சவுதி - இலங்கை உறவுகளில் புதிய அத்தியாயம்

ரியாதில் உள்ள இலங்கைத் தூதரகம் இலங்கையின் 78 ஆவது சுதந்திர தினத்தை முன்னிட்டு தூதரக விருந்தோம்பல் விழாவை நடத்தியது.

 

சவூதி அரேபியாவிற்கான  இலங்கைத் தூதுவர் ஓ. எல். அமீர் அஜ்வத், இலங்கையின் 78 ஆவது சுதந்திர தினத்தை நினைவுகூர்ந்து ரியாதில் ஒரு  தூதரக விருந்தோம்பல் விழாவை  நடத்தினார். இந்த நிகழ்வின் பிரதம விருந்தினராக ரியாத்  துணை ஆளுநர் Dr. பைசல் பின் அப்துல் அஸீஸ் அல்-சுதைரி கலந்து கொண்டார்.

 

2026 பெப்ரவரி 8 ஆம் திகதி ரியாத் தூதரகப் பகுதியிலுள்ள கலாச்சார மண்டபத்தில் நடைபெற்ற இந்த நிகழ்வில், நெறிமுறை விவகாரங்களுக்கான பிரதி அமைச்சர் அப்துல் மஜீத் அல்-சமாரி, மனிதவள மற்றும் சமூக மேம்பாட்டு அமைச்சின் (HRSD) சர்வதேச விவகாரங்களுக்கான பிரதி அமைச்சர் டாக்டர் தாரிக் பின் அப்துலஅஸீஸ் அல்-ஹமத், மூத்த சவூதி அரச அதிகாரிகள், பல நாடுகளின் தூதுவர்கள், தூதரக சமூக உறுப்பினர்கள், வணிகத் தலைவர்கள், தொழில்முனைவோர், கல்வியாளர்கள், ஊடகப் பிரதிநிதிகள் மற்றும் சவூதி அரேபியாவில் வாழும் இலங்கை சமூக பிரதிநிதிகள் உள்ளிட்ட 300 க்கும் மேற்பட்ட சிறப்பு விருந்தினர்கள் கலந்து கொண்டு இலங்கையின் வரலாற்றுச் சிறப்புமிக்க இந்த நிகழ்வைக் கொண்டாடினர்.

 

ரியாதில் நடைபெற்ற உலகப் பாதுகாப்பு கண்காட்சி – 2026 நிகழ்வில் பங்கேற்க சவூதி அரேபியாவுக்கு சமூகமளித்த  இலங்கையின் பாதுகாப்புப் பிரதி அமைச்சர் மேஜர் ஜெனரல் அருண ஜயசேகரவும், இலங்கைப்  பாதுகாப்புத் துறைப் பிரதிநிதிகள் குழுவினருடன் இணைந்து இந்த நிகழ்வை சிறப்பித்தார்.

 

கூட்டத்தில் உரையாற்றிய தூதுவர் அமீர் அஜ்வத், 1948 ஆம் ஆண்டு சுதந்திரம் பெற்றதிலிருந்து இலங்கை மேற்கொண்ட பயணத்தை எடுத்துரைத்தார். ஜனநாயக மதிப்பீடுகள், பல்சமய ஒற்றுமை மற்றும் நிலையான வளர்ச்சிக்கு நாட்டின் உறுதியான அர்ப்பணிப்பை வலியுறுத்திய அவர், உலக நாடுகளுடன் வலுவான நட்புறவை வளர்த்துவருவதாக தெரிவித்தார். மேலும் ஜனாதிபதி அனுர குமார திஸாநாயக்கின் தலைமையின் கீழ் இலங்கை தற்போது அனுபவித்து வரும் மாற்றத்தைக் குறிப்பிடுகையில், ஜனநாயக நிறுவனங்களை வலுப்படுத்துதல், ஊழலை எதிர்த்தல், அரச நிர்வாகத்தில் பொறுப்புணர்வை உறுதி செய்தல் மற்றும் பொருளாதார தூதரகத்தை மையமாகக் கொண்ட வெளிநாட்டு கொள்கை ஆகியவற்றை அடிப்படையாகக் கொண்ட அரசாங்கத்தின் தேசிய வளர்ச்சி கொள்கையை விளக்கினார்.

 

2022 ஆம் ஆண்டின் முன்னெப்போதும் இல்லாத பொருளாதார வீழ்ச்சிக்கு பின்னர் இலங்கை அடைந்த குறிப்பிடத்தக்க பொருளாதார மீட்சியையும் அவர் எடுத்துரைத்தார். 2025 ஆம் ஆண்டில் 5.4 சதவீத வளர்ச்சியை இலங்கை பதிவு செய்துள்ளதாகவும், பொறுப்பான நிதி ஒருங்கிணைப்பு மற்றும் கட்டுப்படுத்தப்பட்ட பணவியல் கொள்கை மூலம் பொருளாதார நிலைத்தன்மை மீண்டும் உருவாக்கப்பட்டு முதலீட்டாளர் நம்பிக்கை வலுப்படுத்தப்பட்டுள்ளதாகவும் தெரிவித்தார்.

2025 ஆம் ஆண்டில் இலங்கை 2.3 மில்லியன் சுற்றுலாப் பயணிகள் வருகை, வரலாற்றுச் சாதனையான ஏற்றுமதி வருவாய் மற்றும் குறிப்பிடத்தக்க வெளிநாட்டு முதலீடுகள் ஆகிய முக்கிய பொருளாதார சாதனைகளை எட்டியதாக தூதுவர் குறிப்பிட்டார். கொழும்பு துறைமுக நகரம் உள்ளிட்ட சிறப்பு பொருளாதார மத்திய நிலையங்கள், விநியோகத்துறைகள், கடல்சார் சேவைகள், புதுப்பிக்கத்தக்க ஆற்றல், டிஜிட்டல் பொருளாதாரம் மற்றும் உற்பத்தித் துறைகள் போன்றவை சவூதி அரேபியாவின் விஷன் 2030 மற்றும் உலகளாவிய முதலீட்டு விரிவாக்கத் திட்டத்துடன் இணைந்து போகும் துறைகள் எனக் குறிப்பிட்டு, சவூதி முதலீட்டாளர்களை இலங்கையில் முதலீட்டு வாய்ப்புகளை ஆராய அழைத்தார்.

 

இலங்கை – சவூதி அரேபியா இருதரப்பு உறவுகள் கடந்த ஆண்டு இலங்கையின் வெளிவிவகார, வெளிநாட்டு வேலைவாய்ப்பு மற்றும் சுற்றுலா அமைச்சர் விஜித ஹேரத் மேற்கொண்ட அதிகாரப்பூர்வ விஜயத்துக்குப் பின்னர் மேலும் வலுப்பெற்றதாக தூதுவர் கூறினார். அந்த விஜயத்தின் போது அவர் தனது சவூதி இணையான இளவரசர் ஃபைசல் பின் ஃபர்ஹான் அல் சவூதுடன் பயனுள்ள பேச்சுவார்த்தைகளை நடத்தியதாகவும், இது இரு நாடுகளுக்கிடையிலான உறவுகளில் புதிய அத்தியாயத்தைத் தொடங்கியதாகவும் தெரிவித்தார். இரு நாடுகளுக்கிடையிலான தூதரக உறவுகளின் 50 ஆவது ஆண்டு நினைவாக சவூதி தபால் துறை சிறப்பு நினைவுத் தபால் முத்திரையை வெளியிட்டது.

 

பொருளாதார முன்னணியில், கடந்த ஆண்டு முதல் முறையாக சவூதி அரேபியா – இலங்கை இணைந்த வர்த்தக மன்றம் நிறுவப்பட்டது ஒரு முக்கிய சாதனையாகும் என அவர் குறிப்பிட்டார். இந்த மன்றம் இரு நாடுகளுக்கிடையிலான வர்த்தகம், முதலீடு மற்றும் வணிக கூட்டாண்மைகளை வேகப்படுத்த முக்கிய பங்கு வகிக்கும் என அவர் வலியுறுத்தினார். மேலும் 2025 ஆம் ஆண்டில் பல்வேறு துறைகளைச் சேர்ந்த 55க்கும் மேற்பட்ட இலங்கை நிறுவனங்கள் சவூதி அரேபியாவுக்கு விஜயம் செய்து வணிக வாய்ப்புகளை ஆராய்ந்ததாகவும் தெரிவித்தார். இதன் விளைவாக கடந்த ஆண்டு இருதரப்பு வர்த்தகம் 9 சதவீதம் உயர்ந்ததுடன், சவூதி அரேபியாவுக்கு இலங்கை ஏற்றுமதி 19 சதவீதம் அதிகரித்ததாகவும் கூறினார்.

 

நிகழ்வின் போது இலங்கையின் சுற்றுலா ஈர்ப்புகளை வெளிப்படுத்தும் காணொளி ஒன்று திரையிடப்பட்டது. அதனைத் தொடர்ந்து சவுதி யில் வசிக்கும் இலங்கை கலைஞர்களின் பண்பாட்டு நிகழ்ச்சியும் இடம்பெற்றது. விருந்தினர்களுக்கு இலங்கையின் சமையல் மரபை பிரதிபலிக்கும் சிறப்பு உணவுகளும் வழங்கப்பட்டன.

 

இலங்கை தூதரகம்

ரியாத்