என்னமோ நடக்குது..! ஏதோ நடக்குது..!!

ஜனாதிபதி மஹிந்த ராஜபக்ஸ தலைமையிலான அரசாங்கத்திற்கும், சட்டவிரோத இஸ்ரேலுக்கும் மலர்ந்துள்ள உறவு முஸ்லிம் உம்மாவை வேதனை கொள்ளச் செய்திருக்கும் நிலையில் கடந்த இரண்டு வாரங்களில், இரு தடவைகள் அலொன் உஸ்கிப்ஷ் என்ற இஸ்ரேலிய உயர்மட்ட அதிகாரி இலங்கை வந்து சென்றிருப்பதாக யாழ் முஸ்லிம் இணையத்திற்கு நம்பகரமான வட்டாரங்களிலிருந்து அறியவருகிறது.

சட்டவிரோத இஸ்ரேல் சார்பாக அலொன் உஸ்கிப்ஷ் என்ற இந்த நபர்தான் தற்போது இந்தியாவிற்கான இஸ்ரேலிய தூதராக செயற்பட்டுவருகிறார். இவர்தான் இலங்கைக்கான தூதுவராகவும் நியமனம் பெற்றுள்ளார். இவரது தலைமையிலேயே கொழும்பில் சட்டவிரோத இஸ்ரேலின் 64 ஆவது சுதந்திர தினமும் கொண்டாடப்பட்டுள்ளது.

முஸ்லிம் அரசியல் தலைமைகள், அகில ஜம்மியத்துல் உலமா சபை, முஸ்லிம் கவுன்சில், இடதுசாரி அமைப்புக்கள் போன்றன இலங்கை அரசாங்கமானது இஸ்ரேலுடன் இராஜதந்திர உறவு ஏற்படுத்திக்கொண்டதை கடுமையாக  விமர்சித்திருந்தன.

இந்த விமர்சனங்களையெல்லாம் பொருட்படுத்தாத ஜனாதிபதி மஹிந்த ராஜபக்ஸ தலைமையிலான அரசாங்கம், தற்போது சட்டவிரோத இஸ்ரேலின் தூதரகம் கொழும்பில் திறக்கப்படுவதற்கு அனுமதியளிக்குமா என்பதே முஸ்லிம்களிடம் மேலோங்கியுள்ள பெறுமதிமிக்க கேள்வியாகும்.

இலங்கையில் இஸ்ரேல் தூதரகம் திறக்கப்பட அனுமதி வழங்கப்படாது என அரசாங்கத்தின் சார்பில் இதுவரை எத்தகைய உறுதிமொழிகளும் வழங்கப்படவில்லை. இவ்வாறான நிலையில் இஸ்ரேலிய தூதுவர் கொழும்புக்கு இரண்டு வாரங்களில் இரு தடவை வந்துசென்றமையும், கொழும்பில் அவர் தலைமையில் சட்டவிரோத இஸ்ரேலின் சுதந்திரதினம் கொண்டாடப்பட்டமையும் மிகப்பெரும் சந்தேகங்களை முஸ்லிம்களிடம் ஏற்படுத்தியுள்ளது.