நீதவான் மனாபுக்கு எதிராக லஞ்ச ஊழல் ஆணைக்குழுவிடம் முறைப்பாடு

அக்கரைப்பற்று நீதவான் நீதிமன்ற முன்னாள் நீதவானும், தற்போது மட்டக்களப்பு மாவட்ட நீதவானாகக் கடமையாற்றுகின்றவருமான ரி.எல்.ஏ. மனாப் என்பவருக்கு எதிராக லஞ்ச ஊழல் ஆணைக்குழுவிடம் எழுத்து மூலமாக முறைப்பாடு செய்யப்பட்டுள்ளது. 

தென்கிழக்குப் பல்கலைக்கழகத்தின் கலைப்பீட முன்னாள் மாணவத் தலைவரும், அட்டாளைச்சேனை பிரதேச செயலகத்தில் தற்போது திட்டமிடல் உதவிப் பணிப்பாளராகக் கடமையாற்றுகின்றவருமான ஏ.எல். அஸ்லம் என்பவரே மேற்படி முறைப்பாட்டினை செய்துள்ளார்.

சுமார் 07 வருடங்களுக்கு முன்னர் இடம்பெற்ற வழக்கு விசாரணையொன்றின்போது, மேற்படி நீதவான் மனாப் என்பவர் தனது விருப்பு வெறுப்புக்கிணங்க செயற்பட்டு, அநீதியாக நடந்து கொண்டார் என்றும், இதனால் அந்த வழக்கின் சந்தேக நபர்களுள் ஒருவரான தான் கடுமையாகப் பாதிக்கப்பட்டதாகவும் தெரிவித்தே - அஸ்லம் என்பவர் லஞ்ச ஊழல் ஆணைக்குழுவுக்கு முறைப்பாடு செய்துள்ளார்.

இவ்விடயம் தொடர்பில் மேலும் தெரிவிக்கப்படுவதாவது,

தென்கிழக்குப் பல்கலைக்கழகத்தின் உபவேந்தராக கடமையாற்றிய ஏ.ஜி. ஹுசைன் இஸ்மாயில் என்பவரின் வாகனத்தின் மீது 2006 ஆம் ஆண்டு துப்பாக்கிச் சூட்டுச் சம்பவமொன்று இடம்பெற்றிருந்தது. 

இதனையடுத்து மேற்படி சம்பவத்தில் சம்பந்தப்பட்டார்கள் எனும் சந்தேகத்தின் பேரில், பல்கலைக்கழகத்தின் தாபனப் பிரிவுக்குப் பொறுப்பான சிரேஷ்ட உதவிப் பதிவாளர் எச்.எம். சத்தார் (தற்போது பல்கலைக்கழக பதிவாளராகக் கடமையாற்றுகின்றார்), பண்டகக் காப்பாளர் அப்துல் ஹலீம் மற்றும் பல்கலைக்கழகத்தின் அப்போதைய மாணவர் (அட்டாளைச்சேனை பிரதேச செயலகத்தின் தற்போதைய திட்டமிடல் உதவிப் பணிப்பாளர்) ஏ.எல். அஸ்லம் ஆகியோரை பொலிஸார் கைது செய்து, அக்கரைப்பற்று நீதவான் நீதிமன்றத்தின் ஆஜர் செய்தனர். 

இதன்போது, அக்கரைப்பற்று நீதவான் நீதிமன்றத்தின் நீதவானாகக் கடமையாற்றிய ரி.எல்.ஏ. மனாப் என்பவர் - சந்தேக நபர்களில் ஒருவரான பல்கலைக்கழகத்தின் தாபனப் பிரிவுக்குப் பொறுப்பான சிரேஷ்ட உதவிப் பதிவாளர் எச்.எம். சத்தார் என்பவரை பிணையில் செல்ல அனுமதித்ததோடு, ஏனைய சந்தேக நபர்கள் இருவரையும் 14 நாட்கள் விளக்க மறியலில் வைக்குமாறு உத்தரவிட்டார்.

மேற்படி நீதவான் மனாப் என்பவர் இவ் விவகாரத்தில் பக்கம் சார்ந்தும், அநியாயமாகவும் நடந்து கொண்டதாக அந்த வழக்கின் சந்தேக நபர்களில் ஒருவரான அஸ்லம் என்பவர் தற்போது லஞ்ச ஊழல் ஆணைக்குழுவுக்கு முறையிட்டுள்ளார். 

குறித்த வழக்கு இடம்பெற்ற காலப்பகுதியில் மேற்படி நீதவான் ரி.எல்.ஏ. மனாப் என்வர் தென்கிழக்குப் பல்கலைக்கழகத்தின் அரபு இஸ்லாமிய பீட சபை உறுப்பினர்களில் ஒருவராகவும் பதவி வகித்திருந்ததாக முறைப்பாட்டில் தெரிவிக்கப்பட்டுள்ளது. 

நீதவான் மனாப் என்பவரை தென்கிழக்குப் பல்கலைக்கழகத்தின் அரபு இஸ்லாமிய பீடத்தின் சபை உறுப்பினராக, பல்கலைக்கழகத்தின் அப்போதைய உபவேந்தர் ஹுசைன் இஸ்மாயில் என்பவர்தான் நியமித்திருந்ததாகக் கூறப்படுகிறது. இதேவேளை, வழக்கின் பிரதான சாட்சியாளரான - அரபு இஸ்லாமிய பீடத்தின் அப்போதைய பீடாதிபதி எம்.எஸ்.எம். ஜலால்தீன் மௌலவி என்பவர் - வழக்கை விசாரணை செய்த நீதவான் மனாப் என்பவரின் உறவினராவார் என்றும் லஞ்ச ஊழல் ஆணைக்குழுவுக்கு அனுப்பி வைக்கப்பட்டுள்ள முறைப்பாட்டில் மேலும் குறிப்பிடப்பட்டுள்ளது. 

மேற்கூறப்பட்ட விடயங்களின் அடிப்படையில், குறித்த வழக்கினை விசாரணை செய்த நீதவான் மனாப் என்பவர், தென்கிழக்குப் பல்கலைக்கழகத்தின் அப்போதைய உபவேந்தருக்கு சார்பாக மேற்படி வழக்கில் செயற்பட்டு, தன்மீது நீதியை வேண்டுமென்றே பிழையாகப் பிரயோகித்தார் என தெரிவித்து – சுமார் 07 வருடங்களின் பின்னர் வழக்கின் சந்தேக நபர்களில் ஒருவரான அஸ்லம் என்வர் தற்போது லஞ்ச ஊழல் ஆணைக்குழுவுக்கு குறித்த முறைப்பாட்டினை அனுப்பி வைத்துள்ளார்.

இதேவேளை, போதிய சாட்சியங்கள் இல்லாமை காரணமாக, சட்டமா அதிபரின் அறிவுறுத்தலுக்கிணங்க 2009 ஆம் ஆண்டு மேற்படி வழக்கிலிருந்து சந்தேக நபர்கள் அனைவரும் விடுவிக்கப்பட்டு, வழக்கு தள்ளுபடி செய்யப்பட்டமை குறிப்பிடத்தக்கது.