முஸ்லிம்கள் மன்னிப்பு வழங்கினர் - பெஷன்பக் விவகாரம் இணக்கத்திற்கு வந்தது

பெஷன்பக் தாக்குதல் தொடர்பான சம்பவம் நுகேகொடை நீதிமன்றில் இணக்கத்துக்குக் கொண்டு வரப்பட்டுள்ளது.

இன்று (2.4.2013) நுகேகொடை நீதவான் அஜித் எம் மாசிங்க முன்னிலையில் மூன்று பிக்குகள் உற்பட 17 சந்தேக நபர்கள் ஆஜர் செய்யப்பட்டனர்.

சிரேஷ்ட பொலீஸ் அத்தியட்சகர் அனுர சேனாநாயக்கா சம்பவத்துடன் தொடர்புடையவர்களை நீதிமன்றத்தில் ஆஜர்படுத்தினார்.

இது தொடர்பாக நீதவான் தெரிவித்ததாவது,

சமயத் தலைவர்கள் அமைதி சமாதானம் என்பவற்றைக் கடைப்பிடித்து சமய கோட்பாட்டிற்கு முன் உதாரணமாக இருக்க வேண்டும். பௌத்தர்கள் பௌத்த தர்மத்தின் படி வாழவேண்டும் என்றும் தெரிவித்து 17 சந்தேக நபர்களையும் விடுதலை செய்தார்.

இதுகுறித்து பெஷன்பக் நிறுவனத்தின் முக்கிய அதிகாரி ஒருவர் ஜப்னா முஸ்லிம் இணையத்திற்கு கருத்து தெரிவிக்கையில்,

நாங்கள் இன்று நீதிமன்றத்திற்கு சென்றிருந்தோம். நீதிபதி முன் பெஷன்பக் தாக்குதலின் சூத்திரதாரிகள் ஆஜர் செய்யப்பட்டனர். இந்த சம்பவத்துடன்  தொடர்புடையவர்களின் குற்றங்கள் வாசிக்கப்பட்டன. அவர்கள் தமது கைகளை உயர்த்தி, தாம் புரிந்த குற்றங்களை ஏற்றுக்கொண்டனர்.

பெஷன்பக் மீது அவர்கள் தாக்குதல் நடாத்தியதன் குற்றத்தை நீதிபதியின் முன் ஏற்றுக்கொண்டமையால் நாம் அவர்களை மன்னித்தோம். முஸ்லிம் சமூகத்தினதும், இன ஐக்கியத்தையும் கவனத்திற்கொண்டு நாம் இந்த தீர்மானத்தை மேற்கொண்டோம் என்றார்.

இவ்வழக்கில் பின்வருவோர் முக்கிய சந்தேக நபர்களாகப் பெயர் குறிப்பிடப்பட்டிருந்தனர்.

கொரலவெல்ல புரான ரஜமகா விகாரையின் தம்பஹல ராஹூல, கல்கிஸ்ஸ தெலவெல சிரிவிஜயதர்மா ஆயதனயே தம்பஹல ஞானரத்ன, கொரலவெல்ல புரான ரஜமகா விகாரையின்  அனுராதபுர பாலித, ஆகிய தேரர்களும், பெபிலியான டி.எம்.எம். பிரேமகுமார, பெபிலியானே சஜித் லக்மால் (கொமினிகேஷன் உரிமையாளர்),  திவுலபிட்டியே பி.கே. சந்திரசிரி (வர்த்தகர்), பிரபாத் ஜயசாந்த , திவுலபிட்டியே ஈ.கே.சம்பிக,கொஹூவெல லலித் தர்மபிரிய,  பொரலஸ்கமுவே ரனில் பிரனாந்து(முச்சக்கரவண்டி சாரதி),  பிரசன்ன விமல் த சில்வா (விகாரையின் ஊழியர்) முதலானவர்கள் பிரதானமானவர்களாகும்.