பள்ளிவாசல் நிறுவமாட்டோம் என ஒப்பந்தம் கைச்சாத்திட்ட முஸ்லிம்கள் - பதற்றமும் தணிந்தது

பௌத்த மக்கள் பெரும்பான்மையாக வசிக்கும் குருணாகலை அரியசிங்களவத்த என்னும் பிரதேசத்தில் சிங்களவர்களுக்கும், முஸ்லிம்களுக்கும் ஏற்பட்ட அமைதியற்ற சூழ்நிலை இருதரப்பினருக்கும் இடையே மேற்கொள்ளப்பட்ட உடன்படிக்கையை அடுத்து சுமூக கட்டத்தை அடைந்துள்ளது.

இதுபற்றி மேலும் தெரிய வருவதாவது,

குருணாகல் - புத்தளம் பிரதான வீதிக்கு அருகாமையில் அமைந்துள்ள பிரதேசமே அரியசிங்களவத்த பிரதேசமாகும். இங்கு அஹதியா முஸ்லிம் சிறுவர் பாடசாலையொன்றை அமைப்பது தொடர்பில் முஸ்லிம்கள்  சிங்களவர்களிடையே பதற்ற நிலை ஏற்பட்டுள்ளது. அஹதியா பாடசாலைக்கும் சிங்கள மக்கள் எதிர்ப்பு வெளியிட்டுள்ளனர்.

இதையடுத்து இந்த விவகாரம் எத்கந்த ரஜமஹா விகாராதிபதியின் கவனத்திற்கு கொண்டு செல்லப்பட்டுள்ளது.  குறித்த விகாராதிபதி அந்தப் பிரதேசத்திலுள்ள பௌத்த மற்றும் முஸ்லிம்களுடன் இதுதொடர்பில் பேச்சுக்களை மேற்கொண்டுள்ளார். இதில் இருதரப்பு முக்கியஸ்தர்களும் கலந்துகொண்டுள்ளனர்.

இதையடுத்து முஸ்லிம்கள், சிங்களவர் ஆகிய இரு தரப்புகளுக்கிடையேயும் முக்கிய உடன்படிக்கையொன்று கைச்சாத்திடப்பட்டுள்ளது.

இந்த உடன்படிக்கையின்படி முஸ்லிம் பள்ளிவாசலொன்று குறித்த பிரதேசத்தில் நிர்மாணிப்பதில்லை எனவும், முஸ்லிம் அஹதியா பாடசாலையை மட்டும் முன்னெடுத்துச் செல்வது எனவும் முஸ்லிம்கள் தரப்பில் ஒப்புக்கொள்ளபட்டு ஒப்பந்தம் கைச்சாத்திடப்பட்டுள்ளது.

எத்தகந்த விகாரையில் நடைபெற்ற இந்த ஒப்பந்தம் நீதிபதியொருவர் முன்னிலையில் நடைபெற்றுள்ளமை குறிப்பிடத்தக்கது.