விமானத்தின் கதவை நடுவானில் திறப்பதற்கு நான் ஒன்றும் முட்டாள் அல்ல - அமைச்சரின் மகன்

தூக்கத்தில் நடந்து சென்றே விமானத்தின் கதவைத் திறக்க முயன்றதாக, அமைச்சர் கெஹலிய ரம்புக்வெலவின் மகனும் சிறிலங்கா துடுப்பாட்ட அணி வீரருமான ரமித் ரம்புக்வெல தெரிவித்துள்ளார். 

பிரிட்டிஸ் எயர்வேய்ஸ் விமானம் 35 ஆயிரம் அடி உயரத்தில் பறந்து கொண்டிருந்த போது, ரமித் ரம்புக்வெல மதுபோதையில் விமானத்தின் கதவைத் திறக்க முயன்ற சம்பவம் உலகெங்கும் பரபரப்பை ஏற்படுத்தியுள்ளது. 

இந்தநிலையில், இதுகுறித்து கருத்து வெளியிட்டுள்ள ரமித் ரம்புக்வெல, 

“நான் அப்போது மது அருந்தியிருக்கவில்லை. தூக்கத்தில் நான் என்ன செய்கிறேன் என்பதை அறியாமல் செய்யும் பழக்கம் சிறுவயதில் இருந்தே உள்ளது. அப்படித் தான், விமானத்தின் வெளிப்புறக் கதவைத் திறக்க முயன்றுள்ளேன். பின்னர் தான் நான் என்ன நடந்தது என்று புரிந்து கொண்டேன். 

எமது இறுக்கமான நிகழ்ச்சி நிரல் காரணமாக முதல் நாள் தூங்க முடியவில்லை. அதனால் நாம் மிகவும் சோர்வாக இருந்தோம்.  விமானத்தின் கதவை நடுவானில் திறப்பதற்கு நான் ஒன்றும் முட்டாள் அல்ல.  நான் மதுபாதையில் இருந்ததாக குற்றம்சாட்டுபவர்கள் மருத்துவ அறிக்கை வரும் வரை பொறுத்திருக்க வேண்டும்.” என்றும் அவர் மேலும் தெரிவித்துள்ளார். 

அதேவேளை, தனது மகன் மது அருந்துபவன் அல்ல என்று அமைச்சர் கெஹலிய ரம்புக்வெலவும் தெரிவித்துள்ளார். 

கழிவறைக் கதவும், விமானத்தின வெளிப்புறக் கதவும் அருகருகாக இருந்ததால், தவறுதலாக அவர் அதனை திறக்க முயன்றுள்ளார். எனது மகனுக்கு இது தான் முதல் விமானப் பயணம் அல்ல,” என்றும் அவர் மேலும் கூறியுள்ளார்.