இஹ்வான்களுக்கு சோதனை - எகிப்து தேர்தலில் வாக்களிப்பு மந்தம்

எகிப்து அதிபர் தேர்தலில் ஓட்டுப்பதிவு மந்தமாக இருந்தது. எந்த ஓட்டுச் சாவடியிலும் 15 சதவீதத்திற்கு மேல் ஓட்டுகள் பதிவாகவில்லை.எகிப்து அதிபராக 30 ஆண்டுகளாக கோலோச்சி வந்த முபாரக், பொது மக்களின் கடும் கண்டனம் மற்றும் தொடர் போராட்டம் காரணமாக பதவி விலக நேரிட்டது. அவர் மீது பல்வேறு வழக்குகள் பதிவு செய்யப்பட்டு, தற்போது சிறையில் அடைக்கப்பட்டுள்ளார். அவருக்கு அதிகபட்ச தண்டனையான மரண தண்டனை விதிக்க வேண்டும் என பொது மக்கள், நீதித் துறையை கோரி வருகின்றனர்.

குழு அமைப்பு:நாட்டில் பார்லிமென்ட் செயல்பாடுகளை நீதிமன்றம் முடக்கியது. தொடர்ந்து ராணுவ ஆட்சியாளர்கள் புதிய சட்டத் திட்டங்களை வகுக்க முடிவு செய்து, அதற்காக 100 பேர் கொண்ட குழுவை அமைத்துள்ளனர். இந்நிலையில், எகிப்தில் புதிய அதிபரை தேர்வு செய்வதற்கான தேர்தல் அறிவிக்கப்பட்டது. இதில், முபாரக் ஆட்சியின் போது பிரதமராக பதவி வகித்து, பின்னால் அவரால் பதவியில் இருந்து நீக்கப்பட்ட அகமது ஷாபிக் மற்றும் இஸ்லாமியர்களின் சகோதரர் எனக் கருதப்படும் முகமது மூர்சி ஆகியோர் களத்தில் உள்ளனர்.

ஆர்வமில்லை:நாட்டில் முதல் முறையாக ஒளிவு மறைவின்றி நடைபெறும் முதல் தேர்தல் என்பது குறிப்பிடத்தக்கது. ஆனால், ஆர்வமின்றி வாக்காளர்கள் காணப்பட்டனர். தேர்தலின் முதல்கட்ட ஓட்டுப்பதிவு நேற்று முன்தினம் நடந்தது. மந்தகதியில் நடந்த இந்த ஓட்டுப்பதிவில், 20 சதவீத வாக்காளர்கள் மட்டுமே ஓட்டு போட்டனர்.இரண்டாம் நாள் ஓட்டுப்பதிவு துவங்கியும், வாக்காளர்கள் ஆர்வமின்றியே காணப்பட்டனர். இதுகுறித்து, அந்நாட்டின் வழக்கறிஞர்கள் கூட்டமைப்பினர் விடுத்துள்ள அறிக்கையில், "ஓட்டுச் சாவடிகள் அனைத்திலும் வாக்காளர்கள் ஆர்வமின்றியே காணப்பட்டனர். இதனால், 15 சதவீதத்திற்கும் மேல் ஓட்டுகள் பதிவாகவில்லை' எனக் குறிப்பிட்டுள்ளனர்.

வன்முறை:தேர்தல் ஓட்டுப்பதிவு குறித்து, அந்நாட்டின் தேர்தல் தலைவர் பரூக் சுல்தான் கூறுகையில், "தேர்தல் ஓட்டுப்பதிவின் முதல் நாளில் ஏற்பட்ட வன்முறைகளுக்கு, தேர்தலில் போட்டியிடும் இரு வேட்பாளர்களுமே பொறுப்பு' என்றார்.தேர்தலில் மந்தமான ஓட்டுப்பதிவுக்கு கடும் வெயில் காரணமாக இருக்கலாம் என, தேர்தல் பார்வையாளர்கள் சிலர் தெரிவித்தனர். இதனால், ஓட்டுப்பதிவுக்கான நேரம் இரவு 9 மணி வரை நீட்டிக்கப்பட்டது