காசாவில் இஸ்ரேலின் மின்சார வெட்டு - ஆபத்தில் முடியும் என ஹமாஸ் எச்சரிக்கை

பலஸ்தீன பகுதியின் துன்பங்கள் மற்றும் பதற்றத்தை அதிகரிக்கும் என்ற எச்சரிக்கைகளை மீறி காசாவுக்கான மின்சார விநியோகத்தை இஸ்ரேல் கடந்த திங்கட்கிழமை தொடக்கம் குறைக்க ஆரம்பித்துள்ளது.

இந்த மின்சார வெட்டு காசாவுக்கு நாளொன்றுக்கு இரண்டு மணி நேரம் மாத்திரமே மின்சாரம் கிடைக்கும் நிலையை ஏற்படுத்தியுள்ளது. எனினும் அங்குள்ள பெரும்பாலான வர்த்தகங்கள் மற்றும் வசதி கொண்டவர்கள் சொந்தமான ஜெனெரட்டர்களை பயன்படுத்தி வருகின்றனர்.

ஆக்கிரமிப்பு மேற்குக் கரையை தளமாகக் கொண்ட பலஸ்தீன அதிகார சபை காசாவுக்கான மின்சார கட்டணத்தை செலுத்தப்போவதில்லை என்று இஸ்ரேலிடம் கூறியதை அடுத்தே இந்த நடவடிக்கை எடுக்கப்பட்டுள்ளது.

எதிரிகளாக செயற்படும் காசாவை ஆளும் ஹமாஸ் மற்றும் மேற்குக் கரையின் பத்தாஹ் அமைப்புகளுக்கு இடையிலான சமரச முயற்சிகள் தோல்வியில் முடிந்தன. எனினும் இம்மாதம் வரை காசாவுக்கான சில மின்சார விநியோகங்களுக்கு பலஸ்தீன அதிகார சபை இஸ்ரேலுக்கு கட்டணம் செலுத்தி வந்தது.

இந்நிலையில் காசாவுக்கான எட்டு மெகாவோட்கள் மின்சாரத்தை இஸ்ரேல் குறைத்திருப்பதாக காசா மின்சக்தி அதிகாரசபை குறிப்பிட்டுள்ளது.

கடந்த திங்கட்கிழமை வரை இஸ்ரேல் காசாவுக்கு மாதம் ஒன்றுக்கு 120 மெகாவோட்கள் மின்சாரத்தை விநியோகித்து வந்தது. இது காசாவின் கால் பங்கு மக்களின் தேவையை பூர்த்தி செய்வதாக இருந்தது. இதற்காக பலஸ்தீன அதிகார சபை மாதாந்தம் 12.65 மில்லியன் டொலர் கட்டணம் செலுத்தியது.

காசாவில் வாழும் இரண்டு மில்லியன் மக்களில் கால் பங்கிற்கும் அதிகமானவர்கள் மனிதாபிமான உதவிகளில் தங்கி இருப்பதாக ஐ.நா குறிப்பிட்டுள்ளது.

இஸ்ரேல் முற்றுகையில் இருக்கும் காசா மக்கள் ஏற்கனவே மின்சார பற்றாக்குறையால் பாதிக்கப்பட்டுள்ளனர். இந்த மின்சார வெட்டுக்கு முன்னரும் அங்கு ஒருசில மணி நேரமே மின்சாரம் கிடைத்து வந்தது.

இந்த மின்சார வெட்டினால் ஏற்படும் பேரழிவுகளுக்கு இஸ்ரேல் மற்றும் பலஸ்தீன ஜனாதிபதி மஹ்மூத் அப்பாஸ் கூட்டாக பொறுப்பேற்க வேண்டும் என்று ஹமாஸ் குற்றம்சாட்டியது. இந்த நடவடிக்கை ஆபத்தில் முடியும் என்று ஹமாஸ் வெளியிட்டிருக்கும் அறிவிப்பில் குறிப்பிட்டுள்ளது.