கல்முனை வைத்தியசாலையில் பௌத்த விகாரை நிர்மாணிக்கப்படுமா..?

(யு.எம்.இஸ்ஹாக்)

வைத்தியசாலை என்பது நோயாளிகளை சுகதேகிகளாக ஆக்குகின்ற சேவையை செய்கின்ற ஓர் இடமாகும். அரசியலுக்கோ தனிநபர் விருப்பு வெறுப்புகளுக்கோ வைத்திய சாலைகள் இயங்குவதில்லை. ஆனால் கிழக்கு மாகாணத்தில் உள்ள பல வைத்திய சாலைகளின் செயற்பாடுகள் அரசியல் தலையீடு உள்ளதாகவும்,இனப் பாகுபாடு உள்ளனவாகவும் காணப்படுவதால் நோயாளிகளுக்கு சேவை செய்வது தவிர்க்கப்பட்டு ஆர்ப்பாட்டங்களும் எதிர்ப்பு நடவடிக்கைகளும் நிறைந்த இடமாக வைத்தியசாலைகள் மாறி வருகின்றன.

இவ்வாறானதொரு நிலைதான் கல்முனை வடக்கு ஆதார வைத்திய சாலைக்கும் ஏற்பட்டுள்ளது. கடந்த ஐந்து வருடங்களாக கல்முனை வடக்கு ஆதார வைத்தியசாலையில் தொடரான எதிர்ப்பு ஆர்ப்பாட்டங்கள் இடம் பெற்றதையும் வைத்திய அத்தியட்சகர்கள் இடமாற்றப்பட்டு புதிய அத்தியட்சகர்கள் நியமிக்கப் பட்டதையும் நாம் அறிந்ததே.

இதன் அடிப்படையில் கல்முனை வடக்கு ஆதார வைத்திய சாலையின் புதிய அத்தியட்சகராக டாக்டர் ஜெயசிங்க என்பவர் நியமிக்கப்பட்டுள்ளார். ஏற்கனவே அத்தியடசகராக கடமை புரிந்த வைத்திய அத்தியட்சகர் டாக்டர் எம்.எஸ்.எம்.ஜாபிர் காத்தான்குடி வைத்திய சாலைக்கு இடமாற்றப்பட்டதையடுத்து அந்த வெற்றிடத்துக்கு அம்பாறை வைத்தியசாலை அத்தியட்சகரான ஜெயசிங்க பதில் வைத்திய அத்தியட்சகராக கல்முனை வடக்கு வைத்தியசாலைக்கு நியமனம் செய்யப்பட்டு சமீபத்தில் கடமைகளை பொறுப்பேற்றுள்ளார்.

நூறாண்டு வரலாறு கொண்ட கல்முனை வடக்கு ஆதார வைத்திய சாலை பிரதேசத்தில் வாழும் தமிழ்,முஸ்லிம் மக்களுக்கு அளப்பரிய சேவைகளை செய்து வருவதை யாராலும் மறுக்க முடியாது. இவ்வைத்திய சாலையின் பணிப்பாளர்களாக சிறுபான்மை இனத்தைச் சேர்ந்தவர்களே கடமையாற்றி வந்துள்ளனர். எனினும் சில வருடங்களாக அவர்களை இடமாற்ற வேண்டும் என்ற கோசங்களினால் வைத்தியசாலையில் நிர்வாக சீர் கேடுகள் இடம் பெற்றதையும் அனைவரும் அறிய முடிந்தது.

கடந்த 2010 இல் வைத்திய அத்தியட்சகராக கடமை புரிந்த டாக்டர் எஸ்.இராஜேந்திரனை உடனடியாக இடமாற்றம் செய்யப்பட வேண்டும் என பல குற்றச் சாட்டுக்களை தெரிவித்து சிலரால் ஆர்ப்பாட்டம் செய்யப்பட்டு அவர் களுவாஞ்சிகுடி வைத்தியசாலைக்கு இடமாற்றப்பட்டார். அந்த வெற்றிடத்துக்கு வைத்திய அத்தியட்சகராக டாக்டர் எம்.எஸ்.எம். ஜாபிர் நியமிக்கப்பட்டதன் பின்னர் சிறிது காலம் பிரச்சினைகள் இன்றி வைத்தியசாலை செயற்பாடுகள் சீராக இயங்க தொடங்கியது. எனினும் மீண்டும் இரண்டு வருடங்களின் பின்னர் அதே குழுவினர் டாக்டர் ஜாபிரையும் இடமாற்ற வேண்டும் என அதே பாணியில் தொடர் ஆர்ப்பாட்டங்களை செய்து அவரையும் இடமாற்றம் செய்துள்ளனர். தமிழர்களும் முஸ்லிம்களும் செறிந்து வாழும் பிரதேசத்தில் உள்ள வைத்திய சாலைக்கு அதே இனத்தை சேர்ந்த ஒருவர் வைத்திய அத்தியட்சகராக  இருக்கக் கூடாதென நினைத்தா இவர்கள் ஆர்ப்பாட்டம் செய்தனர் என்ற கேள்வி இப்பொழுது எழுந்துள்ளது.

இந்த ஆர்ப்பாட்டங்கள் செய்து வைத்திய அத்தியட்சகர்கள் இருவரையும் இடமாற்றம் செய்ய வேண்டும் என எண்ணங் கொண்டவர்களின் உள் நோக்கங்கள் பல தற்போது அம்பலத்துக்கு வரத் தொடங்கியுள்ளன. இதற்கு வைத்திய சாலையில் கடமை புரியும் அதிகாரிகளும்,ஊழியர்கள் சிலரும் உடந்தையாக இருந்துள்ளனர். வெளிநோயாளர்களை பார்வையிடும் சில வைத்தியர்களுக்கும், கடமை நேரத்துக்கு முன்னதாக வீடு செல்லும் சில தாதியர்களும்,ஊழியர்களும் அவ்வாறு சென்றும் மேலதிக நேரக் கொடுப்பனவு பெற்று வந்தவர்களுமே நிர்வாக முடக்கத்தை ஏற்படுத்த இவ்வாறான செயற்பாட்டில் இறங்கியுள்ளனர். இதற்கு உடந்தையாக சில தமிழ் அரசியல்வாதிகளும் உடந்தையாக இருந்துள்ளனர்.

சிறுபான்மை சமுகங்களின் உரிமைக்காகவும் அவர்களது விடிவுக்காகவும் குரல் கொடுக்கும் தமிழ் அரசியல் தலைமைத்துவங்கள் கூட சிறுபான்மை வைத்திய அத்தியட்சகர்களை இடமாற்றம் செய்யவேண்டும் என்ற விடயத்தில் விடாப்பிடியாக இருந்தமை வருந்ததக்க விடயமாகும்.  இதனால் வைத்திய சாலையில் தமிழ் முஸ்லிம் உறவுக்கு கூட பாதிப்பு ஏற்பட்டிருந்தது. கடமை புரிந்த வைத்தியர்களை இடமாற்றம் செய்ய முயற்சி செய்தவர்கள் அவர்கள் தவறு செய்தவர்களாக உறுதிப்படுத்தப் பட்டிருந்தால் மேலும் ஒரு சிறுபான்மை இனத்தைச் சேர்ந்தவரை அந்த இடத்துக்கு கொண்டு வந்திருக்க வேண்டும். ஆனால் அதனை செய்யத் தவறிவிட்டு வேட்டி கட்ட கனவு கண்டு கோவணத்தையும் கையிழந்த நிலைக்கு இன்று கல்முனை வைத்தியசாலையின் நிலை மாறியுள்ளது.

புதிதாக கடமையேற்றுள்ள வைத்திய அத்தியட்சகர் டாக்டர் ஜெயசிங்க முன்னயவர்கள் விட்ட இடத்திலிருந்தே கடமைகளை செய்யத் தொடங்கியுள்ளார். பலருக்கு வரவுப் பதிவேட்டில் சிவப்புக் கோடு போடத் தொடங்கியுள்ளார். நிர்வாகம் என்றால் என்னவென்பதை கற்றுக் கொள்ள அம்பாறை வைத்தியசாலைக்கு கல்முனை வைத்தியசாலையில் கடமையாற்றுபவர்களை பயிற்சிக்கும் அனுப்பி எடுத்து வருகின்றார்.  இப்போது இவரையும் பிடிக்காத நிலையொன்று வைத்தியசாலையில் தோன்றி வருவதாக சில ஊழியர்கள் தெரிவிக்கின்றனர்.

மேலும் அங்கு கடமையாற்றும் சிங்கள வைத்தியர்களும், தாதியர்களும் வைத்திய அத்தியட்சகரிடம் கோரிக்கையொன்றை முன் வைத்திருப்பதாகவும் தெரிவிக்கப்படுகின்றது. வைத்திய சாலையில் வழிபாட்டுக்காக கோயிலும், பள்ளிவாசலும் உள்ளது நாங்கள் வழிபட பௌத்த ஆலயமொன்றை வைத்தியசாலை வளாகத்தில் நிர்மாணிக்குமாறு கேட்டுள்ளதாக கூறப்படுகின்றது. அவ்வாறு பௌத்த ஆலயம் நிர்மாணிக்கப்படுவதற்கு வைத்திய அத்தியட்சகர் சம்மதம் தெரிவிக்கும் பட்சத்தில் சிறுபான்மை இன வைத்திய அத்தியட்சகர்களை இடமாற்றம் செய்ய ஆர்ப்பாட்டம் செய்தவர்கள் பெரும் பான்மை இன வைத்திய அத்தியட்சகரையும் இடமாற்றம் செய்ய முன் வருவார்கள். அந்த நேரத்தில்தான் அவர்கள் செய்த தவறு மற்றவர்  பல்லை விட நமது முரசு நமக்கு மேலானது என்ற எண்ணம் தோன்றும்.