வேங்கை சு சே இப்ராஹீம் கவனத்திற்கு..!

சுவைர் மீரான்

வேங்கை சு சே இப்ராஹீம் என்பவர் எழுதியுள்ள கட்டுரை முற்றாக நிராகரிக்கப் பட வேண்டியதும், மறுக்கப் பட வேண்டியதாகும்.

தம்புள்ளையில் பிரச்சினை இருப்பது உண்மைதான், அதற்காக நர மாமிசம் உண்ணும் முதலைகளின் நீலிக் கண்ணீர் எமக்குத் தேவையில்லை. இவர் போன்றவர்களின் ஆர்ப்பாட்ட  செயல்பாடுகளும்,தேசியக் கோடி, ஜனாதிபதி உருவப் பொம்மை எரிப்புகளும்,அனல் பறக்கும் அறிக்கைகளும் நமக்கு ஒருபொழுதும் உதவப் போவதில்லை, நமது நிலையை மேலும் சிக்கலாக்கி,  நமது நிலைப்பாட்டை ஆதரிக்கும் பெரும்பான்மயான  சிங்களவர்களையும்  நமக்கு எதிராகத் திருப்பி விடவே பயன்படப் போகின்றன.

வேங்கை சு சே இப்ராஹீம் என்கின்ற தமிழ் நாட்டைச் சேர்ந்த சேர்ந்த இந்த பெயர் தாங்கி முஸ்லிம் திருமாவளவனை தலைவனாக ஏற்று  அதற்காகவே வாழ்பவர்.

இவரைப் போலவே இன்னும் சில பெயர் தாங்கிகள் உள்ளனர். தமிழக முஸ்லிம்களில் இணைய,  ஊடகத் தொடர்பு உள்ள பலர் இவர்களைப் பற்றி நன்றாகவே அறிந்து வைத்துள்ளனர். இலங்கை முஸ்லீம்களுக்கு வேண்டுமானால் இவரின் பெயர் புதிதாக இருக்கலாம்.  வேங்கை என்பது இவரின் தகப்பன், தாய் வைத்த பெயரில் இல்லாத ஒன்று, இவர் சுயமாக சூடிக் கொண்ட  ஒன்று.

வேங்கை என்று இவர் தனது பெயருக்கு முன்னால் சூட்டிக் கொண்டுள்ளதே  இவர் முஸ்லிம் தோல் போர்த்திய புலி என்பதனை தெளிவாக இனம் காட்டுகின்றது.

இலங்கை முஸ்லிம்கள் குறித்தும், புலிகள் குறித்தும் நிறைய பொய்களை தனது கட்டுரையில் பதிந்துள்ளார். புலிகளின் இயக்கப் பெயர் குறித்த உண்மைகளை மறைத்து, அவர்களை முஸ்லீம் என நம்மை நம்ப வைக்க முயல்கின்றாரா?  அல்லது  விஷயமே தெரியாமல் வெறுமனே உளறிக் கொட்டுகின்றாரா?

உணவில்  சயனைட் விஷம் கலந்து கொடுக்கப்பட்டு குமரப்பா, புலேந்திரனுடன் கொலை செய்யப்பட  பன்னிரண்டு பேரில் ஒருவரின் புலி இயக்கப் பெயர் ரஹீம், இவர் முஸ்லிமா? இல்லவே இல்லை.

புலிகள் தங்களின் இயக்கப் பெயராக பல முஸ்லிம் பெயர்களை வைத்திருந்தனர் என்ற உண்மை தெரியாமல் இருக்கின்றார் வேங்கையார், பரிதாபம்தான். நசீர், ரிபான், காதர் போன்ற இயக்கப் பெயர்களில் இருந்தவர்கள் யாரும் முஸ்லிம்கள் கிடையாது. இம்ரான் படையணி முஸ்லிமின் பெயரால் உருவாக்கப் பட்டதாம்? யார் தலையில் மிளகாய் அரைக்கப் பார்க்கின்றார் இதனை எழுதியவர்?

(கடாபி என்ற இயக்கப் பெயர் கொண்ட ஆரம்பகாலப் போராளி முஸ்லிமா இல்லையா  என்பதனை யாராவது உறுதிப் படுத்த முடியுமா?)

புலிகள் முஸ்லீம்களை தாக்கியதற்கு புதுக் கற்பனைக் காரணம் சொல்கின்றார் சொங்கி வேங்கை. முஸ்லிம் ஊர்காவல்  படைதான் பிரச்சினைக்குக் காரணம் என்றால் குறித்த படையை தாக்கி இருக்க வேண்டும்.

பள்ளியில் தொழுபவர்களையும், தாயின் வயிற்றில் இருந்த சிசுக்களையும் தாக்குவது என்ன நியாயம். இப்படியான பொய்க் காரணத்தை கூச்சமில்லாமல் எப்படி இவரால் எழுத முடிகின்றது? . ஈபிடீபி, ராசிக் குழு  போன்ற தமிழ் படைகள்  புலிகளுக்கு எதிராக இயங்கினவே, அப்படியானால், ஏன் புலிகள்

தமிழர்களைத் தாக்கவில்லை? தமிழருக்கு ஒரு நீதி, முஸ்லிம்களுக்கு இன்னொரு நீதியா? பார்த்தாலே புரிகின்றது இவர் எழுதியுள்ளது பச்சைப் பொய் என்பது.

குறிப்பு : இங்கே ''ராசிக் குழு'' எனக் குறிப்பிடப் பட்டுள்ளதையும் இந்த வேங்கையார் முஸ்லீம் என்று சொல்லிவிடுவாரோ தெரியவில்லை!

(பிரேமதாச) அமைச்சரவையில் இருந்த முஸ்லீம்களை அரபு நாடுகளுக்கு அனுப்பியதாக சொல்லி தொடர்ந்து சொல்லப்படும் கருத்தில் எந்த உண்மையும் இல்லை. அப்படி நடைபெற்றிருந்தால் சரியான தகவல்களை பெயர் விவரங்களுடன் தர வேண்டும்.

முஸ்லீம்களை தாக்கியதட்கும், வெளியேற்றியதட்கும் புலிகள் பகிரங்கமாக மன்னிப்பு கேட்டார்கள் என்பதில் என்ன பயன்? அது ஒரு தற்காலிக நாடகம் மட்டுமே.முஸ்லீம்கள் எல்லாவற்றையும் இழந்த பின்னர் ஒரு தற்காலிக நாடகத்தால் முஸ்லீம்களுக்கு நல்லது எதுவும் நடந்து விட்டிருக்கவில்லை என்பது வேங்கயாருக்கு தெரியுமா? மன்னிப்பு கேட்கும் நாடகத்தை நடித்து முடித்த பின்னர்தானே . மீண்டும் ஒரு தடவை  புலிகள் மூதூரில் முஸ்லீம்களை கொன்று குவித்தார்கள்! (அடுத்த தடவை முஸ்லீம்களை இன்னொரு இடத்தில் கொல்ல, இலங்கை ராணுவம் புலிகளை விட்டு வைத்திருக்கவில்லை)

இதற்கு என்ன சொல்லப் போகின்றார் வேங்கையார்?

வேங்கையார் வேண்டுமென்றால் விஷயம் தெரியாத தமிழ்நாட்டு அப்பாவி முஸ்லீம்களை ஏமாற்றலாம் என நினைத்துக் கொண்டு எதையாவது எழுதட்டும், ஆனால் இலங்கையில் இவர் பருப்பு வேகாது..!!