கிரண்ட்பாஸ் பள்ளிவாசலை தாக்கியது பௌத்தர்கள் இல்லையாம்...!

(முபாஸல் மபாஸ்)

நாங்கள் பள்ளிக்கு அடிக்கவும் இல்லை. அடித்தது பௌத்தர்களும் அல்ல. நேற்று டி.என் எல் தொலைக்காட்சியில் கிராண்ட்பாஸ் விவகாரம் தொடர்பான கலந்துரையாடல் இடம்பெற்றது. 3 தேரர்களும், முஜிபுர் ரஹ்மான், ஹமீட் மற்றும் அஸாத் சாலி என்போர் கலந்து கொண்டனர்.

ஆரம்பத்தில் உரையாற்றிய தேரர்கள் இருவரும் அந்த இடமானது ஒரு களஞ்சியசாலை எனும் தோற்றத்தை முன்வைத்தனர். ஒருவர் நிறுத்தி மற்றவருக்கு பேச சந்தர்ப்பம் கிடைத்த போது அவர் விட்ட இடத்திலிருந்து மற்றவர் தான் தொடர்வதாக கூறியே களஞ்சியசாலை என வாதிட்டனர்

அவர்கள் இருவரும் கூறியதன் சுருக்கம், முஸ்லிம்கள் வஞ்சகமான முறையில் அப்பள்ளியை நிறுவினர் என்பதாகும். அதாவது களஞ்சியசாலை என கூறிக் கொண்டு தந்திரமாக பள்ளியை அமைத்தனர். இதன் போது ஏனைய பள்ளிகள் தாக்கப்பட்டதற்கும் இவ்வாறான வஞ்சகமான முறையில் அப்பள்ளிகள் கட்டப்பட்டமை காரணமாக இருக்கலாம் என்ற கருத்தையும் முன்வைத்தனர்.

மூன்றாவதாக உரை நிகழ்த்திய தேரர் அவர் பாடசாலை அதிபர். தாக்கப்பட்டது பள்ளிவாயல் அல்ல என்பதை வெளிப்படுத்தினார். அந்நேரம் அவர் பழைய மற்றும் பதிய பள்ளிவாயல்களின் புகைப்படத்தை காட்டி கட்டிட அமைப்பு வித்தியாசத்தை சுட்டிக் காடடி அது ஒரு பள்ளி அல்ல. கட்டிடம் ஒன்று. தாக்கப்பட்டது அக்கட்டிடம்தான் என பல விடுத்தம் அவ்விரு புகைப்படங்களை காட்சிப்படுத்தி கூறினார். அத்துடன் தாக்கியது பௌத்தர்கள் அல்ல. அவர்களுக்கும் ஒரு கலாச்சாரம் உண்டு. பழைய பள்ளியை கட்டுவதற்கு இடம் கொடுத்தது ஒரு பௌத்தர் மற்றும் அரச மரத்துக்கு அருகில் பள்ளிவாசல் அமைக்கும் போது சாந்தமாக இருந்தவர்கள் பௌத்தர்கள் . எனவே அவர்கள் தான் தாக்கினர் என கூற வேண்டாம் என முடித்தார்.

முடிவாக அவர்களின் கருத்து,

அது ஒரு பள்ளிவாசல் அல்ல.

அது களஞ்சியசாலை.

தாக்கியது பௌத்தர்களும் அல்ல.

என்பதை உலகுக்கு எடுத்துக் கூற வேண்டுமாம்.

அதேவேளை கிரண்ட்பாஸ் பள்ளிவாசல் தாக்கப்படுவதற்கு முன்னர் அருகிலிருந்த பௌத்த விகாரையில் மணி அடிக்கப்பட்டு, ஆட்கள் திரட்டப்பட்டு, விகாரையிலிருந்து வெளிக்கிளம்பிய காடையர் கூட்டமே கிரன்ட்பாஸ் பள்ளிவாசலை தாக்கியதாக கண்கண்ட சாட்சிகளும், வீடியோ ஆதாரங்களும் நிரூபித்துள்ளமை குறிப்பிடத்தக்கது.