'பஷீர் கட்சிப் பதவியை இராஜினாமா செய்யட்டும்' - முஸ்லிம் அரசியல் மீட்பு முன்னணி

 

(முஸ்லிம் அரசியல் மீட்பு முன்னணியின் இந்த அறிக்கை குறித்து மு.கா. தவிசாளர் பஷீர் சேகுதாவூத்தை எமது இணையம் தொடர்புகொண்டு கருத்துக்கேட்க முயன்றபோதும் எமது முயற்சி வெற்றி பெறவில்லை)

 ஸ்ரீ லங்கா முஸ்லிம் காங்கிரஸ் என்ற இயக்கம்  ஆளுமைகளினாலும் வளர்தெடுக்கப்பட்ட இயக்கம். மக்களின் மாபெரும் தியாகங்களால் உருவாக்கப்பட்டது. அதற்காக பெறுமதி மிக்க உயிர்கள் இழக்கப்பட்டிருக்கின்றன. சொத்துக்கள் இழக்கப்பட்டிருக்கின்றன. வியர்வைகளும் இரத்தங்களும் சிந்தப்பட்டிருக்கின்றன.கட்சி எந்த பாதையில் செல்ல வேண்டுமென மக்கள் விரும்பி அதற்காக தியாகங்கள் புரிந்தார்களோ அந்த தியாகங்கள் மறக்கப்பட்டு கட்சியானது தனி நபர்களினது ஆசைகளையும், விருப்பங்களையும் நிறைவு செய்து கொடுப்பதற்கான ஒரு களமாக துஷ்பிரயோகம் செய்யப்பட்டு வருகிறது.

 இதன் வெளிப்பாடே அண்மையில் பசீர் சேகு தாவூத் ஏறாவூரில் முஸ்லிம் காங்கிரசை எதிர்த்துப் போட்டியிடுகின்ற அலி சாகிர் மௌலானாவுக்கு வாக்களிக்க வேண்டுமென வேண்டுகோள் விடுத்தமையாகும் .

 

இந்த இடத்தில் இவ்விருவரினது கரங்களிலும் கடந்த காலங்களில் முஸ்லிம் காங்கிரசின் ஆதரவாளர்களுக்கு எதிராக அவர்கள் கட்டவிழ்த்து விட்ட அட்டூழியங்களின் இரத்தக் கறைகள் படிந்து கிடக்கின்றன என்பதை ஞாபகமூட்ட விரும்புகின்றோம். இதன் மூலம் மக்களின் தியாகங்களின் மூலம் கட்டி வளர்க்கப்பட்ட இந்த இயக்கம் இன்று எந்த நிலைக்கு சென்றுள்ளது? என்பதனை நாம் விளங்கிக் கொள்ள முடியும்.

 பசீர் சேகு தாவூதின் உரையை அடுத்து மக்களிடம் இருந்து கிளம்பிய எதிர்ப்பலைகளையும்,கண்டனங்களையும் சற்றும் எதிர்பார்த்திராத அவர், இன்று தனது பிரதியமைச்சர் பதவியை இராஜினாமா செய்து ஒரு நாடகம் ஆடி இருக்கின்றார். அதன் மூலம் மக்களையும்,ஆதரவாளர்களையும் அமைதிப்படுத்த நினைக்கின்றார்.

மக்கள் கொதித்தெழுந்ததும், கண்டனக்குரல்கள் எழுப்பியதும் பசீர் சேகு தாவூத் அமைச்சுப் பதவி வகிக்கக்கூடாது என்பதற்காக அல்ல. மாறாக பசீர் சேகு தாவூத் என்ற ஒரு தனி நபர் தனது கட்சிப் பதவியை துஷ்பிரயோகம் செய்கின்றார், அதனை இந்தக் கட்சிக்கெதிராகவே பயன்படுத்துகின்றார் என்ற ஆத்திரமும்,விரக்தியுமே காரணமாகும்.

இந்தக் கட்சி யாரினதும் பரம்பரை சொத்து அல்ல.யாருடைய தயவிலும் தங்கியிருக்கின்ற இயக்கமும் அல்ல. யாரும் இந்தக் கட்சியை தங்களது சுய அரசியல் விருப்பு வெறுப்புகளுக்கு பகடைக்காயாகப் பயன்படுத்த ஒருபோதும் அனுமதிக்க மாட்டோம்.

 எனவே,பஷீர் சேகு தாவூத் அவர்கள் உடனடியாக கட்சியின் தவிசாளர் பதவியை இராஜினாமா செய்வதோடு, கட்சியின் அனைத்துப் பொறுப்புகளில் இருந்தும் விலக வேண்டுமெனவும் வேண்டுகோள் விடுக்கின்றோம். இதுவே அவருக்கு சரியான குற்றப் பரிகாரமாக இருக்கும் என கருதுவதோடு எதிர்காலங்களில் இவ்வாறான துரோகத் தனங்கள் நிகழாமல் இந்தக் கட்சியை பாதுகாக்க உதவும் எனவும் கருதுகின்றோம்.