April 21, 2021

ரமழான் பரிசு மழை - 2021 (கேள்வி - 8)

ஹிஜ்ரி 1442 ம் வருட ரமழானை அறிவுத் தேடலுடன் பயன்மிக்கதாய் அடையும் பொறுட்டு கடந்த வருடங்களை போன்று இவ் ரமழானிலும் ஜப்னா முஸ்லிம் இணையத்தளம் AMYS நிறுவனத்துடன் இணைந்து " ரமழான் பரிசு மழை 2021" கேள்வி பதில் போட்டி நிகழ்ச்சியை ஏற்பாடு செய்திருக்கின்றது. 

8ம் நாளுக்கான கேள்விகள் 

01. மூன்று எழுத்துக்களைக் கொண்டு ஆரம்பமாகும் சூராக்கள் எத்தனை உண்டு? 

02. ஈஸா(அலை) பிறந்த இடம் எது? 

03. "முஸ்லிம் நீதிய" எனும் நூல் யாரால்? எது சம்பந்தமாக எழுதப்பட்டது?

04. உலகின் மிகப்பெரும் நதியினது நீளம் யாது? அது எங்கிருந்து ஆரம்பமாகின்றது?



ஈஸ்டர் தாக்குதலுக்கு 2 வருடம், இஸ்லாமியர்களும் பங்கேற்ற பாதயாத்திரை - நீர்கொழும்பில் நடைபெற்றது


- Ismathul Rahuman -

நீர்கொழும்பு நிருபர் உயிர்த்த ஞாயிறு மிலேச்ச தாக்குதலின் இரண்டு வருட நிணைவாக இன்று 21ம் திகதி நீர்கொழும்பில் பாதயாத்திரை இடம்பெற்றது. நீர்கொழும்பு மாரிஸ்டலா கல்லூரி வளவிலிருந்து மாலை 4.30 மணியலவில் பாதயாத்திரை ஆரம்பித்து கட்டுவபிட்டிய தேவஸ்தானத்தை நோக்கி ஊர்வலம் சென்றது. பேராயர் காதினல் மல்கம் ரன்ஜித் அவர்களின் தலைமையில் நடைபெற்ற இப் பாதயாத்திரையில் பெளத்த, இந்து, இஸ்லாமிய மதத் தலைவர்களும், நாட்டின் நாலா பகுதிக லிலிருந்தும் வருகை தந்த ஆயிரக்கணககான ஆயர்கள், கத்தோலிக்க பிதாக்கள்,கண்ணியஸ்திரிகள் கலந்துகொண்டனர். ஊர்வலத்தின் முதலில் காதினல் உற்பட சகலமதத் தலைவர்களும் அதன்பின் மிலேச்ச குண்டுத் தாக்குதலில் உயிர் நீத்தவர்களின் புகைப்படங்களை கையில் ஏந்தியவாறு கட்டுவபிட்டிய சாந்த செபஸ்தியன் தேவஸ்தானம்,கொச்சிகடை அந்தோனியார் தேவஸ்தானம், மட்டக்களப்பு சியோன் தேவஸ்தானம்,  உல்லாச விடுதிகள் ஆகியவற்றில் உயிர்நீத்தவர்கள் நிணைவாக அதன் பதாகைகளின் கீழ் கத்தோலிக்க மதகுருமார் பயணித்தனர். ஊர்வலம் செல்லும் வீதிகளில் பொலிஸ் இரானுவ பலத்த பாதுகாப்புக்கும் கத்தோலிக்க சபையின் தனிப்பட்ட பாதுகாப்புக்கும் மத்தியில் அமைதியான முறையில் பாத யாத்திரை இடம் பெற்றது. பாத யாத்திரை ஆரம்பிபதற்கு முன்னர் மதத் தலைவர்களின் ஆசீரவாதம் நடைபெற்றதுடன் மிலேச்ச தாக்குதலின் உண்மை சூத்திரதாரிகளை வெளிப்படுத்தக் கோரி ஆராதனையும் நடந்தது.



வயோதிபரைத் தாக்கிய மகளும், பேரப் பிள்ளையும் கைது


வயோதிப தந்தை ஒருவரை வீட்டிற்கு வருவதற்கு இடமளிக்காமல் கொடூரமாக தாக்கும் மகள் மற்றும் பேரப்பிள்ளை கைது செய்யப்பட்டுள்ளனர்.

இந்த மகள் மற்றும் பேரப்பிள்ளை தொடர்பிலான தகவல்களை வெளிப்படுத்தும் வீடியோ ஒன்று சமூக வலைத்தளங்களில் வெளியாகி சர்ச்சையை ஏற்படுத்தியுள்ளது.

இது தொடர்பில் ஆராய்ந்த போது இந்த சம்பவம் கொழும்பு, நாரஹென்பிட்டி - தாபரே மாவத்தையில் உள்ள வீடு ஒன்றில் இடம்பெற்றுள்ளதாக குறிப்பிடப்படுகின்றது.

மகள் மற்றும் பேரப்பிள்ளை தந்தையை கொடூரமாக தாக்கியதுடன், அவசியம் என்றால் பொலிஸ் நிலையத்திற்கு செல்லுமாறு அச்சுறுத்தியுள்ளார்.

மகளின் தாக்குதலினால் படுகாயமடைந்த தந்தை வைத்தியசாலையில் அனுமதிக்கப்பட்டு சிகிச்சை பெற்று வருகின்றார்.

எனினும் கைது செய்யப்பட்ட மகள் மற்றும் பேரப்பிள்ளை பிணையில் விடுதலையாகியுள்ளதாக செய்தி வெளியாகியுள்ளது. 

கொரோனா தடுப்பூசி ஏற்றிய 3 பேர் மரணம் - 6 பேருக்கு குருதி உறைவு


அஸ்ட்ரா செனெக்கா தடுப்பூசியைப் ஏற்றிக்​கொண்டவர்களில் மூவர் மரணமடைந்துள்ளனர் என  சுகாதார அமைச்சர் பவித்ரா வன்னியாரச்சி தெரிவித்தார்

இதேவேளை, அறுவருக்கு, குருதி உறைவு ஏற்பட்டதாகத் தெரிவித்த சுகாதார அமைச்சர் பவித்ரா வன்னியாரச்சி, அவர்களில் மூன்று பேர் உயிரிழந்துள்ளனரென அதிர்ச்சித் தகவலை வெளியிட்டார்.

பாராளுமன்றத்தில் எதிர்க்கட்சித் தலைவர் சஜித் பிரேமதாஸ, விசேட கூற்றொன்றை விடுத்து ​கேள்விகளை எழுப்பினார், அக்கேள்விகளுக்கு பதிலளிக்கும் போதே மேற்கண்டவாறு தெரிவித்தார்.

மக்களே எமது பலம், அவர்களின் தேவைகளை உடனடியாக நிறைவு செய்க - இராஜாங்க அமைச்சர்களுக்கு ஜனாதிபதி அறிவுரை


“பொதுமக்களுக்கு சேவை வழங்கும் அரச நிறுவனங்களின் மூலம் மக்களின் எதிர்பார்ப்புகளை நிறைவு செய்துகொள்ள முடியாது.” என்ற குற்றச்சாட்டுக்கு முற்றுப் புள்ளி வைக்க வேண்டுமென்று ஜனாதிபதி கோட்டாபய ராஜபக்ஷ அவர்கள் சுட்டிக்காட்டினார்.

கொவிட் தொற்று காலத்திலும்கூட “சுபீட்சத்தின் நோக்கு” கொள்கைப் பிரகடனத்தில் குறிப்பிட்ட பல்வேறு விடயங்கள் நிறைவு செய்யப்பட்டுள்ளன. மக்களிடம் காணப்படும் மனக்குறைக்கு காரணம் சில அரச நிறுவனங்களில் நிலவுகின்ற செயற்திறனற்ற சேவை, ஊழல், தாமதம் போன்றவையாகும் என்று மக்கள் குறிப்பிடுகின்றனர். செயற்திறன்மிக்க அரச சேவைக்காக இராஜாங்க அமைச்சர்களின் நேரடி தலையீடு மற்றும் தொழிநுட்ப பயன்பாட்டின் மூலம் பிரச்சினைகளுக்கு தீர்வு காண முடிமென்றும் ஜனாதிபதி அவர்கள் சுட்டிக்காட்டினார்.

இராஜாங்க அமைச்சர்களுடன் மாதாந்தம் இடம்பெறும் மீளாய்வு கூட்டம் இன்று (21) முற்பகல் கோட்டை ஜனாதிபதி மாளிகையில் இடம்பெற்றபோதே ஜனாதிபதி அவர்கள் மேற்கண்டவாறு தெரிவித்தார்.

 சில நிறுவனங்களின் தலைவர்கள் தமது பணிகளை உரியவாறு நிறைவேற்றாமை தொடர்பாகவும் அறியக் கிடைத்துள்ளது. அரசாங்கம் எதிர்பார்க்கும் இலக்கை நோக்கி செல்லாத அவ்வாறான நிறுவனங்கள் தொடர்பாக அறிக்கை ஒன்றை சமர்ப்பிக்குமாறு இராஜாங்க அமைச்சர்களுக்கு பணிப்புரைவிடுத்த ஜனாதிபதி அவர்கள், அந்நிறுவனங்களுக்கு வேறு அதிகாரிகளை நியமிக்க வேண்டுமெனில் அதற்கும் தான் தயாரென்றும் குறிப்பிட்டார்.

வெளிநாட்டுக் கடன் மற்றும் உள்நாட்டு வரவுசெலவு திட்டத்தின் மூலம் செயற்படுத்தப்பட்டுவரும் திட்டங்களின் முன்னேற்றத்தை அவதானித்து துரிதப்படுத்துவதன் அவசியத்தையும் ஜனாதிபதி அவர்கள் சுட்டிக்காட்டினார்.

“மக்களுடனேயே எமது பலம் இருக்கிறது. அவர்களின் தேவைகளை உடனடியாக நிறைவு செய்ய வேண்டும். பிரச்சினைகளை காது கொடுத்து கேட்பதுடன், மக்களிடமிருந்து தூர விலகி நிற்காமல் செயற்படுங்கள்” என்று ஜனாதிபதி அவர்கள் இராஜாங்க அமைச்சர்களிடம் தெரிவித்தார்.

அரசாங்கத்தின் கொள்கை தொழில்வாய்ப்புக்களை ஏற்படுத்துவதாகும். அதனால் சிறிய மற்றும் நடுத்தர தொழில் முயற்சியாளர்களை கிராமத்திற்குள் உருவாக்கி தொழில்வாய்ப்புக்களை ஏற்படுத்துவது தொடர்பாகவும் ஜனாதிபதி அவர்கள் தெளிவுபடுத்தினார்.

பாராளுமன்றத்தில் இன்றைய நகைச்சுவை கூத்துக்கள் - அரசியல்வாதிகளின் மற்றுமொரு டபள் கேம் (வீடியோ)


பாராளுமன்றத்தில் இன்று 21.04.2021 நடந்த கூத்துக்கள் (அரசியல்வாதிகளின் மற்றுமொரு டபள் கேம் வீடியோ) முஸ்லிம் அரசியல்வாதிகள் அமைதியாக இருந்து வேடிக்கை பார்த்தனர்

வீடியோ

சம்மாந்துறை விடயத்தில் கடும்தொனியில், உத்தரவிட்ட பிரதமர் - ஹரீஸ் தெரிவிப்பு

- நூருல் ஹுதா உமர் -

இடமாற்றம் செய்யப்பட்டதாக சர்ச்சைக்குள்ளாகியுள்ள சம்மாந்துறை பேருந்து சாலை விடயமாக பாராளுமன்ற பிரதமரின் அலுவலகத்தில் இன்று -21- பிரதமருடனான சந்திப்பின் போது அந்த சாலையின் தேவை, அந்த சாலையின் மூலம் மக்கள் அடையும் நன்மைகள், அந்த சாலையின் இடமாற்றத்தினால் அந்த மக்கள் எதிர்கொள்ளும் அசௌகரியங்கள் தொடர்பில் அங்கு கலந்து கொண்டிருந்த முஸ்லிம் எம்.பிக்கள் பிரதமருக்கு விளக்கியதாக ஸ்ரீலங்கா முஸ்லிம் காங்கிரசின் பிரதித்தலைவரும், பாராளுமன்ற உறுப்பினருமான சட்டத்தரணி எச்.எம்.எம். ஹரீஸ் தெரிவித்தார். 

அந்த சந்திப்பின் பின்னர், சந்திப்பு தொடர்பில் ஊடகங்கள் கேள்வியெழுப்பியபோதே அவர் மேற்கண்டவாறு தெரிவித்தார். மேலும் இது தொடர்பில் கருத்துவெளியிட்ட அவர், 

அந்த சாலை விடயமாக போக்குவரத்து அமைச்சர், இராஜாங்க அமைச்சரை பல்வேறு சந்தர்ப்பங்களில் சந்தித்து பேசியுள்ளோம். இது தொடர்பில் இன்று பிரதமருக்கு எடுத்துரைத்தவுடன் சம்மாந்துறை பிரதேசத்தை தான் தனிப்பட்டமுறையில் நன்றாக தெரிந்து வைத்திருப்பதாக தெரிவித்து போக்குவரத்து அமைச்சர் மற்றும் இலங்கை போக்குவரத்து சபை தலைவர் ஆகியோரை பிரதமர் மஹிந்த ராஜபக்ஸ தொலைபேசி ஊடக தொடர்பு கொண்டு இவ்விடயத்தை உடனடியாக முடிவுக்கு கொண்டுவந்து தீர்வை வழங்குமாறு கேட்டுக்கொண்டார். அதன் போது இது தொடர்பில் விளக்கமளிக்க முனைந்த இலங்கை போக்குவரத்து சபை தலைவருக்கு கடும் தொனியில் பேசிய பிரதமர் உடனடியாக சாலையை மீண்டும் சம்மாந்துறையில் திறக்குமாறும், இடமாற்றம் செய்யப்பட்ட ஊழியர்களை  மீள சம்மாந்துறைக்கு திருப்பியனுப்புமாறும் உடனடியாக இந்த டிப்போவை இயங்கவைக்குமாறு உத்தவிட்டார். இதை தொடர்ந்து மீண்டும் சம்மாந்துறையில் சாலையை இயக்க நடவடிக்கைகள் எடுக்கப்பட்டு வருகிறது. அத்துடன் மேலும் பல முக்கிய விடயங்களும் இங்கு பேசப்பட்டது. 

இந்த சந்திப்பில் என்னுடன் முன்னாள் கிழக்கு முதலமைச்சரும் பாராளுமன்ற உறுப்பினருமான அல்ஹாபிழ் இசட்.ஏ. நஸீர் அஹமட், முன்னாள் இராஜாங்க அமைச்சரும், பாராளுமன்ற உறுப்பினருமான பைஸல் காஸிம், முன்னாள் பிரதியமைச்சரும், பாராளுமன்ற உறுப்பினருமான எம்.எஸ்.தௌபீக், பாராளுமன்ற உறுப்பினர்களான இசாக் ரஹ்மான், சட்டத்தரணி முஷாரப் முதுநபின், அலிசப்ரி ரஹீம் ஆகியோரும் கலந்து கொண்டிருந்தனர் என்றார்.

கத்தாரில் அண்மைய காலங்களில் எம்மை விட்டு பிரிந்த சகோதரர்கள் இவர்கள்

யா அல்லாஹ் அவர்களுக்கு  ஜன்னத்ததுல் பிர்தௌஸ் எனும் உயர்ந்த சுவர்க்கத்தை வழங்கிவிடு 🤲🤲

அவரால் துன்பத்தில் ஆழ்ந்திருக்கும் குடும்பத்திற்காகவும்   இந்தப் புனித ரமழானில் துஆச் செய்வோம். CWF

ஈஸ்டர் தாக்குதலுடன் தொடர்புள்ள இன்னும் சிலர், கைது செய்யப்படாததால் நாடு பெரும் ஆபத்தில் உள்ளது - சோபித தேரர்


நாட்டில் தீவிரவாதிகளின் அச்சுறுத்தல் இன்னமும்  நிலவுகிறது என்றும், எதிர்காலத்தில் ஏற்படக்கூடிய எந்தவொரு தாக்குதலி லிருந்தும் பொதுமக்களைப் பாதுகாப்பது அரசாங்கத்தின் முக்கிய பொறுப்பு என்றும் ஓமல்பே சோபித தேரர் தெரிவித்துள்ளார்.

உயிர்த்த ஞாயிறு தாக்குதலின் இரு வருடப் பூர்த்தியை முன்னிட்டு கொ ழும்பு – கொச்சிக்கடை புனித அந்தோனியார் தேவாலயத்தில் இன்றைய தினம் இடம்பெற்ற ஊடக சந்திப்பில் ஓமல்பே சோபித தேரர் தெரிவித்துள்ளார்.

நாங்கள் ஆபத்தான நிலையில் இருக்கிறோம் என்ன நடக்குமோ?

உயிர்த்த ஞாயிறு தாக்குதலுக்காகத் தற்கொலை குண்டுவீச்சாளர்களுடன் பயிற்சி பெற்ற மற்றும் நடவடிக்கைகளுக்குக் கட்டளையிட்ட நபர்கள் இன்னமும் கைது செய்யப்படாததால், நாடு பெரும் ஆபத்தில் உள்ளது என ஓமல்பே சோபித தேரர் தெரிவித்துள்ளார்.

பயங்கரவாதிகள் தங்கள் இலக்குகளை நிறைவேற்ற எந்த நேரத்திலும் மீண்டும் தாக்குதலை நடத்துவார்கள் என அவர் மேலும் தெரிவித்துள்ளார்.

பௌத்த விகாரைகள், மத வழிபாடுகள், கோவில்கள் மற்றும் தேவாலயங் களில் இதுபோன்ற தாக்குதல்கள் மீண்டும் ஏற்படுமா என்ற சந்தேகம் எங் களுக்குள் எழாமல் இருக்க அரசாங்கம் பொறுப்புடன் நடந்து கொள்ள வேண்டும் என ஓமல்பே சோபித தேரர் தெரிவித்துள்ளார். TL

இம்ரான் கானின் திட்டம் - இலங்கையிலிருந்து மூத்த பிக்குகள் குழு பாகிஸ்தான் சென்றது


பாகிஸ்தான் பிரதமர் இம்ரான் கானின் பெளத்த மத சுற்றுலாத்துறையை  மேம்படுத்துவதற்கான திட்டத்தினூடாக , இலங்கையைச் சேர்ந்த மூத்த பெளத்த பிக்குகள் அடங்கிய உயர்மட்டக்குழு 2021 ஏப்ரல் 19 முதல் 26 வரை பாகிஸ்தானுக்கான விஜயம் ஒன்றை மேற்கொண்டுள்ளது.

பாகிஸ்தான் ஜனாதிபதி மற்றும் பிரதமரை சந்திப்பதோடு, இத்தூதுக்குழுவினர் டாக்ஸிலாவில் உள்ள காந்தாரா நாகரிகத்தின் புகழ்பெற்ற பாரம்பரிய இடங்களையும், மர்தானில் உள்ள ஸ்வாட் மற்றும் தக்த்-இ-பாஹியையும் பார்வையிடவுள்ளனர். மேலும் லாகூர் மற்றும் இஸ்லாமாபாத்தில் உள்ள  பல்வேறு வரலாற்று மற்றும் தொல்பொருள் அற்புதங்களையும் அவர்கள் பார்வையிட ஏற்பாடுகள் செய்யப்பட்டுள்ளன.

பாகிஸ்தான் பிரதமரின்  அண்மைகால இலங்கை விஜயத்தைத்  தொடர்ந்து, பாகிஸ்தானுக்கான மத சுற்றுலாத்துறையை  மேம்படுத்துவதற்கும், பாகிஸ்தான் மற்றும் இலங்கை மக்களிடையேயான தொடர்புகளை  மேம்படுத்துவதற்கும் இலங்கையிலுள்ள  பாகிஸ்தான் உயர்ஸ்தானிகராலயம் உயர்மட்ட  பெளத்த பிக்குகளின் விஜயத்தை  ஏற்பாடு செய்துள்ளமை குறிப்பிடத்தக்கது.

பாகிஸ்தான் உயர் ஸ்தானிகர் மேஜர் ஜெனரல் (ஓய்வு பெற்ற ) முஹம்மத் சாத் கட்டாக், 2021 ஏப்ரல் 19 அன்று கொழும்பு  பண்டாரநாயக்க சர்வதேச விமான நிலையத்தில் தனிப்பட்ட முறையில் தூதுக்குழுவைக் சந்தித்ததோடு இந்த விஜயத்தை மேற்கொள்வதற்காக  மூத்த பெளத்த பிக்குகள் காட்டிய ஆர்வத்தை பாராட்டினார்.




கதிரியக்கப் பொருட்களுடன் சீனக் கப்பல், உடனடியாக வெளியேற இலங்கை உத்தரவு


கதிரியக்கப் பொருள்களைக் கொண்ட சீனக் கப்பலை ஹம்பாந்தோட்ட துறைமுகத்தை விட்டு வெளியேறுமாறு இலங்கை உத்தரவிட்டுள்ளது.

குறித்த கப்பல் ஹம்பாந்தோட்டை துறைமுகத் திற்கு அருகிலுள்ள ஆழ்கடலில் பயணித்தபோது  தொழில்நுட்பக் கோளாறு ஏற்பட்டது.

இதனையடுத்து, குறித்த கப்பல் தொழில்நுட்ப கோளாறை சரிசெய்ய ஹம்பாந்தோட்டை துறைமுகத்தில் நங்கூரமிட கப்பலின் அதிகாரிகள் அனுமதி கோரியமை தெரியவந்துள்ளது.

ஆனால் கப்பல் பரிசோதிக்கப்பட்டபோது, ​​அதில் கதிரியக்க பொருட்கள் சேமிக்கப்பட்டிருப்பது கண்டுபிடிக்கப்பட்டது, இதனையடுத்து குறித்த கப்பலை துறைமுகத்தை விட்டு வெளியேறுமாறு தெரிவிக்கப் பட்டுள் ளது. TL

ஈஸ்டர் தாக்குதலின் உண்மையை மறைப்பது, தேசியப் பாதுகாப்புக்கு அச்சுறுத்தல், 2 வருட பொறுமைக்கு உண்மையை நிலைநாட்டு - நீர்கொழும்பில் ஆர்ப்பாட்டம்


- இஸ்மதுல் றஹுமான் -

உயிர்த்த ஞாயிறு தாக்குதலின் இரு வருட பூர்த்தியான நிலையில்  நீர்கொழும்பில் அமைதியான ஆர்பாட்டம் இடம் பெற்றது. நீர்கொழும்பு பிரஜைகள் ஒன்றியம் இதனை ஏற்பாடு செய்திருந்தது. உயிர்த்த ஞாயிறு கொடூர தாக்குதலின் உண்மையை மறைப்பது தேசிய பாதுகாப்பிற்கு அச்சுறுத்தல், இரண்டு வருட பொறுமைக்கு உண்மையை நிலைநாட்டு போன்ற பதாகைகள் நகரில் காட்சிப்படுத்தப்பட்டுள்ளன.




சஹ்ரான் ஏன் தேவாலயத்தில் தன்னை வெடிக்கவைக்கவில்லை, முஸ்லிம்ளையும் ஏன் கொலைசெய்தார் என்பதையும் ஆராய வேண்டும் - மல்கம் ரஞ்சித்


அரசியல் நிலைப்பாடுகளும் கூட்டணிகளை பாதுகாக்க வேண்டிய தேவையும் உயிர்த்தஞாயிறு தாக்குதல் தொடர்பான வெளிப்படையான விசாரணைகளிற்கு தடையாகவுள்ளன என கர்தினால் மல்கம் ரஞ்சித் தெரிவித்துள்ளார்.

உயிர்த்த ஞாயிறு தாக்குதலை நினைவுகூறும் நிகழ்வில் உரையாற்றுகையில் அவர் இதனை தெரிவித்துள்ளார்.

உயிர்த்த ஞாயிறு தாக்குதல் இடம்பெற்று இரண்டு வருடகாலமாகியுள்ள போதிலும் அதிகாரிகள் இன்னமும் உண்மையைகண்டுபிடிக்கவில்லைஎன அவர் குறிப்பிட்டுள்ளார்.

யார் ஏன் செய்தார்கள் என்ற கேள்விகளிற்கு இரண்டு வருடங்களிற்கு பின்னரும் அதிகாரிகள்  பதிலை கண்டுபிடிக்காதது ஆச்சரியமளிக்கின்றது என கர்தினால் மல்கம் ரஞ்சித் தெரிவித்துள்ளார்.

தற்போது அக்கறையின்மையே காணப்படுகின்றது என்பதை நாங்கள் வலியுறுத்தவேண்டும் என தெரிவித்துள்ள அவர் அனைத்து விடயங்களும் ஒருங்கிணைக்கப்பட்ட விதத்தில் விசாரிக்கப்படவில்லை எனவும் குறிப்பிட்டுள்ளார்.

சில விசாரணைகள் அரசியல் காரணங்களால் முடங்கியுள்ளன எனவும் தெரிவித்துள்ள கர்தினால் இந்த கேள்விகளிற்கு பதில் கிடைப்பது தேசத்திற்கு அவசியம் எனவும் தெரிவித்துள்ளார்.

கத்தோலிக்க சமூகம் தொடர்ந்தும் நீதி உண்மை மற்றும் வெளிப்படத்தன்மைக்காக போராடும் என அவர் தெரிவித்துள்ளார்.

நடைபெற்ற சம்பவங்களும்,இந்த சம்பவங்களில் கொல்லப்பட்ட 269 பேரும் இலங்கை சமூகத்தை அழித்துக்கொண்டிருக்கின்ற நோயினை வெளிப்படுத்துகின்றன இனங்களுக்கும் மதங்களிற்கும் இடையிலான நம்பிக்கையின்மை என்ற நோய் அது எனவும் அவர் தெரிவித்துள்ளார்.

நாங்கள் ஒன்றுபடவேண்டியதன் அவசியம் மிக தெளிவாக வெளிப்படுகின்றது எனவும் அவர் தெரிவித்துள்ளார்.

தாக்குதலை மேற்கொண்டவர்கள் ஒரு சமூகத்தை மாத்திரம் இலக்குவைக்கவில்லை பல மதங்கள் இனங்களை சேர்ந்தவர்களிற்கு மரணத்தை ஏற்படுத்த அவர்கள் தீர்மானி;த்தனர் எனவும் மல்கம் ரஞ்சித் தெரிவித்துள்ளார்.

ஜஹ்ரான் ஹாசிம் ஏன் தேவாலயத்தில் தன்னை  வெடிக்கவைக்காமல் ஹோட்டலில் தாக்குதலை மேற்கொள்ள தீர்மானித்தார் அதன் மூலம் கத்தோலிக்கர்கள் கிறிஸ்தவர்களை மாத்திரம் கொலை செய்யாமல் ஏன், முஸ்லீம்கள் மலாய இனத்தவர்களையும் கொலை செய்தார்  என்பதை நாங்கள் ஆராயவேண்டும் என கர்தினால் மல்கம் ரஞ்சித் தெரிவித்துள்ளார்.

உண்மையான கிறிஸ்தவ உணர்வின் அடிப்படையில் தாக்குதலின் பின்னர் தேவாலயங்களும் கத்தோலிக்க சமூகத்தினரும் மேலதிக வன்முறைகளை தவிர்த்தனர் என குறிப்பிட்டுள்ள அவர் இதன் மூலம் முஸ்லீம் சமூகத்தினரை இலக்குவைத்து இடம்பெற்றிருக்க கூடிய தாக்குதல்களை தவிர்த்தனர் எனவும் அவர் தெரிவித்துள்ளார்.

தாக்குதல் இடம்பெற்று சில நாட்களின் பின்னர் முஸ்லீம்களையும் சிங்களவர்களையும் மோதவிடுவதற்கான முயற்சிகள் இடம்பெற்றன என தெரிவித்துள்ள கர்தினால் மல்கம் ரஞ்சித் நாங்கள் தலையிட்டு அதனை தடுத்தோம் எனவும் குறிப்பிட்டுள்ளார். Thinakkural

கறுப்புப் பட்டியணிந்து பிரதமர் உரை - ஈஸ்டர் தாக்குதல் பற்றி பொய் பரப்புவதாக குற்றச்சாட்டு (வீடியோ)


ஏப்ரல் 21 உயிர்த்த ஞாயிறு தின தாக்குதல் இடம்பெற்று ஈராண்டுகளாகின்ற நிலையில் அது தொடர்பில் பிரதமர் மஹிந்த ராஜபக்ஷ இன்று (21) பாராளுமன்றத்தில் உரை ஒன்றை நிகழ்த்தியிருந்தார். 

வீடியோ

பாராளுமன்றத்தில் குழப்பம் - அடிபடத் தயாரான அரசியல்வாதிகள் (வீடியோ)


நாளைய தினம் -22- இடம்பெறவிருந்த அரசியல் பழிவாங்கள் தொடர்பில் விசாரணைகள் செய்வதற்காக நியமிக்கப்பட்ட ஜனாதிபதி ஆணைக்குழு தொடர்பாக இன்று -21- பாராளுமன்றத்தில் அமைதியின்மை ஏற்பட்டுள்ளது. 

ஆளும் கட்சி மற்றும் எதிர்க்கட்சி உறுப்பினர்கள் சபையின் நடுவின் ஆர்ப்பாட்டத்தில் ஈடுபட்டுள்ளனர். 

எவ்வாறாயினும் அமைதியின்மை காரணமாக பாராளுமன்றம் 10 நிமிடங்களுக்கு ஒத்திவைக்கப்பட்டுள்ளதாக தெரிவிக்கப்படுகின்றது.



பொதுஜனபெரமுன பிளவுபடாது, 12 கட்சிகளும் புரிந்துணர்வுடன் செயலாற்றுவதாக அறிவிப்பு


ஸ்ரீலங்கா பொதுஜனபெரமுன பிளவை நோக்கி செல்லவில்லை என அமைச்சர் கெஹெலிய ரம்புக்வெல தெரிவித்துள்ளார்.

பொதுஜன பெரமுனவில் இடம்பெற்றுள்ள கட்சியின் உறுப்பினர்கள் மத்தியில் உறுதியான புரிந்துணர்வு காணப்படுகின்றது என அமைச்சர் தெரிவித்துள்ளார்.

சில கருத்து வேறுபாடுகளும் புரிந்துணர்வின்மைகளும் காணப்படலாம் ஆனால் இறுதியில் இணக்கப்பாடு எட்டப்படுகின்றது என அவர் குறிப்பிட்டுள்ளார்.

ஸ்ரீலங்கா பொதுஜனபெரமுனவில் 12 கட்சிகள் உள்ளன நாங்கள் மிகவும் புரிந்துணர்வுடன் செயலாற்றுகின்றோம் என அமைச்சர் தெரிவித்துள்ளார்.

கட்சி பிளவுபடும் அளவிற்கு புரிந்துணர்வின்மை காணப்படவில்லை என தெரிவித்துள்ள அமைச்சர் பொதுஜனபெரமுன பிளவுபடவேண்டும் என்பதை சிலர் பார்க்க விரும்புகின்றனர் ஆனால் அது இடம்பெறாது என தெரிவித்துள்ளார்.

கூட்டணியில் இடம்பெற்றுள்ள சில கட்சிகள் மேதினப்பேரணிகளை தனியாக நடத்த விரும்புகின்றன இது ஒரு விடயமல்ல கடந்தகாலங்களில் இது இடம்பெற்றுள்ளது என அமைச்சர் தெரிவித்துள்ளார்.

தேர்தலின் போது அனைவரும் ஒரேமேடையில் தோன்றுவார்கள் என அமைச்சர் தெரிவித்துள்ளார். TL

ஈஸ்டர் தாக்குதலை நினைவுகூர்ந்த நாடாளுமன்றம், மௌன அஞ்சலி செலுத்தியது - கறுப்பு கோர்ட், பட்டிகளுடன் பாராளுமன்ற உறுப்பினர்கள்


உயிர்த்த ஞாயிறு தாக்குதலின் இரண்டாம் ஆண்டு நிறைவையொட்டி இலங்கை நாடாளுமன்றத்தில் இன்று -21- நாடாளுமன்ற உறுப்பினர்கள் அனைவரும் எழுந்து நின்று மௌன அஞ்சலி செலுத்தினர்.

பிரதமர் மஹிந்த ராஜபக்ஷவின் கோரிக்கைக்கு அமைய இவ்வாறு மௌன அஞ்சலி செலுத்தப்பட்டுள்ளதாக தெரிவிக்கப்படுகின்றது.

நாங்கள் பாடம் கற்றுக்கொண்டோம், அந்த தவறை மீண்டும் செய்ய மாட்டோம் - சஜித்


எதிர்வரும் ஜனாதிபதி தேர்தலில் பொது வேட்பாளர் ஒருவரை நிறுத்துவதற்கான யோசனையை கட்சி ஆதரிக்காது என ஐக்கிய மக்கள் சக்தியின் தலைவர் சஜித் பிரேமதாஸ தெரிவித்துள்ளார்.

கொழும்பு ஆங்கில ஊடகம் ஒன்று வெளியிட்டுள்ள செய்தியில் இந்த விடயம் தெரிவிக்கப்பட்டுள்ளது.

2024ம் ஆண்டு ஜனாதிபதித் தேர்தலுக்காக அனைத்து எதிர்க்கட்சிகளையும் ஒன்றிணைத்து ஒரு பொதுவான வேட்பாளரை நிறுத்துவதற்கு பல கட்சிகள் ஏற்கனவே பேச்சுவார்த்தைகளை தொடங்கியுள்ள நிலையில் எதிர்க்கட்சித் தலைவரின் அறிவிப்பு வெளியாகியுள்ளது.

கொழும்பு துறைமுக நகர சட்டமூலம் தொடர்பாக ஆளும் கட்சியின் நாடாளுமன்ற உறுப்பினர் விஜேதாச ராஜபக்ஷ அரசாங்கத்திற்கு எதிராக கருத்துகளை வெளியிட்டு வரும் நிலையில், இந்த விவாதங்கள் மேலும் சூடுபிடித்துள்ளன.

கட்சியின் பல மூத்த உறுப்பினர்களுடன் கலந்துரையாடிய சஜித் பிரேமதாஸ, கட்சி ஒரு பொதுவான வேட்பாளரை ஆதரிக்காது என்றும், கட்சித் தலைவர் அடுத்த தேர்தலுக்கான வேட்பாளராக இருப்பார் என்றும் கூறியுள்ளார்.

எவ்வாறாயினும், “2015 இல் நாங்கள் எங்கள் பாடங்களை கற்றுக்கொண்டோம், நாங்கள் அந்த தவறை மீண்டும் செய்ய மாட்டோம்" என்று சஜித் பிரேமதாஸ தெரிவித்துள்ளார் என அந்த செய்தியில் மேலும் தெரிவிக்கப்பட்டுள்ளது.   

இலங்கையில் ஆபத்தான வாகனமாக மாறிய மோட்டார் சைக்கிள்


இலங்கையில் பல பகுதிகளில் நேற்றைய தினம் இடம்பெற்ற விபத்துக்கள் காரணமாக 6 பேர் உயிரிழந்துள்ளனர். இதில் மூவர் மோட்டார் சைக்கிள் ஓட்டுநர்களாகும். ஏனைய மூவர் வீதியில் பயணித்தவர்கள் என பொலிஸ் ஊடக பிரிவு தெரிவித்துள்ளது.

அதற்கமைய, கடந்த 13ஆம் திகதியில் இருந்து நேற்று வரையான 8 நாட்களில் இடம்பெற்ற விபத்துக்கள் காரணமாக 76 பேர் உயிரிழந்துள்ளதாக பொலிஸ் அறிக்கைகள் குறிப்பிட்டுள்ளன. உயிரிழந்தவர்களில் 55 வீதமானோர் மோட்டார் சைக்கிள் ஓட்டுநர்களாகும்.

மோட்டார் சைக்கிள் விபத்துக்களினால் உயிரிழப்பவர்களின் எண்ணிக்கை பாரியளவு அதிகரித்துள்ளது. அத்துடன் உயிர் பறிக்கும் ஆபத்தான வாகனமாக மோட்டார் சைக்கிள் மாறியுள்ளதாக பொலிஸார் குறிப்பிட்டுள்ளனர்.

30 நொடிகளில் கொரோனா வைரஸை கண்டுபிடிக்கலாம் - இலங்கை விஞ்ஞானி தலைமையிலான குழு கண்டுபிடிப்பு


30 நொடிகளுக்குள் கோவிட் வைரஸ் தொற்றினை கண்டுபிடிக்க கூடிய பரிசோதனை ஒன்றை இலங்கை விஞ்ஞானிகள் உட்பட குழுவினர் கண்டுபிடித்துள்ளனர்.

அமெரிக்காவின் நிவ் மெக்சிகோ பிராந்தியத்தில் பணியாற்றும் இலங்கை விஞ்ஞானிகள் உட்பட குழுவினர் இந்த பரிசோதனையை அறிமுகப்படுத்தியுள்ளனர்.

இந்த பரிசோதனை குழுவின் பிரதானியாக இலங்கை விஞ்ஞானியான துவினி தினுஷிக்கா ராஜபக்ஷ செயற்பட்டுள்ளார்.

பொதுவாக பீசீஆர் பரிசோதனை மேற்கொண்ட பின்னர் முடிவுகள் பெறுவதற்கு இரண்டு நாட்களாகின்றது. புதிய முறையின் மூலம் 30 நொடிகளில் முடிவுகளை பெற்றுக் கொள்ள முடியும் என அறிவிக்கப்பட்டுள்ளளது.

இந்த முறையில் பலூன் ஒன்றை ஊதி அதில் சுவாசித்த காற்றை கொண்டு பரிசோதனை மேற்கொள்ளப்படும் என விஞ்ஞானிகள் குறிப்பிட்டுள்ளனர்.

தாக்குதலிற்கு காரணமானவர்கள் எந்த பதவியிலிருந்தாலும், அரசாங்கம் அவர்களை தண்டிக்க தயங்காது - ஜோன்ஸ்டன்


நாடாளுமன்றத்தில் ஐக்கிய மக்கள் சக்தியின் நாடாளுமன்ற உறுப்பினர்கள் வெளியிட்ட உயிர்த்தஞாயிறுதாக்குதல் குறித்த விபரங்களை அவர்கள் சிஐடியினரிடம் கையளிக்கவேண்டும் என அமைச்சர் ஜோன்ஸ்டன் பெர்ணான்டோ வேண்டுகோள் விடுத்துள்ளார்.

இதன் மூலம் குற்றவாளி யார் என்பதை கண்டுபிடிப்பதற்கான அரசாங்கத்தின் முயற்சிகளிற்கு ஆதரவளிக்கவேண்டும் என அவர் வேண்டுகோள் விடு;த்துள்ளார்.

நாடாளுமன்றத்தில் ஐக்கியமக்கள் சக்தியும் நாங்களும் ஒருவர் மீது ஒருவர் சேற்றை வாரியிறைப்பதில் அர்த்தமில்லை என தெரிவித்துள்ள ஜோன்ஸ்டன் பெர்ணான்டோ தாக்குதலிற்கு யார் காரணம் என்பதை கண்டுபிடிப்பதற்கான அரசாஙகத்தின் முயற்சிகளிற்கு உதவுவதே உங்கள் கடமை எனவும் தெரிவித்துள்ளார்.

உயிர்த்த ஞாயிறு தாக்குதலிற்கு காரணமானவர்கள் எந்த பதவியிலிருந்தாலும் அவர்களுடைய அந்தஸ்த்து எவ்வாறானதாக காணப்பட்டாலும் அரசாங்கம் அவர்களை தண்டிக்க தயங்காது என அமைச்சர் தெரிவித்துள்ளார்

திருமதி உலக அழகி பட்டத்தை இழந்தார் இலங்கையர்


திருமதி உலக அழகியான கரோலின் ஜூரி தனது 2020 திருமதி உலக அழகி பட்டத்தை இழந்துள்ளார்.

திருமதி உலக அழகி கரோலின் ஜூரியின் இராஜினாமாவை ஏற்றுள்ளதாக தெரிவித்துள்ள, திருமதி உலக அழகிப் போட்டி அமைப்பானது, அப்போட்டியில் இரண்டாமிடம் பெற்ற அயர்லாந்தின் கேட் ஷ்னைடர், 2020 புதிய திருமதி உலக அழகியாக தெரிவாகியுள்ளதாக அறிவித்துள்ளது.

திருமதி உலக அழகி பட்டத்தை இழந்தார் கரோலின் ஜூரி-Caroline Jurie's Resignation Accepted By Mrs World Inc-New Winner is Kate Schneider

இது தொடர்பில் ஊடக அறிவிப்பொன்றை வெளியிட்டுள்ள திருமதி உலக அழகிப் போட்டி அமைப்பு இதனைத் தெரிவித்துள்ளது.

கரோலின் ஜூரி அனுப்பியுள்ள இராஜினாமா தங்களுக்கு கிடைத்துள்ளதாக தெரிவித்துள்ள அவ்வமைப்பு, தானாக முன்வந்து மேற்கொண்டுள்ள அவரது இராஜினாமா முடிவானது, முற்றிலும் அவரது சொந்த முடிவு எனவும் தெரிவித்துள்ளது.

கரோலின் ஜூரி மற்றும் அவரது குடும்பத்தினர்களின் எதிர்கால முயற்சிகள் சிறப்பாக அமைய வாழ்த்துவதாக, திருமதி உலக அழகிப் போட்டி அமைப்பு விடுத்துள்ள குறித்த ஊடக வெளியீட்டில் தெரிவித்துள்ளது.

அதன் அடிப்படையில், குறித்த போட்டியில் இரண்டாம் இடத்திற்கு தெரிவான அயர்லாந்தின் கேட் ஷ்னைடர் (Kate Schneider) புதிய 2020 திருமதி அழகியாக தெரிவாகியுள்ளதாக அவ்வமைப்பினால் அறிவிக்கப்பட்டுள்ளது.

கடந்த ஏப்ரல் 04ஆம் திகதி இடம்பெற்ற இலங்கை திருமதி அழகி போட்டியின் போது நடந்த சர்ச்சைக்குரிய சம்பவம் தொடர்பில், திருமதி அழகு ராணியாக முடிசூட்டப்பட்ட புஷ்பிகா டி சில்வாவுடனான முறுகல் நிலை சுமூகமாக முடிவுக்கு வராத நிலையில், அது தொடர்பில் தாக்கல் செய்யப்பட்ட வழக்கு நேற்று (20) ​​கொழும்பு பிரதான நீதவான் புத்திக ஸ்ரீ ராகல முன்னிலையில் விசாரணைக்கு எடுத்துக் கொள்ளப்பட்டது. இதன்போது இச்சம்பவத்துடன் தொடர்புடைய முன்னாள் திருமதி உலக அழகி கரோலின் ஜூரி மற்றும் மாடல் அழகி ச்சூலா பத்மேந்திர ஆகிய இருவரும் தலா ரூ. 100,000 ரொக்கப் பிணையில் விடுவிக்கப்பட்டிருந்தனர் என்பது குறிப்பிடத்தக்கது.


கொரோனா எச்சரிக்கை, ICU வில் அதிகரிக்கும் நோயாளிகள் - சில தினங்களாக புதிய திரிபுகள் அடையாளம்


இலங்கையில் கொரோனா வைரஸ் தொற்று பரவல் அதிகரித்துள்ள நிலையில், தீவிர சிகிச்சை பிரிவுகளில் அனுமதிக்கப்பட்ட நோயாளிகளின் எண்ணிக்கையில் பாரிய அதிகரிப்பு ஏற்பட்டுள்ளதாக சுகாதார மேம்பாட்டு பணியகம் தெரிவித்துள்ளது.

இது தொடர்பில் அறிவித்தலொன்றை வெளியிட்டுள்ள சுகாதார மேம்பாட்டுப் பணியகம் இதனைத் தெரிவித்துள்ளதோடு, அதில் மேலும் தெரிவிக்கப்பட்டுள்ளதாவது,

கடந்த சில நாட்களாக இலங்கையில் இதற்கு முன்னர் அடையாளம் காணப்படாத கொரோனா வைரஸின் மாறுபட்ட திரிபுகள் பதிவாகியுள்ளன. இது தொடர்பான விஞ்ஞான ரீதியான தரவுகளின் ஆய்வு மற்றும் தகவல்களை கண்டறியும் நடவடிக்கைகள் ஏற்கனவே மேற்கொள்ளப்பட்டு வரும் நிலையில், பொதுமக்களாகிய நாம் அனைவரும், இவ்வாறு தொற்று அதிகரித்து வரும் நிலைமை தொடர்பில் மிக எச்சரிக்கையாக இருக்க வேண்டும்.

நோய்த் தடுப்பு ஆலோசனைகளைப் பின்பற்றுவதன் மூலம் நோய் பரவுவதை மிக விரைவாகக் கட்டுப்படுத்த முடியும் என்பதை நாம் அனைவரும் கடந்த கால அனுபவங்கள் மூலம் அறிந்து வைத்துள்ளோம். கடந்த பண்டிகை காலங்களிலும் அதனைத் தொடர்ந்தும், இவ்வாறான சுகாதார வழிகாட்டல்களை பின்பற்றுவது படிப்படியாகக் குறைந்து வருகின்றமையானது, தற்போது உருவாகி வரும் பாதிப்பான நிலைக்கு வழிவகுத்துள்ளது என்பது சந்தேகத்திற்கிடமின்றிய உண்மையாகும்.

கடுமையான சட்டங்களை நடைமுறைப்படுத்துவது மற்றும் பயணக் கட்டுப்பாடுகளை விதிப்பது போன்ற விடயங்களைத் தவிர்க்க வேண்டுமாயின், ஒரு சமூகமாக சிந்தித்து, நோய்த் தடுப்பு தொடர்பான எமது பொறுப்பை நினைவில் கொள்ள வேண்டிய சரியான தருணம் இதுவாகும்.

கைகளை சுத்தமாக வைத்திருத்தல், முகக்கவசம் அணிதல், சமூக இடைவெளி பேணுதல், இருமல், தொண்டை வலி அல்லது தடிமன் போன்ற அறிகுறிகள் இருந்தால் மனிதர்கள் அதிகளவில் நடமாடும் இடங்களை தவிர்த்தல் உள்ளிட்ட விடயங்களை கடைப்பிப்பதனாது, இதற்கான தடுப்பு நடவடிக்கைகளாகும்.

சுகாதார வழிகாட்டல்களை முறையாகக் கடைப்பிடித்ததன் மூலம் கடந்த சில மாதங்களாக நாம் அனைவரும் ஒருவித சுதந்திரத்தை அனுபவிக்க முடிந்தது. நாம் முன்னர் கடைப்பிடித்த நோய்த்தடுப்பு நடவடிக்கைள், நம்மாலேயே நடைமுறைப்படுத்தப்பட்டு வந்ததால், மீண்டும் அவ்வழிகாட்டல்களை கடைபிடிப்பதானது கடினமான விடயமன்று.

எனவே, எதிர்வரும் காலப்பகுதி முழுவதும் சுகாதார வழிகாட்டல்களைப் பின்பற்றுவதன் மூலமும், தேவையற்ற பயணங்களைக் குறைப்பதன் மூலமும், அறிகுறிகள் காணப்படும் நிலையில் ஏனையவர்களைப் பாதுகாக்கும் வகையில் செயற்படுவதன் மூலமும், நாடு முழுவதும் மீண்டும் கொரோனா வைரஸ் நோய்த் தொற்று பரவாமல் தடுக்க உங்களால் முடிந்த அனைத்து நடவடிக்கைகளையும் மேற்கொள்ளுமாறு, சுகாதார அமைச்சு சார்பில், அனைத்து இலங்கையர்களிடமும் நாம் வேண்டுகோள் விடுக்கின்றோம். என சுகாதார மேம்பாட்டு பணியகம் கோரிக்கை விடுத்துள்ளது.

4 அரசியல் கட்சிகள், தொடர்பில் விசாரணை


கணக்காய்வு அறிக்கைகளை உரிய முறையில் சமர்ப்பிக்க தவறிய 04 அரசியல் கட்சிகளை நாளை (22) விசாரணைக்கு அழைக்க தீர்மானித்துள்ளதாக தேசிய தேர்தல்கள் ஆணைக்குழு தெரிவித்துள்ளது.

கணக்காய்வு அறிக்கைகளை சமர்ப்பிக்குமாறு பல சந்தர்ப்பங்களில் குறித்த அரசியல் கட்சிகளுக்கு அறிவித்ததாக தேசிய தேர்தல்கள் ஆணைக்குழுவின் தலைவர், சட்டத்தரணி நிமல் புஞ்சிஹேவா தெரிவித்தார்.

உரிய முறையில் கணக்காய்வு அறிக்கைகளை சமர்ப்பிக்க தவறும் அரசியல் கட்சிகளின் செயற்பாடுகளை எதிர்காலத்தில் நிறுத்துவதற்கு நடவடிக்கை எடுக்கப்படவுள்ளதாகவும் சட்டத்தரணி நிமல் புஞ்சிஹேவா கூறினார்.

உண்மையையும் பொய்யையும், புரிந்துக்கொள்ளுமாறு சந்திரிகாவிடம் தயாசிறி கோரிக்கை


உண்மையையும் பொய்யையும் புரிந்துக்கொள்ளுமாறு முன்னாள் ஜனாதிபதி சந்திரிகா பண்டாரநாயக்க குமாரதுங்கவிடம், ஸ்ரீலங்கா சுதந்திரக் கட்சியின் பொதுச் செயலாளரான இராஜாங்க அமைச்சர் தயாசிறி ஜயசேகர கோரிக்கை விடுத்துள்ளார்.

கடிதம் ஒன்றின் ஊடாக அவரினால் இந்த கோரிக்கை விடுக்கப்பட்டுள்ளது.

கடந்த 5 ஆம் திகதி நடத்த திட்டமிடப்பட்டிருந்த ஸ்ரீலங்கா சுதந்திரக் கட்சியின் கூட்டம் ஒன்றை இரத்துச் செய்யுமாறு அறிவித்து அவரினால் வெளியிடப்பட்ட கடிதம் ஒன்று தொடர்பில் இந்தக் கடிதம் அனுப்பப்பட்டுள்ளது.

கட்சியின் கூட்டம் மற்றும் ஏனைய செயற்பாடுகள் தொடர்பில், முன்னாள் ஜனாதிபதிக்கு அழைப்பு விடுக்கப்படாமை, சூழ்ச்சியானதல்ல என்றும், மனச்சாட்சிக்கு அமைய உண்மையை புரிந்துக்கொள்ளுமாறும் ஸ்ரீலங்கா சுதந்திரக் கட்சியின் பொதுச் செயலாளர் தயாசிறி ஜயசேகர அந்தக் கடிதத்தில் கோரியுள்ளார்.

ஈஸ்டர் தாக்குதல் நடத்தப்பட்டு இன்றுடன் ஈராண்டுகள் பூர்த்தி - நாடளாவிய ரீதியில் நினைவேந்தல் நிகழ்வு


2019 ஏப்ரல் 21ஆம் திகதி ஈஸ்டர் தாக்குதல் நடத்தப்பட்டு இன்றுடன்  ஈராண்டுகள் பூர்த்தியாகின்றன. இந்த தாக்குதலில் உயிரிழந்தோரை நினைவுகூரும் நிகழ்வுகள் நாடளாவிய ரீதியில் நடைபெற்று வருகின்றன.

கொச்சிகடை புனித அந்தோனியார் தேவாலய வளாகத்தில், பேராயர் கர்தினால் மெல்கம் ரஞ்ஜித் ஆண்டகை தலைமையில் இந்த நிகழ்வு நடைபெறுகிறது.

அங்கு, வெளிநாட்டும“ தூதுவர்கள், சமய தலைவர்கள், பாதிக்கப்பட்ட குடும்பங்களைச் சேர்ந்த உறுப்பினர்கள் உள்ளிட்ட பலரும் கலந்துகொண்டுள்ளனர்.

மன்னர் சல்மானின் ரமழான் அன்பளிப்பு - 21 மொழிகளில், 10 லட்சம் திருக்குர்ஆன் பிரதிகள் 28 நாடுகளுக்கு விநியோகம்

இரண்டு புனித இறையில்லங்களின் பராமரிப்பாளரான சவூதி அரேபிய மன்னரின் ரமலான் அன்பளிப்பாக 21 வெவ்வேறு மொழிகளில் அச்சிடப்பட்ட பத்து லட்சம் திருக்குர்ஆன் பிரதிகள் 28 நாடுகளில் விநியோகம் செய்யப்படவிருக்கிறது.

சவூதி அரேபியா இஸ்லாமிய விவகாரங்கள் மற்றும் அழைப்பியல் துறை அமைச்சர் டாக்டர் அப்துல் லத்தீப் பின் அப்துல் அஸீஸ் மேற்பார்வையில் மதினா

King Fahad Glorious Quran Complex ல் அச்சிடப்பட்ட திருக்குர்ஆன் பிரதிகள் அந்தந்த நாடுகளின் தூதரகங்கள் வழி விநியோகம் செய்யப்பட கப்பல் மூலம் கண்டெய்னரில் அனுப்பப்பட்டு வருகிறது.


16 வருடங்களாக தொடர்ந்து, ரமழான் நோன்பு பிடிக்கும் Dr மனோஜ்குமார்


டாக்டர் கே.எஸ்.மனோஜ்குமார் கடந்த 16 வருடங்களாக தொடர்ந்து ரமலான் மாதம் முழுவதும் நோன்பு பிடித்து வருகிறார்..

2006 ல் ஆலப்புழா தொகுதி பாராளுமன்ற உறுப்பினராக பதவி வகித்த போது, இவருக்கு உதவியாளராக இருந்த இரு முஸ்லிம் ஊழியர்கள் ரமலான் காலங்களில் நோன்பிருப்பதை பார்த்த மனோஜ்குமார் அவர்களுக்கு ஐக்கியம் தெரிவித்து தானும் விரதம் இருக்க துவங்கியதாகவும், பின்னர் அந்த பழக்கம் ஆண்டு தோறும் தொடர்வதாகவும் பெருமிதத்துடன் கூறுகிறார்.

இடையில் பல வருடங்கள் மஸ்கட்டில் பதல் அல் ஷமா மருத்துவமனையில் டாக்டராக பணியாற்றிய காலத்திலும் நோன்பை தவறவிட்டதில்லை என்று கூறும் டாக்டர் மனோஜ், இந்த வருடம் ரமலான் முதல் இரண்டு நோன்பு ஆலப்புழையில் அருகில் உள்ள மசூதியில் சென்று நோன்பு திறந்ததாகவும், தனது மனைவி இஃப்தாருக்கும் ஷஹர் வைக்கவும் சிரமம் பாராது உணவு பரிமாறுவதாகவும் கூறினார்.

தற்போது ஆலப்புழா சட்டமன்ற தேர்தலில் காங்கிரஸ் கட்சி சார்பில் போட்டியிட்ட டாக்டர் மனோஜ் தேர்தல் முடிவுகளுக்காக காத்திருக்கிறார்

Colachel Azheem

April 20, 2021

மாகாண சபைத் தேர்தலில் கட்சி ஒன்றில் 3 பேரை முன்னிறுத்த ஆளும்கட்சி இணக்கம்


மாகாண சபைத் தேர்தலில், தொகுதி ஒன்றுக்காக, கட்சி ஒன்றில் மூன்று பேரை முன்னிறுத்தும் யோசனைக்கு, ஆளும்கட்சி நாடாளுமன்றக் குழுவின் ஏகமனதாக இணக்கம் வெளியிட்டுள்ளது.

ஆளும்கட்சியின் நாடாளுமன்ற குழு, பிரதமர் மஹிந்த ராஜபக்ஷ தலைமையில் கூடியபோதே, இந்த இணக்கப்பாடு எட்டப்பட்டுள்ளதாக நாடாளுமன்ற உறுப்பினர் மிலான் ஜயதிலக்க தெரிவித்துள்ளார்.

தொகுதி ஒன்றில் மூன்று பேரை முன்னிறுத்தி, அவர்களில் மக்களின் ஆதரவை அதிகம் பெறும் நபருக்கு, அந்த தொகுதியின் உறுப்பினராவதற்கான சந்தர்ப்பத்தை ஏற்படுத்தும் வேலைத்திட்டத்தை நடைமுறைப்படுத்த யோசனை முன்வைக்கப்பட்டது.

குறித்த சந்தர்ப்பத்தில் குழுவிலிருந்த அனைவராலும் அந்த யோசனை ஏகமனதாக நிறைவேற்றப்பட்டது.

சிறு கட்சிகளைப் பிரதிநிதித்துவப்படுத்தும் பெருமளவானோரும், இந்தக் கூட்டத்தில் பங்கேற்றிருந்ததாக நாடாளுமன்ற உறுப்பினர் மிலான் ஜயதிலக்க தெரிவித்துள்ளார்.

இளம் உறுப்பினர்கள், நாடாளுமன்றத்திற்கு செல்லவேண்டுமாயின் இவ்வாறான முறைமை இருக்க வேண்டும்.

இல்லாவிட்டால், தொகுதி ஒன்றில்இ எல்லா சந்தர்ப்பத்திலும் ஒருவருடைய பெயரே முன்வைக்கப்படும் என்று நாடாளுமன்ற உறுப்பினர் மிலான் ஜயதிலக்க குறிப்பிட்டுள்ளார்.

முஸ்லிம்கள் பீதியில் உள்ளனர் - நிம்மதியாக வாழ அரசாங்கம் நடவடிக்கை எடுக்க வேண்டும் - ஹரீஸ் (வீடியோ)

தடை செய்யப்பட்ட இஸ்லாமிய அமைப்புக்கள் மார்க்க ரீதியான கொள்கைகளை பின்பற்றுகின்ற அமைப்புகளாக செயற்பட்டார்களே ஒழிய பயங்கரவாதத்தை ஊக்குவிக்கின்ற அமைப்புக்களாக ஒரு போதும் செயற்படவில்லை. என திகாமடுல்ல பாராளுமன்ற உறுப்பினர் எச்.எம்.எம் ஹரீஸ் இன்று -21-பாராளுமன்றத்தில் உரையாற்றும் போது மேற்கண்டவாறு குறிப்பிட்டார்.அவர் தொடர்ந்தும் கருத்து தெரிவிக்கையில்..

எமது நாட்டில் ஈஸ்டர் குண்டு வெடிப்பின் இரண்டாவது ஆண்டு நினைவு தினம் நாளை 21ம் திகதி அனுஸ்டிக்கப்பட இருக்கின்ற சூழ்நிலையில் நாட்டில் வாழ்கின்ற சகல சமூகங்களும் பாதுகாப்பாகவும், ஒன்றுமையாகவும் வாழ வேண்டும் என்பதுதான் எங்கள் ஒவ்வொருவருடைய அவாவாகவும்,நோக்கமாகவும் இருக்கின்றது. சஹ்ரானுடைய பாசிச மனநோய் கொண்ட பைத்தியட்காரன் என்று சொல்லும் அவனும் அவனுடைய கும்பலும் செய்த நாசகார செயலினால் இந்த நாட்டில் 300ற்கு மேற்பட்ட கிறிஸ்தவ மக்கள் பழியானார்கள்.அந்த மக்களுக்காக நாங்கள் இப்போதும் அனுதாபம் தெரிவிக்கின்ற அதே சூழ்நிலையில் இதற்கு பின்னனியாக இருந்து செயற்பட்ட சக்திகள் உண்மையில் இன்னும் வெளியே கொண்டுவரப்படவில்லை. இதைத்தான் இன்று எல்லோரும் பேசுகின்றார்கள் மரியாதைக்குரிய கார்டினல் மல்கம் ரஞ்சித் அவர்கள் கூட நேற்று முன்தினம் ஒரு அறிக்கையும், நேற்று ஒரு அறிக்கையும் வெளியிட்டு இருக்கின்றார். அதில் வெளிநாட்டு சக்தியின் தேவைக்காக இந்த ஈஸ்டர் குண்டு தாக்குதல் செயற்பாடு நிறைவேற்றப்பட்டுள்ளதாக ஒரு கூற்று கூறப்பட்டு இருக்கின்றது. அவர் ஒரு சாதாரண நபர் அல்ல கிறிஸ்த சமூகத்தின் தலைவராக இருக்கின்ற ஒருவர் இவ்வாறான ஒரு குற்றச்சாட்டை கூறுகின்ற போதும் அதே நேரம் ஜனாதிபதி ஆணைக்குழுவில் இது சம்மந்தமான பல்வேறு விடயங்கள் வெளியே கொண்டுவரப்பட்டு இருக்கின்ற ஒரு சூழ்நிலையில் இது விடயமாக உரிய விசாரணைகளை நடாத்தி இதற்கான காரண பின்னனியாக உள்ள சக்திகள் வெளியே கொண்டு வரப்பட்டு தண்டிக்கப்பட வேண்டும். அவ்வாறு இல்லாமல் இந்த நாட்டில் வாழ்கின்ற 20 இலட்சம் முஸ்லிம் சமூகத்தில் இது தொடர்பான தொடர் அழுத்தங்களும், தொடர் கைதுகளும்,விசாரனைகளும்,பல நடவடிக்கைகளும் முஸ்லிம் சமூகத்தை தொடர்ச்சியாக பீதியில் வாழ்கின்ற ஒரு சமூகமாக இன்று மாற்றப்பட்டு இருக்கின்றது. குறிப்பாக பெளத்த ,தமிழ் மற்றும் கிறித்தவ சமூகங்களில் பல்வேறு மதப் பிரிவுகளும், கொள்கைகளும், ஜாதிப் பிரிவுகளும் காணப்படுகின்றன. அவ்வாறு தான் முஸ்லிம் சமூகத்திலும் மதக் கொள்கைகள் பல இருந்து கொண்டு இருக்கின்றது. அந்த கொள்கைகள் இன்று பயங்கரவாதமாக பிரகடனப்படுத்தப்பட்டுள்ளது. எமது நாட்டில் பாரம்பரியமாக முஸ்லிம் சமூகம் சுன்னத்வல் ஜமாஅத் என்ற கொள்கையை பின்பற்றுபவர்களாக இருந்தாலும் மத்திய கிழக்கில் செல்வாக்கு பெற்ற அதனோடு சம்மந்தப்பட்ட தெளஹீத் பிரிவுக் கொள்கையினை பின்பற்றுகின்ற பல்வேறு மார்க்க அமைப்புக்களும் இந்த நாட்டில் செயற்பட்டு வந்தன. அவர்கள் மார்க்க ரீதியாக கொள்கைகளை பின்பற்றுகின்ற ஒரு அமைப்பாக செயற்பட்டார்களே ஒழிய அவர்கள் பயங்கரவாதத்தை ஊக்குவிக்கின்ற, பயங்கரவாதத்திற்கு நிதியளிப்பு செய்கின்ற அமைப்புக்களாக ஒரு போதும் செயற்படவில்லை. எனினும் எவ்வித விசாரனைகளும் இன்றி கடந்த ஒரு வாரத்திற்கு முன்பு 11 அமைப்புக்கள் தடை செய்யப்பட்டு இருக்கின்றன. அதில் சில அமைப்புகள் மிக பாரம்பரியமாக 70 ஆண்டுகளாக இந்த நாட்டில் அரபு கல்லூரிகளை நிருவகித்ததோடு பல ஏழை எளிய மக்களுக்கு உதவி செய்தல், வீடுகளை கட்டிக் கொடுத்தல், கல்விக்காக உதவி செய்தல் போன்ற அளப்பரிய சேவைகளையே இவ் அமைப்புகள் செய்து கொண்டு இருந்தது. இந்த அமைப்புகள் எந்தவித விசாரனைகளும் இன்றி தடை செய்யப்பட்டு இன்று பல நூற்றுக்கணக்கான பள்ளிவாசல்களும் மூடப்பட்டு இருகின்றன. ஒரு முஸ்லிம் சமூகத்தின் பாராளுமன்ற உறுப்பினர் என்ற ரீதியில் மிகவும் கவலையடைகின்றேன்.இந்த விடயம் சம்மந்தமாக குறைந்தபட்சம் ஆளும் தரப்போடு தொடர்புடைய முஸ்லிம் பாராளுமன்ற உறுப்பினர்களையாவது அரசின் தலைவர்கள் அழைத்து இதில் உள்ள விடயங்களை பேசி இந்த அமைப்புகளுடைய தடைகளை நீக்குவதற்கு இந்த அரசாங்கம் நடவடிக்கைகள் எடுக்க வேண்டும். அதேநேரம் நேற்று பாதர் சிரீல் காமினி அவர்கள் 350 இஸ்லாமிய பயங்கரவாதிகள் இந்த நாட்டில் நடமாடுகின்றார்கள் என்ற பெரும் குற்றச்சாட்டை முன்வைத்துள்ளார். இது ஒரு பீதியை கிளப்புகின்ற நடவடிக்கையாகும். இது சம்மந்தமாக அரசின் புலனாய்வுப் பிரிவு உடனடியாக அவரை விசாரனை செய்து இது தொடர்பான உண்மைத்தன்மையினை வெளிக்கொண்டு வந்து முஸ்லிம் சமூகத்தை நிம்மதியாக இந்த புனித ரமழான் மாதத்தில் வாழ வைப்பதற்கு அரசாங்கம் நடவடிக்கை எடுக்க வேண்டும். என்று கேட்டு கொள்கின்றேன் என குறிப்பிட்டார்.

பிரதமர் மகிந்தவுடன் நாளை 7 முஸ்லிம் Mp க்களும் அவசர சந்திப்பு


(சர்ஜுன் லாபீர்)

நாளை புதன்கிழமை  (21) காலை 10.30 மணிக்கு 20வது சீர்திருத்த சட்டமூலத்திற்கு ஆதரவு தெரிவித்த 07 முஸ்லிம் பாராளுமன்ற உறுப்பினர்களையும் பிரதமர் மஹிந்த ராஜபக்ச சந்தித்து பேசவுள்ளார்.

இந் சந்திப்பில் கடந்த வாரம் தடைசெய்யப்பட்ட முஸ்லிம் அமைப்புகளின் விவகாரம், சம்மாந்துறை பஸ் டிப்போ விவகாரம் மற்றும் மாகாண சபை தேர்தல் முறைமை விவகாரம் போன்ற இன்னும் பல முக்கிய முஸ்லிம் சமூகம் சம்மந்தப்பட்ட விடயங்கள் இந்த சந்திப்பில் கலந்துரையாடப்படவுள்ளதாக பாராளுமன்ற உறுப்பினர் ஹரீஸ் தெரிவித்து இருந்தார்.

கொழும்பு துறைமுக நகருக்கு எதிராக நீதிமன்றில் சூடான வாதம் - ஆணைக்குழு ஜனாதிபதியின் தரகராக செயற்படுமென விஜயதாச எச்சரிக்கை


விடுதலைப்புலிகள் இயக்கம் 30 வருடங்களாக யுத்தம் நடத்தியும் நாட்டின் ஒரு அங்குல இடத்தைக் கூட கைப்பற்றாத போது, தற்போதைய அரசாங்கம் கொழும்பு துறைமுக நகர் ஆணைக்குழுவிற்கான சட்டத்தினூடாக தனியான இராச்சியத்தை ஸ்தாபிப்பதற்குத் தேவையான கொள்கைகளை வகுப்பதாக ஜனாதிபதி சட்டத்தரணி விஜயதாச ராஜபக்ச உயர் நீதிமன்றத்தில் இன்று -20- தெரிவித்தார்.

மொண்டிவீடியோ பிரகடனத்திற்கு அமைய, தனி நாடாக அறிவிப்பதற்குத் தேவையான அனைத்து சாதகமான விடயங்களும் குறித்த சட்டமூலத்தினூடாக கொழும்பு துறைமுக நகருக்கு வழங்கப்படவுள்ளதாக விஜயதாச ராஜபக்ச குறிப்பிட்டார்.

கொழும்பு துறைமுக நகர் பொருளாதார வலய ஆணைக்குழுவிற்கான சட்டமூலத்தை ஆட்சேபனைக்கு உட்படுத்தி முருத்தெட்டுவே ஆனந்த தேரரால் தாக்கல் செய்யப்பட்ட மனு சார்பில் ஜனாதிபதி சட்டத்தரணி விஜயதாச ராஜபக்ச உயர் நீதிமன்றத்தில் இன்று ஆஜராகினார்.

சட்டமூலத்தினூடாக ஸ்தாபிக்கப்படும் ஆணைக்குழு, கொழும்பு துறைமுக நகரின் காணியை விற்பனை செய்யவும் குத்தகைக்கு விடவும் ஜனாதிபதியின் ஏலத் தரகராக செயற்படும் என சட்டத்தரணி தெரிவித்தார்.

சட்டமூலத்தில் உள்ளடக்கப்பட்டுள்ள சரத்துக்கள் நாட்டில் அமுல்படுத்தப்பட்டுள்ள சட்ட கட்டமைப்பை சீர்குலைப்பதாகவும் சட்டத்தரணி விஜயதாச ராஜபக்ச குறிப்பிட்டார்.

சுங்க கட்டளைச் சட்டம் கொழும்பு துறைமுக நகருக்கு பொருத்தமில்லை என்றால், நைட்ரஜன் துப்பாக்கிகள் உள்ளிட்ட தடை செய்யப்பட்ட பொருட்களை நாட்டிற்குள் கொண்டு வருவதை தடுக்க முடியாமல் போகும் எனவும் அவர் எடுத்துக்கூறினார்.

இந்த செயற்பாடு தேசிய பாதுகாப்பு மற்றும் நாட்டின் இறையாண்மைக்கு பாரிய அச்சுறுத்தலாக அமையும் எனவும் அவர் குறிப்பிட்டார்.

துறைமுக நகர் வலையத்திற்குள் உள்நாட்டு நிர்வாகம் இல்லாமையால், அங்கு வாழக்கூடியவர்களுக்கு வாக்குரிமை இல்லாது போகும் என இலங்கை சட்டத்தரணிகள் சங்கத்தின் செயலாளர் சட்டத்தரணி ரஜீவ அமரசூரியவின் மனு சார்பில் மன்றில் ஆஜராகிய ஜனாதிபதி சட்டத்தரணி உதித இகலஹேவா தெரிவித்தார்.

இதனூடாக அரசியலமைப்பின் மூன்றாவது மற்றும் நான்காவது சரத்துக்கள் மீறப்படுகின்றமையால், அது அரசியலமைப்பை மீறும் செயல் என அவர் கூறினார்.

குறித்த ஆணைக்குழுவினூடாக அறவிடப்படும் வரி மற்றும் கட்டணங்கள், நாட்டின் ஒன்றிணைந்த நிதியத்தில் வைப்பிலிடப்படாது ஆணைக்குழுவின் நிதியத்திலேயே வைப்பிலிடப்படும் எனவும் அவர் மன்றில் சுட்டிக்காட்டினார்.

சட்டமூலத்தை தயாரிக்கும் போது அதனுடன் தொடர்புடையவர்களுடன் கலந்துரையாடல் மேற்கொள்ளாமையும் ஒரு குறைபாடு என அவர் கூறினார்.

துறைமுக நகரின் நிர்வாகத்திற்காக நியமிக்கப்படும் ஆணைக்குழுவில் அனைவரும் வௌிநாட்டவர்களாக காணப்படுவதற்கு எவ்வித இடையூறுகளும் இல்லை என சட்டத்தரணிகள் சங்கத்தின் தலைவர் ஜனாதிபதி சட்டத்தரணி சாலிய பீரிஸின் சார்பில் மன்றில் ஆஜரான ஜனாதிபதி சட்டத்தரணி இக்ரம் மொஹமட் தெரிவித்தார்.

இந்த நிலைமையில் வௌிநாட்டவர்கள், இலங்கையின் பொருளாதார அபிவிருத்திக்கு ஒத்துழைப்பு வழங்குவார்கள் என எவ்வாறு உறுதியாகக் கூறுவது என சட்டத்தரணி உயர் நீதிமன்றத்தில் கேள்வி எழுப்பினார்.

(ரமலான் ஸ்பெஷல்)


இஸ்லாமியர்கள் அணியும் உடையில் காட்சி தரும் இவர்கள் சந்தோஷ் நாயர், பபிதா பிரபா தம்பதியர். கோட்டயம் மாவட்டம், மேலுகாவுமட்டம், புளிகல் வீடை சேர்ந்தவர்கள். மதவெறியும், வெறுப்பு அரசியலும் அதிகரித்து வரும் நிலையில் இவர்கள்  இருவரும் ரமலான் மாதத்தில் நோன்பிருக்கும் முஸ்லிம் சகோதர சகோதரிகளுக்கு அவர்களின் பாரம்பரிய உடையணிந்து வாழ்த்து சொல்வதாக உலகுக்கு ஒரு செய்தியை தருகின்றனர்.


முதல் முறையாக தொழில் ரீதியில் விளையாட்டு வீரர்களுக்கான உடன்படிக்கையை மேற்கொள்ள நடவடிக்கை - நாமல்


சர்வதேச தொழிற்சந்தையை இலக்காகக் கொண்டு புதிய வேலைத்திட்டங்கள் ஆரம்பிக்கப்படும் என்று இளைஞர் மற்றும் விளையாட்டுத்துறை அமைச்சர் நாமல் ராஜபக்ஷ தெரிவித்தார். 

எதிர்வரும் இரண்டு ஆண்டுகளில் ஒரு லட்சம் தொழில் முயற்சியாளர்களை உருவாக்குவது இலக்காகும். நாட்டில் தெரிவு செய்யப்பட்ட 59 விளையாட்டு வீரர்கள் தொழில் ரீதியில் ஒப்பந்தங்களில் இணைத்துக் கொள்ளப்பட்டுள்ளதாகவும் அமைச்சர் கூறினார். 

பாராளுமன்ற உறுப்பினர் சாந்த பண்டார கேட்ட கேள்விக்கு பதிலளிக்கையிலேயே அமைச்சர் இந்த விடயத்தை குறிப்பிட்டார். 

மஹேல ஜெயவர்தன தலைமையிலான தேசிய விளையாட்டு பேரவையின் மூலம் தேசிய விளையாட்டு துறையை மேம்படுத்துவதற்கான திட்டம் சமர்பிக்கப்பட்டிருப்பதாகவும் அமைச்சர் தெரிவித்தார். 

முதல் முறையாக தொழில் ரீதியில் விளையாட்டு வீரர்களுக்கான உடன்படிக்கையை மேற்கொள்வதற்கான நடவடிக்கை முன்னெடுக்கப்பட்டிருப்பதாகவும் அவர் மேலும் தெரிவித்தார்.

சாரா புலஸ்தினி, உயிருடன் உள்ளார் - பாராளுமன்றத்தில் மனுஷ Mp தெரிவிப்பு (வீடியோ)


பாராளுமன்றத்தில் இன்று செவ்வாய்கிழமை, 20 ஆம் திகதி நடைபெற்ற விவாதத்தில், ஐக்கிய மக்கள் சக்தி பாராளுமன்ற உறுப்பினர், மனுஷ நாணயக்கார ஆற்றிய உரையின் ஒரு பகுதி 

வீடியோ

25 தனி தமிழ் தொகுதிகளை, உருவாக்குமாறு பிரதமரிடம் கோரிக்கை


மாகாண சபைக்காக புதிய முறைகளை உருவாக்குகின்ற போது தனித்தமிழ் மக்களை மாத்திரம் உள்ளடக்கியதாக 25 தமிழ் தொகுதிகள் உருவாக்கப்பட வேண்டும் என இலங்கை தொழிலாளர் காங்கிரஸின் உப தலைவரும் பிரதமரின் ஒருங்கிணைப்புச் செயலாளருமான செந்தில் தொண்டமான் தெரிவித்துள்ளார்.

ஆளும் கட்சித் தலைவர்களின் கூட்டம் பிரதமர் தலைமையில் அலரி மாளிகையில் நேற்று (19) நடைபெற்ற போதே செந்தில் தொண்டமான் இதனை தெரிவித்துள்ளார்.

மாகாண சபை தேர்தலை புதிய முறையின் இரண்டு வழிமுறைகளின் கீழ் நடத்துவது தொடர்பில் ஆராயப்பட்ட போதிலும் அதற்கு இலங்கை தொழிலாளர் காங்கிரஸ் தனது எதிர்ப்பினை வௌியிட்டுள்ளது.

மலைநாட்டில் சுமார் 10 இலட்சம் மக்கள் வாழ்ந்து வருகின்ற நிலையில், புதிய தேர்தல் முறைப்படி 5 உறுப்பினர்கள் மாத்திரமே தெரிவு செய்யப்படக்கூடிய நிலை காணப்படுவதாகவும் இலங்கை தொழிலாளர் காங்கிரஸின் உப தலைவர் செந்தில் தொண்டமான் சுட்டிக்காட்டியுள்ளார்.

தற்போது மலையகத்தில் 25 மாகாண சபை உறுப்பினர்கள் காணப்படுகின்ற நிலையில், புதிய முறை மூலம் 5 பேர் மாத்திரம் தெரிவு செய்யப்படுவதை ஏற்றுக்கொள்ள முடியாது என அவர் குறிப்பிட்டுள்ளார்.

தனித்தமிழ் மக்களை மாத்திரம் உள்ளடக்கியதாக 25 தமிழ் தொகுதிகளை உருவாக்குமாறும் அதற்கு தங்களின் ஆதரவினைத் தருவதாகவும் இலங்கை தொழிலாளர் காங்கிரஸின் உப தலைவர் செந்தில் தொண்டமான் கட்சித் தலைவர்களின் கூட்டத்தின் போது தெரிவித்துள்ளார்.

இலங்கையை முதலீட்டுக்கான சிறந்த இடமாகக் கொள்ளுங்கள் - உறுப்பு நாடுகளிடம் ஜனாதிபதி வேண்டுகோள்


இலங்கையை முதலீட்டுக்கான சிறந்த இடமாகக் கொள்ளுங்கள் என ஜனாதிபதி கோட்டாபய ராஜபக்ஷ போவோ மன்ற உறுப்பு நாடுகளிடம் வேண்டுகோள் விடுத்தார். 

நாட்டின் பொருளாதாரத்தை வலுப்படுத்தும் ஏற்றுமதியை இலக்காகக்கொண்ட முதலீட்டு வாய்ப்புக்களை விரிவுபடுத்துவது அரசாங்கத்தின் நோக்கமாகும். அதற்காக முதலீடுகளை மேற்கொள்வதற்கு முதலீட்டாளர்களை ஊக்குவிக்குமாறு ஜனாதிபதி அரச தலைவர்களிடம் கேட்டுக்கொண்டார். 

சீனாவின் ஹைனேன்ஹி, போவோ நகரத்தில் நடைபெறுகின்ற போவோ (BOAO) மாநாட்டில் இன்று (20) முற்பகல் வீடியோ தொழிநுட்பத்தின் ஊடாக கலந்துகொண்டு ஜனாதிபதி அவர்கள் மேற்கண்டவாறு குறிப்பிட்டார். 

"மாறிவரும் உலகம்: உலகளாவிய ஆளுகையை வலுப்படுத்தவும் பட்டை மற்றும் பாதை கூட்டுறவை மேம்படுத்தவும் கைகோர்ப்போம்." என்பது இந்த ஆண்டு மாநாட்டின் கருப்பொருளாகும். ஏப்ரல் 18 ஆம் திகதி ஆரம்பித்த நான்கு நாள் மாநாட்டின் மூன்றாம் நாள் இன்றாகும்.

29 நாடுகள் அங்கத்துவம் வகிக்கும் போவோ மன்றத்தின் தலைமையகம் சீனாவாகும். ஆசியாவின் உலக அமைதி, மேம்பாடு மற்றும் அபிவிருத்திக்கு பங்களிப்பதற்கு மன்றம் அர்ப்பணிப்புடன் செயற்படுகின்றது. 

நியுசிலாந்து, மொங்கோலியா, புருனை, சிங்கப்பூர், வியட்னாம், பங்களாதேஷ், கம்போடியா உள்ளிட்ட 15 நாடுகளின் அரச தலைவர்கள் இன்று (20) வீடியோ தொழிநுட்பத்தின் ஊடாக மன்றத்தில் கலந்துகொண்டனர்.

சாதகமான வரி அமைப்பு மற்றும் ஏனைய சலுகைகள் உள்ளிட்ட வெளிநாட்டு நேரடி முதலீடுகளுக்கு கவர்ச்சிகரமான கொள்கையை நாட்டில் நாம் உருவாக்கி வருகின்றோம். குறித்த இலக்கை அடைந்துகொள்வதற்கு சர்வதேச பங்காளர்களின் ஆதரவை அரசாங்கம் எதிர்பார்க்கின்றது.

அதன் மூலம் எதிர்வரும் காலங்களில் இந்நாட்டு பொருளாதாரத்தை குறிப்பிடத்தக்களவில் உயர்த்துவது அரசாங்கத்தின் நோக்கமாகுமென்றும் ஜனாதிபதி அவர்கள் சுட்டிக்காட்டினார். 

சீன மக்கள் குடியரசு “போவோ” மன்றத்தின் மூலம் செயற்படுத்தி வருகின்ற நடவடிக்கைகளை பாராட்டிய ஜனாதிபதி அவர்கள், பல நூற்றாண்டுகால பலமான வரலாற்றின் ஊடாக இலங்கையும் சீனாவும் பரஸ்பர மரியாதை, நம்பிக்கை மற்றும் ஒத்துழைப்பு ஆகியவற்றின் அடிப்படையில் ஒரு வலுவான மூலோபாய ஒத்துழைப்பு கூட்டாண்மையை பகிர்ந்து கொள்கின்றன என்றும் நினைவுகூர்ந்தார்.

இலங்கை ஆசிய வலயத்தின் அண்டைய நாடுகளுடனும் மற்றும் ஏனைய நட்பு நாடுகளுடனும் ஒத்துழைப்பை மேம்படுத்தும் வெளியுறவுக் கொள்கையை பேணிவருகின்றது. அது சமமான மற்றும் அணிசேரா கொள்கையின் அடிப்படையில் தயாரிக்கப்பட்டுள்ளது. இந்த கோட்பாடுகள் எங்கள் “சுபீட்சத்தின் நோக்கு” அபிவிருத்திக்கொள்கை சட்டகத்தில் உள்ளடக்கப்பட்டுள்ளதாக  ஜனாதிபதி அவர்கள் குறிப்பிட்டார். 

தேசிய கொள்கைகள் மற்றும் சர்வதேச பகிரப்பட்ட கொள்கைகள், விதிமுறைகள் மற்றும் விதிகளுக்கிடையில் நியாயமான சமநிலையை பேணுவது அவசியம். சமநிலையை பேணுவதில் சுயாதீன அரசுகளின் இறையாண்மையை எந்த வகையிலும் குறைத்து மதிப்பிட கூடாது என்று ஜனாதிபதி அவர்கள் சுட்டிக்காட்டினார். 

(ஜனாதிபதி அவர்களின் முழுமையான உரை இத்துடன் இணைக்கப்பட்டுள்ளது.) 

ஜனாதிபதி ஊடகப் பிரிவு 2021.04.20

ACJU க்கு எதிரான விமர்சனம் எனும் பெயரில், பொய் பிரச்சாரங்களில் ஈடுபடுவோரின் வலைகளில் சிக்க வேண்டாம்


முஸ்லிம் சமூகம் மிகவும் நெருக்கடியானதொரு சூழலில் வாழ்ந்து கொண்டிருக்கின்ற இத்தருணத்தில் மழை காலத்தில் புத்துகளில் இருந்து ஈஸல்கள் வருவதை போன்று முஸ்லிம் சமூகத்திற்குள் இருந்தே பலர் அவ்வப்போது ஊடகங்களிலும் சமூக வலைத்தலங்களிலும் தோன்றி முஸ்லிம் அமைப்புக்கள் தொடர்பாகவும், நிறுவனங்கள் தொடர்பாகவும், தனிநபர்கள் தொடர்பாகவும் விமர்சனம் எனும் பெயரில் இட்டுக் கட்டுகளையும், கற்பனை கதைகளையும் புணைந்து வருவதை அவதானிக்க முடிகிறது.

விமர்சனம் எனும் பெயரில் பிழையான உண்மைக்கு புறம்பான விடயங்களை மக்கள் மயப்படுத்தும் பாரிய குற்றத்தை செய்வது ஒரு புறமிருக்கஇன்னொரு சாரார் இட்டுக்கட்டுக்களையும் விமர்சனம் எனும் பெயரில் முன்வைக்கின்ற விடயமும் இல்லாமல் இல்லை.

விமர்சனம் என்பது ஒரு விடயத்தின் வளர்ச்சிக்கு இன்றியமையாத ஒன்றாகும். ஆனாலும் விமர்சனம் செய்வதற்கான ஒழுங்குகள் கட்டாயம் பின்பற்றப்பட வேண்டும். குறிப்பாக ஒரு விடயத்தை பற்றி நல்ல எண்ணத்துடன் விமர்சனம் செய்ய முற்படுகின்றவர் அவ்விடயம் தொடர்பாக அறிந்தவர்களுடன் தொடர்புகளை ஏற்படுத்து அது தொடர்பில் தெளிவை பெற்றுக் கொள்ள வேண்டும். அவ்வாறு உண்மைத் தன்மையை உரியவர்களிடமிருந்து பெற தவறும் போது தான் பிரச்சினைகள் உருவாகின்றன.

அதே நேரம் வாசகர்களும் ஒரு விமர்சனம் எழும் போது அது தொடர்பில்  உண்மைகளை அலசி உரிவயர்களை தொடர்பு கொண்டு அறிந்து கொள்ள முயற்சிக்க வேண்டும்.

ரஞ்சனுக்கான பொது மன்னிப்பு கோரிக்கையை, எழுத்து மூலம் அனுப்புமாறு ஜனாதிபதி அறிவிப்பு


ஐக்கிய மக்கள் சக்தியின் முன்னாள் நாடாளுமன்ற உறுப்பினர் ரஞ்சன் ராமநாயக்கவை ஜனாதிபதி பொது மன்னிப்பின் கீழ் விடுதலை செய்யுமாறு எதிர்க்கட்சித் தலைவர் சஜித் பிரேமதாச, ஜனாதிபதி கோட்டாபய ராஜபக்சவிடம் கோரிக்கை விடுத்துள்ளார்.

கோரிக்கை தொடர்பான காரணத்தை அறிவித்து எழுத்துமூலமாக அந்த கோரிக்கையை முன்வைக்குமாறு ஜனாதிபதி அறிவித்துள்ளார்.

சஜித் பிரேமதாச இது சம்பந்தமாக ஐக்கிய மக்கள் சக்தியின் நாடாளுமன்ற உறுப்பினர்களின் கூட்டத்தில் தெளிவுப்படுத்தியுள்ளார்.

நீதிமன்ற அவமதிப்பு குற்றச்சாட்டில் குற்றவாளி என தீர்ப்பளித்த உயர் நீதிமன்றம், ரஞ்சன் ராமநாயக்கவுக்கு நான்கு ஆண்டுகள் கடூழிய சிறைத்தண்டனை விதித்துள்ளதுடன் அவர் தற்போது சிறைச்சாலையில் தண்டனையை அனுபவித்து வருகிறார். 

ரமழான் பரிசு மழை - 2021 (கேள்வி - 7)

ஹிஜ்ரி 1442 ம் வருட ரமழானை அறிவுத் தேடலுடன் பயன்மிக்கதாய் அடையும் பொறுட்டு கடந்த வருடங்களை போன்று இவ் ரமழானிலும் ஜப்னா முஸ்லிம் இணையத்தளம் AMYS நிறுவனத்துடன் இணைந்து " ரமழான் பரிசு மழை 2021" கேள்வி பதில் போட்டி நிகழ்ச்சியை ஏற்பாடு செய்திருக்கின்றது. 

7ம் நாளுக்கான கேள்விகள் 

01. "சிறிய சூரதுன் நிஸா" எனும் பெயர் கொண்டு அழைக்கப்படும் சூரா எது?

02. சுவனத்துக்கு நன்மாராயம் கூறப்பட்ட ஸஹாபாக்களுல் இறுதியாக மரணித்தவர் யார்? 

03. உலகில் காணப்படும் முஸ்லீம் பெரும்பான்மை நாடுகள் எத்தனை? 

04. "கொழும்பு துறைமுக நகர" அபிவிருத்திக்குப் பின் இலங்கையின் பரப்பளவு எவ்வளவால் அதிகரிக்கப்பட்டிருக்கும்? 



Older Posts