முஸ்லீம்கள் ஏன், இப்படி இருக்கிறார்கள்..?

-மு.இ.உமர் அலி-

நாடு பயங்கரவாதத்திலிருந்து விடுதலை அடைந்த பிறகு நாட்டுமக்கள் அச்சம் நீங்கியவர்களாக  நாட்டின் நாலாபுறமும் உல்லாசப்பயணங்களை மேற்கொண்டு வருகின்றதை அனைவரும் கண்டிருப்பீர்கள்,என் நீங்களும் கூட உங்கள் குடும்பத்தினர்  நண்பர்கள் சகிதம் பல இடங்களுக்கு சென்றிருப்பீர்கள்,

இவ்வாறு உள்ளூர் வெளியூரில் உள்ள  உல்லாச இடங்களுக்கு செல்லும்போது நாம் செய்கின்ற சில காரியங்கள்  மற்றவர்களால் நாம்  கீழ்த்தரமாக விமர்சிக்கப்படுவதற்கு காரணியாக அமைந்துவிடுகின்றன.

பாதையில் சிறு முட்கள் இருந்தால் அதை அகற்றிவிடுங்கள்  என்று போதனை செய்யும் மாநபியின் வாழ்க்கை வழி முறைகளை பின்பற்றும் நாம் இவ்வாறு சுற்றுப்பிர்யாணங்கள்  செல்லும்போது  மற்றவர்களுக்கு தீங்கு விளைவிக்கக்கூடிய  செயல்பாடுகளில்  ஈடுபடுவது மிக்கவும் வேதனைக்குரிய விடையமாகும்.

சிறுவர்கள் அணியும் ‘பெம்பஸ்” பெண்களது பாதுகாப்பு துவாய்கள்,வாந்தி எடுத்த சொப்பின் பேக்குகள்,பழங்கள்  உரித்த தோல்கள்,எஞ்சிய உணவுப்பொருட்கள்,போன்றன உள்ளடங்கலாக பல பொருட்களை  ஆட்கள் நடமாடும் மரங்களின் கீழேயும் , , வீதிகளிலும்,முற்றங்களிலும்,நீரோடைகள் அல்லது குளிக்குமிடங்களின் அருகாமையிலும் வீசி எறிவதனால் அந்தந்த  சூழல்களில் பல பாதுகாப்புக்கு அச்சுறுத்தலான விளைவுகள் ஏற்படுகின்றன.

இவ்வாறு நாம் அனேகமாக செல்லுமிடங்கள்  மாற்றுமத சகோதரர்கள் வாழுமிடங்களாக இருப்பதால் முஸ்லீம் மக்கள் சுற்றாடலை நேசிக்காதவர்கள்,துப்பரவற்றவர்கள்,அழகை அலங்கோலமாக்குபவர்கள்  என்று எண்ணுவதோடு மட்டுமன்றி எம்மிடமே நேரடியாக இதுபற்றிய எதிர்ப்பான கருத்துக்களை கூறுகின்றனர்.”ஓகோள்ளங்கே கட்டி மெத்தன வினாசி கரணவா” “ஒகொள்ளங்கே கட்டிய பிரிசுது நெஹ” “மெத்தன முஸ்லீம் கட்டிய ஆவுத் ஜராவ கரணவா”   என்றெல்லாம் கூறி எம்மீது ஏனையோர் வெறுப்படைவதற்கு இதுவுமொரு பலமான காரணியாக இருக்கின்றது .

எனவே முஸ்லீம்களாகிய நாம் உல்லாசப்பயணங்கள் செல்லுமிடங்களில் கழிவுகளை போடுவதற்கு என ஒதுக்கப்பட்டிருக்கும் தொட்டிகளில் அல்லது இடங்களில் மாத்திரம் கழிவுகளை வீசுவோம்,

ஏனையவர்கள் பயணிக்கும்  ஒற்றையடி பாதைகளிலும், மரங்களின் அடியிலும் தீ மூட்டி  சமைப்பதை தடுப்போம்,எஞ்சிய உணவுகளை கண்டபடி எல்லா இடங்களிலும் கொட்டி விடாமல் பொருத்தமான இடங்களில் கொட்டுவோம்.சமைப்பதற்கு மூட்டிய அடுப்பினை சமைத்து முடிந்தபின் நன்றாக நீரூற்றி அணைத்துவிடுவோம்.

பெண்கள், குழந்தைகளின் பெம்பஸ்களை கண்டபடி கண்ட இடங்களில் வீசி எறிவதை கண்டால் ஆண்கள் அவற்றை தயவுசெய்து எடுத்து பாதுகாப்பான முறையில் அகற்றுவோம்.

அல்லாஹ் நாம் வாழ்வதற்கும்,அனுபவிப்பதற்கும் தந்திருக்கும் சூழலை பேணிப் பாதுகாத்தால்தான்  எம்மைபோன்ற பலரும் அந்த அழகான சூழலை அனுபவிக்க முடியும்.நாம் சுயனலமற்றவர்களாக மட்டுமன்றி பிறர் நலம் காப்பவர்களாகவும் வாழ்ந்து மரணிக்கவேண்டும். 

அல்லாஹ் எம் அனைவரது செயல்களையும் அவதானித்துக்கொண்டே இருக்கின்றான்...!