகும்.

எனவே இலங்கை முஸ்லீம்களின் சமயம் சார்ந்த, சாராத நலன்களுக்கான இருப்புக்கு  உத்தரவாதம் அவர்களின் ஒற்றுமியிலேயே தான்  தங்கி இருக்கிறது என்ற உண்மை அனைவராலும் புரிந்துகொள்ளப் பட வேண்டும்.

அல்லாஹ் தனது திரு மறையில், உறுதியாக இணைக்கப்பட்ட கட்டடம் போன்று அணிவகுத்து தன் பாதையில் போரிடுவோரை அல்லாஹ் விடும்புகிறான். (61-4).