ஹலால் விட்டுக் கொடுப்பும், உண்மையான முஸ்லிமும்...!

இலங்கை முஸ்லிம்களுக்கெதிரான கெடுபிடிகளில் சிக்கித்தவித்த 'ஹலால்' விவகாரம் ஜம்இய்யதுல் உலமாவின் விட்டுக் கொடுப்பினால், தாய் நாட்டுப்பற்றை மீண்டுமொருமுறை இலங்கை மண்ணுக்கு உணர்த்திவிட்டனர் முஸ்லிம்கள். 

உண்மையில் ஜம்இய்யதுல் உலமாவின் இந்த விட்டுக்கொடுப்பு பெரும்பாலானவர்களுக்கு கஷ்டமான ஒரு முடிவாகவே இருந்திருக்கும் என்பதில் சந்தேகமில்லை. இந்த ஹலால் விவகாரம் இலங்கை முஸ்லிம்களுக்கு பல விடயங்களை உணர்த்திவிட்டு சற்று ஓய்வெடுத்துக் கொண்டுள்ளது. கடந்த நிகழ்வுகளோடு ஒப்பிட்டு எம்மை சரிபார்த்து மீள்கட்டமைத்துக் கொள்ள இதனை ஒரு சந்தர்ப்பமாக பயபடுத்திக்க கொள்வோமாக.

ஜம்இய்யதுல் உலமாவின் இந்த முடிவை உளப்பூர்வமாக ஏற்றவனாக, இரண்டு ரக்கஅத்துக்கள் தொழுதுவிட்டு 'யா அல்லாஹ்! இலங்கை முஸ்லிம்கள் உன்னுடைய மார்க்கக் கடமையொன்றிற்காகவே இதுவரை போராடினார்கள். நிலத்தை அபகரிக்கவோ, ஆட்சி அதிகாரங்களை கைப்பற்றவோ, பதவிகளை பட்டங்களைப் பெற வேண்டுமென்பதற்காகவோ அவர்கள் போராடவில்லை. உன்னுடைய நபிமார்களின் வாரிசுகளாகிய உலமாக்களின் உன்னத முடிவினை திருப்தியுடன் ஏற்றுக்கொண்டவானாக உன்னிடம் நல்ல முடிவுகளை எதிர்பார்த்து இறைஞ்சுகின்றேன். 

யாஅல்லாஹ்! உலமாக்களின் இந்த செயலைப் பொருந்திக் கொள்வாயாக. உண்மையான உனது வழிகாட்டலின் பக்கம் எம்மை வழிநடத்தக் கூடியவர்களாக அவர்களை பொருந்திக் கொள்வாயாக. முஸ்லிமல்லாத பலர் ஹலால் விடயத்தில் முஸ்லிமகளுக்கு ஆதரவாக குரல் கொடுத்தார்கள். அவர்களுக்கும் நீ உனது அருளைச் சொரிவாயாக என்று' புனித கஃபாவைப் பார்த்தவனாக கனத்த இதயத்துடன் கண்ணீர் மல்க பிரார்த்தித்து எல்லாவற்றையும் அல்லாஹ்விடம் சுமத்தியவனாக அன்றாட அலுவல்களில் ஈடுபடலானேன்.

ஹலால் விவகாரத்தில் நாம் தோற்றோமா அல்லது வென்றோமா என்பதல்ல முக்கியம். இந்த விவகாரத்தோடு எதிர்காலத்தில் நாம் எவ்வளவு தூரம் ஒத்துழைக்கப் போகின்றோம் என்பதுவே முக்கியம். பௌத்த பேரினவாதிகள் எதிர்பார்க்கின்ற சம்பிரதாய முஸ்லிம்களாக இருப்பதா? அல்லது அல்லாஹ்விற்கும் அவனது தூதரிற்கும் மாத்திரம் அடிபணியக் கூடிய உண்மையான முஸ்லிம்களாக இருப்பதா? என்பதுவே முக்கியம்.

எமது சமூகத்தில் ஹராமான விடயங்களுக்கு அடிமையாகி இருக்கக் கூடிய பல முஸ்லிம்களை நல்வழிப்படுத்த வேண்டிய பாரிய ஒரு சவால் எம்முன் உள்ளது. வட்டிக்கும், மதுவிற்கும், சூதிற்கும், போதைப் பொருளிற்கும், அதிர்ஷ்ட லொத்தர் சீட்டுகளுக்கும், ஆபாச படங்களுக்கும், பத்திரிகைகளுக்கும் அடிமையாகி இருக்கின்ற பல ஆயிரக்கணக்கான முஸ்லிம்களை விழிப்புணர்வூட்ட கடமைப்பட்டுள்ளோம். 

நாட்டில் உள்ள முஸ்லிம் விரோத போக்கு முஸ்லிம்களுக்கு பல சாதகமான முடிவுகளையே தந்துள்ளமை அல்லாஹ் எம்மீது வைத்துள்ள ஒரு கருனையாகவே பார்க்க கடமைப்பட்டுள்ளோம். எமது எதிர்கால் சந்ததியினரை இந்த சவால்களை எதிர்கொள்ளக் கூடிய தைரியமான ஒரு சமுதாயமாக வளர்த்தெடுக்க கடமைப்பட்டுள்ளோம். 

எமக்கு முதலில் தேவைப்படுவதெல்லாம் ஈமானிய பலமாகும். அது நிச்சியமாக ஒரு முஸ்லிமிடத்தில் இருக்கவே செய்யும். நாம் கோலைகளுக்கு பிறந்தவர்களல்ல. அழியும் இந்த உலகை விட நிரந்தரமான மறுமையில் மாறா நம்பிக்கை கொண்டுள்ள ஈமானிய சமூகம். வல்லரசு இஸ்ரேலுடன் பலஸ்தீன சிறுவனுக்கு கல்லடித்து ஐம்பதாண்டுகளுக்கு மேலாக போராட முடியுமென்றிருந்தால்..... நிச்சியமாக இலங்கை முஸ்லிம்களும் கோழைகளாக இருக்கவே மாட்டார்கள். 

விட்டுக் கொடுப்பு வீணாகாமலிருக்க...!

ஜம்இய்யதுல் உலமாவின் ஹலால் விட்டுக்கொடுப்பு வீணாகாமலிருக்க நாம் இலங்கை முஸ்லிம்கள் என்ற வகையில் என்ன செய்யலாம் என்று சிந்திக்க வேண்டும். இந்த விட்டுக் கொடுப்பிற்கு பல காரணங்கள் இருப்பினும் பிரதானமான விடயமாகப் பேசப்படுவது 'நாட்டில் அமைதியான ஒரு சூழல் எற்பட வேண்டுமென்பதே'. 

அதுவே பிரதான காரணமெனில், அகில இலங்கை ஜம்இய்யதுல் உலமாவின் அனுமதியுடன் மாற்று மதத்தவர்களிடத்து நல்லபிப்பராயத்தை வளர்க்கும் பொருட்டு துண்டுப்பிரசுரங்கள் மூலம் அதனை தெளிவு படுத்தமுடியும். போஸ்டர்கள் மூலம் எமது நியாயத்தை பகிரங்கப்படுத்தலாம். இந்த விவகாரம் மூலம் நல்ல பௌத்தர்களது மனது சங்கடப்பட்டிருக்குமெனில் தமது மண்ணிப்பை கோரலாம். இந்த விவகாரத்தில் முஸ்லிம்களுக்கு சார்பாக செயல்பட்டவர்களுக் தமது நன்றிகளை பகிரங்கப்படுத்தலாம். 

இவ்வாரன அனுகுமுறைகள் எதிர்காலத்தில் முஸ்லிம்களுக்கு சாதகமான பல வழிகளைத் திறந்து தரலாம். இந்த விட்டுக்கொடுப்பின் பின்னரும் முஸ்லிம்களுடன் குரோதத்தை வளர்க்கும் பௌத்த தீவிரவாதிகளை நல்ல பௌத்தர்களே விமர்சிக்கக் கூடிய நிலை உருவாகலாம். இலங்கையில் ஏற்பட்டுள்ள அசாதாரண சூழல் நீங்கி முஸ்லிம்கள் உண்மையான முஸ்லிம்களாக முஃமின்களாக வாழக் கூடிய சூழலை ஏற்படுத்தித் தர ஐவேளைத் தொழுகையின் போதும் பிரார்த்திப்பபோமாக.