ஜனாஸாக்களை எடுத்து மீள, அடக்கம் செய்யும் நிலை

(மாளிகா அஸ்ஹர்)

கடைசிக்கட்ட முயற்சிகளும் கைகூடாத நிலையில் கடலுக்குள் கவிழ்ந்தது மாளிகைக்காடு மையவாடிச் சுவர்.  இதனால் ஏற்கனவே அடக்கம் செய்யப்பட்ட பல ஜனாஸாக்கள் அலைகளால் அடித்துச் செல்லப்பட்டதையடுத்து அவற்றை தேடியெடுத்து மீள அடக்கம் செய்யும் நடவடிக்கையில் பொதுமக்கள் இரவு பகல் பாராமல் அதீத கரிசனை செலுத்தி வருகின்றனர்.

அம்பாறை மாவட்டத்தின் கரையோரப் பிரதேசங்கள் அனைத்தும் கடலரிப்புக்குள்ளாகிவரும் நிலையில் மாளிகைக்காடு கிராமத்தின் கடற்கரையை அண்டிய பகுதியில் அமையப்பெற்றுள்ள மையவாடியின் கிழக்குப்புற எல்லைச்சுவர் பாரிய கடலலைகளின் தாக்கத்திற்கு ஈடுகொடுக்க முடியாமல் முழுமையாக உடைந்து சேதமடைந்துள்ளது.

இதனால் சுவரை அண்டிய பகுதிகளில் அடக்கம் செய்யப்பட்டிருந்த பல ஜனாஸாக்கள் கடலலைகளால் தோண்டியெடுக்கப்பட்டு வருகின்றது.

இம்மையவாடியின் சுவர்களை பாதுகாப்பதற்காக தற்காலிகமாக பல்வேறு முயற்சிகள் எடுக்கப்பட்டிருந்த போதிலும் கடைசிக் கட்டத்தில் அவை எதுவும் பயனளிக்கவில்லையென பொதுமக்கள் கவலை தெரிவிக்கின்றனர்.