பாகிஸ்தான் கிரிக்கெட் அணி - இலங்கை முஸ்லிம்களுக்கு ஒரு எச்சரிக்கை..!!

பாகிஸ்தான் கிரிக்கெட் அணி இன்னும் சில தினங்களில் இலங்கைக்கு வரவுள்ளதாக அறிவிக்கப்பட்டுள்ளது.

இலங்கைக்குக் கிரிக்கெட் பயணம் வரவுள்ள பாகிஸ்தான் அணி 2 டுவென்டி டுவென்டி சர்வதேசப் போட்டிகளிலும், 5 ஒருநாள் சர்வதேசப் போட்டிகளிலும், 3 டெஸ்ற் கிரிக்கெட் போட்டிகளிலும் பங்குபற்றவுள்ளது. முதலாவது போட்டியாக டுவென்டி டுவென்டி போட்டி எதிர்வரும் ஜூன் முதலாம் திகதி இடம்பெறவுள்ளது.

இலங்கையில் சிங்கள கடும்போக்காளர்களின் பார்வை முஸ்லிம் சமூகத்தை நோக்கி திரும்பியிருக்கையில்தான் பாகிஸ்தான் கிரிக்கெட் அணியின் இலங்கை விஜயம் நடைபெறவுள்ளது.

இலங்கையிலுள்ள முஸ்லிம்களில் ஒருசாரார் பாகிஸ்தான் கிரிக்கெட் அணிக்கு ஆதரவளிக்கின்றனர் என்ற குற்றச்சாட்டு பெரும்பான்மை சிங்கள சமூகத்திடம் காணப்படுகிறது. சில மாதங்களுக்கு முன்னர் அமைச்சர் விமல் வீரவன்ச, கொழும்பு மாவட்ட ஆளும் கட்சி எம்.பி. திலங்க சுமதிபால ஆகியோரும் இலங்கை முஸ்லிம்களில் சிலர் பாகிஸ்தானுக்கு ஆதரவாக செயற்படுவதற்கு தமது எதிர்ப்பை வெளிப்படுத்தியிருந்தனர்.

இலங்கையில் பிறந்து, வளர்ந்து, இலவச கல்விகற்று, இலவச மருத்துவ உதவிகளும் பெறுவதுடன், முஸ்லிம்கள் என்ற காரணத்திற்காக சில சிறப்பு சலுகைகளையும் பெற்றுவரும் முஸ்லிம்களாகிய நாம் பாகிஸ்தான் கிரிக்கெட் அணிக்கு ஆதரவளிப்பதை எவ்வகையிலும் நியாயப்படுத்த முடியாது.

பாகிஸ்தான் அணியிலுள்ளவர்கள் முஸ்லிம்கள், இலங்கை அணியிலுள்ளவர்கள் சிங்களவர்கள். எனவே முஸ்லிம்களாகிய நாம் பாகிஸ்தானுக்கு ஆதரவாக செயற்படுகிறோம் என்ற வாதத்தை நாம் ஒருபோதும் அங்கீகரிக்கவோ அல்லது நியாயப்படுத்தவோ கூடாது.

பாகிஸ்தான் அணி இலங்கை தவிர்ந்த ஏனைய நாடுகளுடன் விளையாடும் போது பாகிஸ்தான் அணிக்கு நாம் ஆதரவளிப்பது ஒருவகையில் ஏற்றுக்கொள்ளத்தக்க வாதமாக இருக்கலாம்.

இவ்வாறானதொரு நிலையில் சிங்கள கடும்போக்காளர்கள் முஸ்லிம்கள் பற்றிய தவறான அபிராயங்களை தம்மிடையே வளர்த்துக்கொள்ள பாகிஸ்தான் அணிக்கு ஆதரவளிக்கும் நமது இலங்கை முஸ்லிம்களின் செயற்பாடுகள் எவ்வகையிலும் காரணமாக அமைந்துவிடக்கூடாது.

இலங்கையுடன் பாகிஸ்தான் அணி வெற்றிபெறும் பட்சத்தில் பகிரங்கமாக வெடி கொளுத்துவது, மைதானத்தில் பாகிஸ்தான் கொடியுடன் வலம் வருவது போன்ற நிகழ்வுகள் இன்னும்இன்னும் சிங்கள கடும்போக்காளர்களின் ஆத்திரத்தை அதிகரிக்கவே வழிவகுக்கும்.

இலங்கை முஸ்லிம் சமூகத்திற்கு ஆதரவான நிலைப்பாட்டை கொண்டிருக்கும் அப்பாவி சிங்களவர்கள் கூட, முஸ்லிம்களுக்கு எதிராக நிலைப்பாட்டை மேற்கொள்வதற்கு நாம் எச்சந்தர்ப்பத்திலும் வழியமைத்துவிடக்கூடாது.

பேஸ்புக்கில் பாகிஸ்தான் அணியை வாழ்த்தி நமது முஸ்லிம் இளைஞர்கள், சகோதரிகள் பதிவிடும் பதிவுகளுக்கு சிங்கள நண்பர்களை பதில் பதிவுகளை மேற்கொள்ளும் போதும் மிகவும் கீழ்த்தரமான வார்த்தைகளிலேயே பதிலளிக்கப்படுகிறது. இது ஒட்டுமொத்த இலங்கை முஸ்லிம்களுக்கும் அவமானமாக அமைந்துவிடுகிறது.

எனவே எமது இந்த தவறான செயற்பாடுகள், நடத்தைகள் குறித்து நாம் சிந்திக்கவேண்டிய கட்டாயத்தில் உள்ளோம். பாகிஸ்தான் முஸ்லிம் கிரிக்கெட் அணி என்ற உணர்வுடன் சிந்திப்பதை ஒருபக்கம் ஒதுக்கிவிட்டு, எமது நாடு இலங்கை, எமது இலங்கை வீரர்கள் என்று சிந்திப்போம். முஸ்லிம் சமூகத்தை எவருக்கும் காட்டிக்கொடுப்பதை நிறுத்துவோம், எமது தனிநபர் செயற்பாடுகள் எந்தவகையிலும் இலங்கை முஸ்லிம் சமூகத்திற்கு பாதிப்பை ஏற்படுத்தவிடக்கூடாது என்பதில் உறுதியாக இருப்போம்.

ஆகமொத்தத்தில் பாகிஸ்தான் கிரிக்கெட் அணிக்கு ஆதரவாக பகிரங்கமாக செயற்படுவதையும், பேஸ்புக்கில் பகிரங்கமாக அவர்களை போற்றுவதையும் நிறுத்துவோம்..!!