அன்புள்ள இஸ்லாமிய சகோதரர்களுக்கும், நண்பர்களுக்கும்..!

கருத்து வேறுபாடுகளும் முரண்பாடுகளும் குழுப் பிரிவினைகளும் சமூகத்தினுடைய பிளவிற்கே வழிகோலும்...!!நபி (ஸல்) அவர்கள் தன் இறுதி உரையான '' ஹஜ்ஜதுல் விதா '' வில் முஸ்லீம்களை குறைந்த பட்சம் " அறபியாகவோ அஜமியாகவோ " பிரிந்து விடாதீர்கள் என்றார்கள்...!!

இஸ்லாம் மார்க்கமானது அல்லாஹ்வால் சொல்லப்பட்டு நபியவர்களால் வாழ்ந்து காட்டப்பட்ட அழகிய வாழ்க்கைக் கலை.அல்லாஹ்வால் சொல்லப்பட்டதும் நபிகளாரினால் வாழ்ந்து காட்டப்ப்டட்டது தவிர மற்றைய அனைத்தும் புனையப்பட்டது என்பது என் கருத்து.

கருத்து முரண்பாடுகள் வருகிற போது சமூகத்திற்கு ஏற்பவும் சமூக நன்மைகள் கருதியும் குழப்பங்கள் ஏற்படுகின்ற அளவிற்கு இல்லாமலும்  எடுக்கப்படுகின்ற முடிவுகள் அமைய வேண்டும்.அதற்கு அத்தனை சமூகமும் ஒத்திசைய வேண்டும்.

முஸ்லீம் சமூகத்தினுள் விதைக்கப்பட்டிருக்கின்ற குழுப்பிரிவினைகள் அமைப்புக்கள் அத்தனையும் களைந்தெறியப்பட்டு " அனைவரும் முஸ்லீம்கள் " என்ற பொதுவான மிகப்பெரும் குடையின் கீழ் ஒன்றிணைய வேண்டும்.

இன்றைய நிலையில் முரண்பாடுகள் மட்டும் இஸ்லாம் என்ற அளவிற்கு சமூகம் வந்திருக்கிறது.இது அவ்வளவு தூரத்திற்கு ஆரோக்கியமான நிலைப்பாடு அல்ல....!!முழு உலக சமூகத்திற்கும் நற்செய்தியாக அருளப்பட்ட இஸ்லாத்தில் இருக்கும் செய்தியை மற்ற சமூகத்திற்கு எத்தி வைக்காமல் அதில் இருப்பவர்கள் அதில் முரண்பட்டு காலத்தைக் கடத்துவது கேவலமான நிலைப்பாடாக எனக்குத் தெரிகிறது.

மற்ற சமூகத்திற்கு நற்செய்தியை சொல்லாதது பற்றிய விசாரணைகளுக்கான பிடி அல்லாஹ்விடத்தில்  கடுமையாகவே இருக்கும் என்பதை சமூகமும் பெரியார்களும் மறந்து விட்டார்கள் போலும்..!

எத்தனை பள்ளிவாயல்கள் உடைக்கப்பட்டாலும் ஏன் இலங்கையில் இருக்கும் அத்தனை பள்ளிவாயல்களும் மூடப்பட்டாலும் பரவாயில்லை இறையச்சம் மிகுந்த தொழுகையாளர்களை உருவாக்க முயற்சிப்போம்..!!

பேணுதல் மிக்க இஸ்லாமிய யுவதிகளையும் இளைஞர்களையும் உருவாக்குவோம்...!!

ஹராம் ஹலால் பேணுகின்ற சமூகத்தை உருவாக்குவோம்..!!

அல்லாஹ்வின் மீது அன்பும் பயமும் சம அளவில் வைக்கக் கூடிய சமூகத்தை உருவாக்க முயற்சிப்போம்...!!

நபியவர்களின் வாழ்க்கையை பேணுதலாக பேணும் சமூகத்தை உருவாக்க முயற்சிப்போம்...!!

வயதில் பெரியாருக்கு மரியாதை செலுத்தும் மற்றும் சிறியோருக்கு அன்பு காட்டும் சமூகத்தையும் இல்லாதோருக்கு கொடுத்துதவும் சமூகத்தை உருவாக்குவோம்.....!!

இறையச்சம் மிகுந்த சமூகத்தை உருவாக்குவோம்...!!

மற்ற மதத்தையும் அவர்களால் வணங்கப்படுகின்ற சமூகத்தையும் அவர்கள் உணர்வுகளை மதிக்கக் கூடிய சமூகத்தைய் உருவாக்குவோம்....!!

சிறந்த அரசியல்வாதிகளையும் கன்விமான்களையும் எம் சமூகத்தில் உருவாக்குவோம்....!!

சமூகம் சாக்கடைப் பாதைக்கு சென்று கொண்டிருக்க எங்கள் ஒவ்வொருவரின் சுய கொள்கைகளுக்காகவும் கருத்துகளுக்காகவும் சண்டை பிடித்துக் கொண்டிருப்பது அவ்வளவு ஆரோக்கியமல்ல....!!

தொழுகையில் குனூத் ஓதுவதும் அத்தஹிய்யாத்தில் விரலாட்டுவதும் பிரச்சனை அல்ல..எம்மால் நிறைவேற்றப்படுகின்ற தொழுகை இறையச்சம் உள்ளதா என்பதும் அல்லாஹ்விடத்தில் ஏற்றுக் கொள்ளப்படும் வகையில் அமைகிறதா என்பதும் தான் பிரச்சனை என்பதை எம் சமூகம் உணர்ந்து அதனடிப்படையில் தொழுகைகளை நிறைவேற்றுவோம்...!!

பிறை பார்ப்பதும் அதற்கு சண்டை பிடிப்பதும் அல்ல பிரச்சனை பிடிக்கப்பட்ட நோன்பு அல்லாஹ்விடத்தில் எங்களுக்கு பரிந்துரை செய்யுமளவில் எங்கள் நோன்புகளை ஆக்கிக் கொள்ள வேண்டும்...!!

சமூகத்தில் ஆக்கபூர்வமாக ஆக்கிக் கொள்ள ஆயிரமாயிரம் இருக்கிறது தோழர்களே...!!

எதெதற்கோ சண்டை பிடிக்கும் முஸ்லீம்கள் நாளை அல்லாஹ்வையும் ரசூலையும் தங்கள் அமைப்புகளிற்காக பேரம் பேசாதிருக்கட்டும் அல்லது சந்ததிகளை உருவாக்காமல் இருக்காடும்.!

முரண்பாடுகளுக்காக ஒன்று சேரும் சமூகமாக இல்லாமல் பொதுவான கருத்துகளில் ஒன்றிணைய முயற்சிக்க அழைப்பு விடுக்கிறேன். 

எழுத்தாற்றல் மிக்க நண்பர்கள் சமூகத்தில் நச்சு கருத்துகளை விதைக்காமல் நல்லதை பொதுவானதை மட்டும் எழுதட்டும்.

இப்படிக்கு

எந்த அமைப்பையும் சாராமல் ஒரு முஸ்லீம் என்ற அடிப்படையில் பிளவுகளை விரும்பாத நண்பன்..

Thouseef Ahmed