கருத்தை கருத்தால் வெல்ல முயலுங்கள் (பதில் கட்டுரை)

அபூ அப்துல்லாஹ்

இந்த பதிலை வரைகின்ற பொழுது 10 பதிலுரைகளை “யாழ்ப்பாண முஸ்லிம் சமூகம் தவறுகளை ஏற்றுக்கொள்ள மறுக்கின்றதா” என்ற ஆக்கத்தில் காணக்கூடியதாக இருக்கின்றது. அவற்றை மிகச்சுருக்கமாக இவ்வாறு தொகுக்கலாம்.

1.முதலாவது பதில்: ஒரு அமைப்பை விமர்சிப்பதாக அமைகின்றது

2.இன்னும் சிலரையும் சேர்த்துக்கொண்டால் நல்லது என்று அமைகின்றது

3.வெளிநாட்டில் இயங்கும் அமைப்பு குறித்து குறிப்பிடப்படவில்லை என்ற கருத்து ஆக்ரோசமாக முன்வைக்கப்பட்டுள்ளது

4.குறித்த ஆக்கம் பொய்யான கற்பனைகளைக் கொண்டுள்ளது என்று குறிப்பிடப்பட்டுள்ளது. அத்துடன் குறித்த ஒருவரே இவ்வாறு எழுதுவதாகவும், மீலாத் விழாவுக்கும் குறித்த ஆக்கத்திற்கும் தொடர்பிருப்பதாகவும் கூறப்பட்டுள்ளது

5.விமர்சனங்களை முழுமையாக முன்வையுங்கள், பொதுவானதாக முன்வைக்காதீர்கள் என்று கூறி, குறித்த ஆக்கத்தின் உட்கருத்தை சரியாக உணர்ந்துகொள்ள அழைக்கின்றது.

6.எழுத்தாளரை சாடுகின்றது, அத்துடன் எழுத்தாளருக்கும் குறித்த அமைப்புக்கும் தொடர்பிருப்பதாக கூறுகின்றது

7.யாழ்ப்பாணத்தில் அநியாயங்கள் நடக்கின்றன என்பதை ஏற்றுக்கொள்கின்றது

8.இஸ்லாம் பின்பற்றப்படவேண்டும் என அழுத்திச் சொல்கின்றது

9.எல்லோரையும் சிந்திக்க வைக்கும் விதத்தில் அமைந்துள்ளது

10.சிலரை படித்த முட்டாள்கள் என்றும் அவர்களால் விளையும் கேடுகள் குறித்தும் பேசுகின்றது.

இந்த பதில்களினூடாக யாழ்ப்பாண முஸ்லிம்களின் விவகாரங்கள் குறித்து கருத்துச்சொல்லும் பெரும்பாலனவர்கள், தமது பலவீனங்களை கருத்துக்களில் வெளிப்படுத்தி விடுகின்றார்கள். இதிலே பதிவிடப்பட்ட எந்தக்கருத்தும் குறித்த ஆக்கத்தின் மையக்கருத்தை விளங்கிக்கொள்ளாது தமது தனிப்பட குரோதங்களை, வெறுப்புகளை வெளிக்காட்டுவதாகவே பதில்களைப் பதிவிட்டுள்ளனர் என்பதி புலனாகின்றது. யாழ்ப்பாண சமூகத்தின் சமூகச்செயற்பாடுகளில் காணப்படும் பலவீனங்களே இதற்கான காரணமாகும்.

குறித்த ஆக்கம் யாழ்ப்பாண முஸ்லிம் சமூகத்தின் மீள்குடியேற்றம் அறிவுபூர்வமாகவும் விஞ்ஞானபூர்வமாகவும் வடிவமைக்கப்படவேண்டிய தேவையை வலியுறுத்தி, அதற்கான ஒரு சில முன்மொழிவுகளையும், கருத்துக்களையும் முன்வைத்துள்ளதோடு, அந்த முன்மொழிவுகளை நடைமுறைப்படுத்த விருப்பங்கொண்ட அமைப்புகளையும் அறிமுகம் செய்கின்றது, இந்த நிலையிலே குறித்த 10 பதில்களும் மேற்படி ஆக்கத்தின் கருத்துக்களை விவாதிக்க மறந்த நிலையில் வேறு எங்கோ செல்வதைக் காண முடிகின்றது.

தயவு செய்து கருத்தை கருத்தால் வெல்ல முயலுங்கள், இங்கே முன்வைக்கப்பட்டுள்ள கருத்துகளில், வழிமுறைகளில் தவறுகள் இருப்பின் சுட்டிக்காட்டுங்கள், அல்லது இதனோடு மேலதிகமாக இணைக்கப்படவேண்டியவை இருப்பின் அதனை எழுதுங்கள், அதுவே யாழ் முஸ்லிம் சமூகத்திற்கு தாங்கள் செய்யும் கருத்து ரீதியான பங்களிப்பாகும், அதனை விடுத்து விழளுக்கு இறைக்கும் தாங்கள்களின் கைதேர்ந்த கலையை இங்கே அரங்கேற்றாதீர்கள்.