அமெரிக்க உதவி இராஜாங்கச் செயலாளர் ஹக்கீமையும், சம்பந்தனையும் சந்திக்கிறார்

உத்தியோகபூர்வ பயணமாக இலங்கைக்கு வந்துள்ள தெற்கு மற்றும் மத்திய ஆசிய விவகாரங்களுக்குப் பொறுப்பான அமெரிக்காவின் உதவி இராஜாங்கச் செயலாளர் ரொபட் ஓ பிளேக், இன்று தமிழ்த் தேசியக் கூட்டமைப்பின் தலைவர் இரா.சம்பந்தன், ஸ்ரீலங்கா முஸ்லிம் காங்கிரஸின் தலைவரும், நீதியமைச்சருமான ரவூப் ஹக்கீம் ஆகியோரைச் சந்தித்து முக்கிய பேச்சுக்களில் ஈடுபடவுள்ளார்.

இவர்களுடனான சந்திப்பையடுத்து பிளேக், அரச தரப்பின் உயர்மட்ட அதிகாரிகளையும் சந்தித்துப் பேச்சு நடத்தவுள்ளார். குறிப்பாக, தமிழ்த் தேசியக் கூட்டமைப்பினருடனான சந்திப்பின்போது ஸ்தம்பிதமடைந்துள்ள அரசியல் தீர்வுப் பயணம், தமிழ் அரசியல் கைதிகளின் விடுதலை விவகாரம், கிழக்கு மாகாண சபைத் தேர்தல் பெறுபேறுகள் ஆகிய உட்பட மேலும் பல விடயங்கள் குறித்தும் அவர் பேச்சு நடத்துவார் என எதிர்பார்க்கப்படுகின்றது.

அத்துடன்,  சமகால பிரச்சினைகள் தொடர்பிலும் பிளேக்குக்கு கூட்டமைப்பு தெளிவுபடுத்தவுள்ளது. அடுத்ததாக, முஸ்லிம் காங்கிரஸுடனான சந்திப்பின் போது கிழக்கு மாகாணசபைத் தேர்தல் விவகாரம் தொடர்பில் பிளேக் முக்கிய கவனம் செலுத்துவார் என்பதுடன், முக்கிய சில விடயங்கள் தொடர்பில் அவர் மு.காவின் நிலைப்பாட்டையும் கேட்டறியவுள்ளார்.

தமிழ்த் தேசியக் கூட்டமைப்பு, மு.கா. ஆகியவற்றுடன் கலந்துரையாடப்பட்ட விடயங்கள் குறித்து அரசுக்குத் தெளிவுபடுத்தவுள்ள பிளேக், இவ்வாறான விடயங்களுக்கு உடன் தீர்வு அவசியம் என்பதையும் அவர் வலியுறுத்துவார் என அறியமுடிகின்றது.