'பெருநாள் தினத்தன்று பள்ளியினுள் களேபரம்' தௌஹீத் - தப்லீக் முறுகல்

ஏ.ஆர்.ஏ.பரீல்

நான் வழமையாக சப்பாத்துகளைக் கழற்றிவிட்டே பள்ளிவாசலினுள் செல்வேன்.  அனைத்து மத நிலையங்களுக்கும் புனித ஸ்தலங்களுக்கும் செல்லும் போது நாம் சப்பாத்துகளைக் கழற்றி விடுவோம். இன்று அதற்குக் கூட அவகாசம் கிடைக்கவில்லை. அந்த அளவிற்குப் பள்ளியில் நிலைமை மோசமாக இருந்தது. இதற்காக நான் வெட்கப்படுகிறேன். இனிமேல் இவ்வாறு நடந்து கொள்ள வேண்டாம். நோன்புப் பெருநாள் வேண்டுகோளாக இதை விடுக்கிறேன்.

இவ்வாறு இறக்குவாணை பொலிஸ் நிலைய உதவி பொலிஸ் பரிசோதகர் மஸிம்புல பள்ளிவாசலினுள் நோன்புப் பெருநாளன்று கலவரத்தில் ஈடுபட்டுக் கொண்டிருந்த இரு பிரிவினருக்கு அறிவுரை வழங்கினார்.

உதவி பொலிஸ் பரிசோதகர் பள்ளிவாசலினுள் அசம்பாவிதங்கள் எதும் ஏற்படாது நிலைமையை சுமுக நிலைக்குக் கொண்டு வந்து அனைவரையும் பள்ளிவாசலுக்குள்ளிருந்து வெளியே வரச் செய்து  அறிவுரை வழங்கினார். ஒற்றுமைக்கு  முஸ்லிம்கள் முன்மாதிரியானவர்கள். ஒற்றுமைக்கு உதாரணமாக நாங்கள் அவர்களையே எடுத்துக் கொள்வோம். நீங்கள் இவ்வாறு நடந்து கொண்டால் பார்ப்பவர்கள் முஸ்லிம்களைப் பற்றி கேவலமாக நினைப்பதோடு சிரிக்கவும் செவார்கள். நிர்வாக சபையைத் தவிர அனைவரும் அமைதியாக வீடுகளுக்கு செல்லுங்கள் என்றார்.

இறக்குவாணை முஹியத்தீன் ஜும்ஆ பள்ளிவாசலில் நோன்புப்பெருநாள் தொழுகைக்காகச் சென்றவர்கள் பெரும் வேதனையுடன் திரும்பிச் சென்றார்கள். பெருநாள் தினத்தன்று இமாம் நிகழ்த்திய குத்பா பிரசங்கத்தையடுத்தே இச்சம்பவம் இடம்பெற்றுள்ளது.

உலகில் பலவிதமான கொள்கைவாதிகள் இருக்கிறார்கள். மக்கள் தமக்குப் பொருத்தமான அல்லது விருப்பமான முறைப்படி அமல்களைச் சரியாகச் செய வேண்டும். வேற்றுமையின்றி ஒற்றுமையாக வாழ வேண்டும். தவ்ஹீது தப்லீக் வாதிகள் என்று வேறுபட்டுக் கொள்ள வேண்டாம். எனது பயான் எந்தப் பிரிவினரையும் ஆதரிப்பதாக அமையாது. நடுநிலையானதாகவே இருக்கும். நான் ஒரு பிரிவினருக்கு சார்பாக பயான் நிகழ்த்துவதில்லை என்று இமாம் பெருநாள் பயானில் தெரிவித்தார்.

பயான் நிகழ்த்தப்பட்டுக் கொண்டிருக்கையில் ஒருவர் எழும்பி இமாமை விமர்சித்தார். குப்தா பிரசாரங்கள் முடிவுற்றதும் பள்ளியில் குழுமியிருந்த இரு பிரிவினருக்கும் இடையில் கலவரம் ஏற்பட்டது. இரு பிரிவினரையும் சமாதானப்படுத்த சிலர் ஒரு மணித்தியாலமாக மேற்கொண்ட முயற்சிகள் சாத்தியப்படவில்லை.

இதனையடுத்தே நிலைமையைச் சமாளிப்பதற்காக பொலிஸாருக்கு அறிவிக்கப்பட்டது. பள்ளிவாசலுக்குள் நுழைந்து நிலைமையைக் கட்டுப்படுத்த வேண்டிய நிலை பொலிஸாருக்கு ஏற்பட்டது. குறிப்பிட்ட பள்ளிவாசலில் இதற்கு முன்பும் இவ்வாறான பல சம்பவங்கள் இடம்பெற்று பொலிஸாரின் தலையீட்டின் பின்பு தீர்வு காணப்பட்டமை குறிப்பிடத்தக்கதாகும். பிரச்சினைக்கு காரணமானவர்களை பொலிஸார் எச்சரிக்கை செதுமுள்ளனர்.

முன்னைய சந்தர்ப்பங்களில் அகில இலங்கை ஜம்இயதுல் உலமா சபையினால் வெளியிடப்பட்டுள்ள பிரகடனம் பள்ளிவாசல் நிர்வாக சபை  உட்பட சம்பந்தப்பட்ட இரு பிரிவினர் முன்னிலையில் வாசிக்கப்பட்டுமுள்ளது. பிரகடனத்துக்கிணங்க இரு பிரிவினரும் அமல்கள் செயும் போது பிரச்சினைகளை ஏற்படுத்திக் கொள்ள வேண்டாமென பொலிஸாரினால் அறிவுறுத்தப்பட்டுள்ளது.

இதனுடன் தொடர்புடையதான மற்றுமோர் சம்பவம் இரண்டு தினங்கள் கடந்து  கடந்த ஆகஸ்ட் மாதம் 21 ஆம் திகதி சுபஹ் தொழுகையின் போது இடம்பெற்றுள்ளது. அன்று பள்ளிவாசல் கதீப் இல்லாத காரணத்தினால் தொழுவிப்பதற்கு தற்காலிகமாக ஒருவர் நியமிக்கப்பட்டிருந்தார். அவர் சமூகமளிக்காத காரணத்தினால் முன்னாள் பரிபாலன சபைத் தலைவரின் மகனை நிர்வாக சபை தொழுவிப்பதற்கு நியமித்திருந்தது. அவர் தொழுவிப்பதை விரும்பாத ஒருவர் அவர் தொழுவிக்க முற்பட்ட போது அவரை தொழுவிக்க வேண்டாமெனத் தடுத்து விட்டார். பின் அவரது தகப்பனாரான முன்னாள் தலைவர் தொழுவிக்க முற்பட்ட போது அவரையும் கீழே  தள்ளி விட்டார். இச்சம்பவம் பிரச்சினையை  உருவாக்கி விடாதவாறு பிரதேச சபை உறுப்பினர் ஒருவர் தலையிட்டு சமாதானப்படுத்தினார்.

அன்றைய தினம் ஜும்ஆ பள்ளிவாசலில் பொதுக்கூட்டம் ஒன்று ஏற்பாடு செயப்பட்டது. இறக்குவாணையிலுள்ள சகல பள்ளிவாசல்களும்  ஒலிபெருக்கி மூலம் இக்கூட்டத்துக்கு அழைப்பு விடுத்தன. கூட்டத்திக்கு ஒரு பிரிவினர் சமூகமளிக்கவில்லை.

கூட்டத்தில் பின்வரும் தீர்மானங்கள் நிறைவேற்றப்பட்டன.

* இறக்குவாணையிலுள்ள சகல மஹல்லா பள்ளிவாசல்களிலும் ஷாபிஈ மதப்படியே அமல்கள் நடத்தப்பட வேண்டும்.

* தப்லீக் தவிர்ந்த எந்தவொரு இயக்கமும் எப்பள்ளியிலும் செல்வாக்கு செலுத்த முடியாது.

*தவ்ஹீத் கொள்கையுடையோர் தொழுகைக்கு வருவது தடை செயப்படக் கூடாது.

* தவ்ஹீத் தொடர்பான பயான்கள் எந்தவொரு பள்ளிவாசலிலும் நடத்தப்படக் கூடாது. அப்பிரிவினர் பயான்களை வீடுகளில் நடத்துவதற்கு ஆட்சேபனை இல்லை.

* ஜும்ஆ பயானுக்கான தலைப்பு வியாழக்கிழமையே கொடுக்கப்பட்டு அதன்படியே பயான் நடாத்தப்பட வேண்டும். மீறினால் கதீப் மீது நடவடிக்கை எடுக்கப்படும்.

* ஜும்ஆ பள்ளிவாசல் சகலருக்கும் சோந்தமானது.

* நிர்வாக சபை சகல மஹல்லாக்களையும் சேர்த்தே அமைக்கப்பட வேண்டும் என்பனவாகும்.

குறிப்பிட்ட பள்ளிவாசலில் பல வருடங்களாக இடம்பெற்று வரும் மதப் பிரிவுகளுக்கிடையிலான விரிசல்கள் தற்போது பள்ளிவாசலில் தொழுபவர்களின் எண்ணிக்கையில் வீழ்ச்சியை ஏற்படுத்தியுள்ளதாகத் தெரிவிக்கப்படுகிறது.

இறக்குவாணையை சேர்ந்த நலன் விரும்பிகள் இப்பிரதேசத்தில் நிலவிக் கொண்டிருக்கும் மதப்பிரிவுகளுக்கிடையிலான முறுகல் நிலைமையை முடிவுக்குக் கொண்டு வருவதற்கான நடவடிக்கைகளில் ஈடுபட்டுள்ளனர்.

கடந்த வாரம் நலன் விரும்பிகள் அகில இலங்கை ஜம்இயத்துல் உலமா சபை மற்றும் முஸ்லிம் சமய கலாசார திணைக்களம் இப்பிரச்சினையில் தலையிட்டு நிலைமையை சீராக்குமாறு கடந்த வாரம் கோரிக்கை விடுத்துள்ளனர்.

அகில இலங்கை ஜம்இயத்துல் உலமா சபை விரைவில் இரத்தினபுரி ஜம்இயத்துல் உலமா சபை பிரதி நிதிகள் இறக்குவாணை பிரதேச தவ்ஹீத், தப்லீக் கொள்கைவாதிகள் மற்றும் புத்திஜீவிகளுக்கான கலந்துரையாடலை விரைவில் நடத்தவுள்ளது.

இதேவேளை அகில இலங்கை ஜம்இயத்துல் உலமா சபை தேசிய ஒத்துழைப்புக்கும் ஒருங்கிணைப்புக்குமாக மாநாடொன்றை விரைவில் இணைப்பாளர் அஷ்ஷெய்க் அகார் மொஹமட் நடத்துவதற்கான ஏற்பாடுகளை மேற்கொண்டுள்ளதாகவும் அறிய முடிகிறது.